Lamentaciones 2 - DIOSPA QHELQACHISQ

Tata Dios Jerusalenta jasut'in

¹ Tata Diospa phiñakuynin may sinch'i kasqanrayku, k'achitu Sión llajtata laqhayaykuchin. Israelpa jatunchakunanta janaj pachamanta kay pachaman wijch'uykamun, ñut'u jallp'a jinallaña kashan. Chay jina k'arajta phiñakuspa, Tata Diosqa mana Templollanmantapis khuyakorqachu.

² Tata Dios mana khuyakuspa, tukuy imata pampata ruwan. Phiñakuyninwan Tata Diosqa Jacobpa tukuy wasinkunata thuñiran. Judá llajtaj jark'achasqa perqantapis tukuyninta pampachan. Kuraj kamachejta, kurajkunatawan maytapuni k'umuykuchin.

³ Tata Diosqa k'araj phiñakuyninwan israelitakunaj atiyninkuta chinkarparichin. Payqa yanapayninta noqaykumanta karunchan, awqaykunaman sayaykojtiyku. Payllataj Jacobpa ayllunpi ninata jap'iykuchispa, tukuy muyuyninta q'olaykuchin.

⁴ Awqapis kanman jina Tata Dios arconta aysan, paña makinwantaj flechana arcota jap'in. Chaywantaj mashkha sumaj kajtapis tukuyninta chinkachin. K'achitu Sión llajtaman ninata jina k'araj phiñakuyninta kachaykun.

⁵ Tukuyta Kamachej Dios awqa jina tukuynin israelitakunata tukuchin. Kamachina wasita thuñiran, jark'achasqa llajtaj perqankunatapis pampata ruwan. Jinamanta k'achitu Judá suyuta manchay llakiywan, waqaywan ima junt'achin.

⁶ Tata Dios huerta qhawana ch'ujllata jina Templonta thuñirparin. Maypichus tantakoj kanku, chayta ujllata thuñirparerqa. Tata Diosqa Sionpi raymi ruwanata, samarina p'unchaytapis qonqapunankuta ruwarqa. Chay jina phiñakuyninwan kuraj kamachejta, chantá sacerdotekunatapis qhesacharqa.

⁷ Tata Diosqa altarninta qhesachan, jinallataj paypaj t'aqasqa cheqatapis pisipaj qhawan. Llajtaj muyuyninpi jark'achasqa perqakunatapis awqankuman jaywaykorqa. Awqankunataj Tata Diospa Templonpi raymi p'unchaypi jina manchayta kusiywan ch'ajwarinku.

⁸ Tata Dios nerqa: Sión llajtaj perqankuna urmachisqa kanqanku, nispa. Ajinata wakicherqa, mana iskayrayaspataj, chay perqakunata thuñirparerqa. Jawa perqantinta, ukhu kaj perqantinta ujllapi pampaman urmacherqa.

⁹ Punkunkunapis pampaman wijch'usqa karqanku. Pay punku chakanankutapis p'akirarqa. Kuraj kamachejninkuwan, kurajninkukunawanqa waj suyukunaj chawpinkupi kashanku. Kamachiykunaqa manaña kanchu, nitaj Diosmanta sut'inchajkunapis mosqoypi jina imatapis Diosmanta jap'inkuñachu.

¹⁰ K'achitu Sionmanta kurajkunaqa pampapi ch'inlla tiyakunku, umankuman jallp'awan qhallirakuspa, qhashqa p'achata churaykukuspa ima. Jerusalenpi sipaskunapis pampakama k'umuykunku.

¹¹ Waqasqaypi ñaweyqa tukukushanña, wijsay ukhupi ch'unchulaypis q'ewirakunku. Sonqoyqa llakiywan phatashanña, aylluypa llajtanta chay jina thuñisqata rikuspa, jinataj astawanqa ñuñoj wawakunata yarqhaywan ñanpi wañurashajta rikuspa.

¹² Wawakunaqa mamankuman ninku: Maytaj t'antawan vinowanri? nispa. Llajta ñankunapi k'irisqapis kankuman jina wijch'ukunku, mamankoj arphinpitaj yarqhaywan wañurapunku.

¹³ Jerusalén llajta, imatataj niykimanri? Jerusalén, imawantaj rijch'anachiykiman qanta sonqochanaypajri? Qanpa llakiyniykeqa mama qocha jina. Pitaj sonqoykita tiyaykuchiyta atisunkimanri?

¹⁴ Diosmanta sut'inchajkunaqa qhasi manakaj imakunata willasunku. Mana juchaykitapis rikuchisorqankuchu, chaynejta ama karu llajtaman apasqa kanaykipaj. Manachayqa llullallata willasunku, qhasi manakaj imakunata creechispa.

¹⁵ Ñanta tukuy purejkunaqa qanmanta asikuspa, t'ajllarakunku. Silbarispa, umankuta khiwirispataj, Jerusalén llajtamanta ninku: Kaychu chay k'achitu llajta, kay pachapi tukuyta kusichejqa? nispa.

¹⁶ Tukuy awqaykikuna qanpaj rimanku. Paykuna alqochakuspa, kirunkuta k'arurakuspataj, ninku: Kay llajtata ujllapi chinkarpachina. Noqanchej kay p'unchayta maytapuni suyasharqanchej, kunantaj rikunchejña, nispa.

¹⁷ Tata Dios chayta ruwan nisqanman jina, junt'anpuni unaymantapacha kamachisqanta. Payqa Jerusalenta chinkacherqa, manataj qhespicherqachu. Awqankuna paymanta asikojtinku, qhawallarqa, awqakunaj atiynintataj astawan jatunyacherqa.

¹⁸ K'achitu Sión llajta, Tata Dios yanapasunanta mañakuy. Tuta p'unchay waqaspa, waqayniykita mayu yakuta jina purichiy. Mana samarispa, nitaj sayk'uspa waqallaypuni ari.

¹⁹ Tuta jatarispa, qhaparikuy ari. Paran paranta Tata Diospa ñawpaqenpi waqarikuy. Makiykita Tata Diosman oqharispa, mañakuy, sapa llajtaman yaykunapi mikhunamanta jina wawaykikuna ama wañunankupaj.

²⁰ Tata Diosníy, qhawariy yuyariytaj, mana jayk'aj pitapis kay jinata ruwarqankichu. Kay warmikunaqa paqarichikusqanku wawankuta mikhukaponqankuchu? Diospaj T'aqasqa Cheqapi sacerdotekuna, sut'inchajkuna ima Temploykipi wañurachisqa kanqankuchu?

²¹ Kaynejpi jaqaynejpi wawakuna, machu runakuna, sipaskuna, wayna runakuna ima ayanku wijch'u wijch'ulla kashanku. K'araj phiñakuyniyki p'unchaypi paykunata wañuracherqanki, mana khuyakuspataj ñak'ararqanki.

²² Tukuynejmanta manchachikuyta tantaykamunki jatun raymiman wajyarikusqapis kankuman jina. Tata Dios, qanpa k'araj phiñakuyniyki p'unchaypi mana ujllapis llusp'erqachu, nitaj kawsashajpis qhepakorqachu. Pikunatachus uywasqaytaqa awqay wañuracherqa.