Jueces 20 - DIOSPA QHELQACHISQ

Israelitakuna phiñarikunku

¹ Chaypacha tukuy israelitakuna Danmantapacha Bersebakama, jinataj Galaadkama uj runa jinalla Tata Diospa ñawpaqenpi Mispá llajtapi tantaykukorqanku.

² Diospa ayllun Israelmanta kurajkunaqa chaypi kasharqanku, jinallataj 400.000 soldadokunapis.

³ Jinapi Benjamín jatun ayllumanta kajkunapis yacharqanku israelitakunamanta tukuy jatun ayllukuna Mispapi tantasqa kashasqankuta. Chantá israelitakunaqa chay levitata tapurerqanku imaynapichus warmin wañuchisqa kasqanta.

⁴ Wañojpa qosan levitataj nerqa: Warmiywan noqa chayarqani Benjamín jatun aylloj jap'iyninpi Gabaa llajtaman, chay ch'isi chaypi puñukunaykupaj.

⁵ Chay ch'isipachataj chay llajtamanta runakunaqa, puñusharqayku, chay wasiman muyuykamorqanku, wañuchiwayta munaspa. Jinamantarí mana munashajta warmiyta alqochakorqanku payta wañuchinankukama.

⁶ Chantá noqaqa warmiypa ayanta khuchuspa, tukuy Israel aylluman aparacherqani, jinamanta tukuyniykichej yachanaykichejpaj kay p'enqayta ruwasqankumanta.

⁷ Kunanqa niychej israelitakuna jina, imatachus ruwana kasqanta, nispa.

⁸ Chantá uj runa jinalla tukuynin israelitakuna sayarikuspa, nerqanku: Ni mayqenninchej toldonchejman, chayrí wasinchejman kutiripusunchu.

⁹ Manachayqa suerteta choqasunchej yachanapaj pikunachus Gabaaman maqanakoj rinankupaj.

¹⁰ Sapa chunka runakunamanta ujta t'aqaychej. Paykunaqa mink'asqa kanqanku soldadokunaman mikhunata apanankupaj. Chay ujkunataj Gabaapi kajkunawan maqanakamusunchej chay millay juchata Israelpi ruwasqankurayku.

¹¹ Ajinata ari tukuy israelitakuna uj runa jinalla tantaykukorqanku Gabaa llajtayojkunawan maqanakamunankupaj.

¹² Israelitakunapis Benjamín jatun aylloj tukuy jap'iyninman willarachimullarqankutaj: Imajtintaj wakin chay millayta ruwarqankichejri?

¹³ Apamuwayku Gabaapi kashanku, chay millay ruwajkunata wañuchinaykupaj. Ajinamanta Israel suyumanta chay jina millay juchata chinkachisunchej, nispa. Jinapis Benjaminmanta kajkunaqa mana israelitakunata kasorqankuchu,

¹⁴ manachayqa tukuynejmanta Gabaapi tantakorqanku israelita masinkunawan maqanakunankupaj.

¹⁵ Benjamín jatun ayllumanta soldadokunaqa 26.000 karqanku. Gabaapitaj 7.000 ajllasqa soldadokuna wajlla karqanku.

¹⁶ Paykuna ukhupi kallarqankutaj 700 lloq'erokuna. Paykunaqa lloq'e makiwan warak'aspa mana pantajchu kanku.

¹⁷ Chay jawa, chay ujkuna israelitakunapis tantakorqanku 400.000 maqanakupi sumajta maqanakuyta yachajkuna.

Benjamín jatun aylloj contranpi maqanaku

¹⁸ Manaraj maqanakuman rishaspa, israelitakunaqa Betelman rispa, Diosta tapukorqanku mayqen jatun aylluchus Benjamín jatun aylluwan ñawpajta maqanakoj rinanta. Tata Diostaj kutichispa, nerqa: Judá jatun aylluraj ñawpajta richun, nispa.

¹⁹ Chantá israelitakunaqa tutamanta jatarikuspa, Gabaaman chayarqanku, llajtaj chimpanpitaj jarakorqanku.

²⁰ Chaymantataj israelitakuna sumajta wakichikuspa, Gabaaman astawan qayllarqanku Benjaminmanta kajkunaj contrankupi maqanakunankupaj.

²¹ Jinallapi Benjaminmanta kajkunaqa llajtamanta llojsispa, chay p'unchaypi 22.000 israelitakunata wañucherqanku.

²² Chayrayku israelitakunaqa Betelman watejmanta rispa, Tata Diospa ñawpaqenpi inti yaykunankama jik'un jik'unta waqarikorqanku.

²³ Chantá Tata Diosta tapullarqankutaj: Benjamín jatun ayllu masiykunawan watejmanta maqanakoj kutillasqaykutajchu, manachu? nispa. Tata Diostaj kamacherqa: Rillaychejpuni, nispa.

²⁴ Q'ayantenqa israelitakuna kallpachakorqanku Benjaminmanta kajkunawan maqanakoj kutinankupaj. Rerqankutaj maypichus ñawpajta maqanakorqanku, chayman.

²⁵ Benjaminmanta kajkunarí ujtawan Gabaa llajtamanta llojsimorqanku israelitakunawan maqanakunankupaj. Kay kutipitaj 18.000 israelita soldadokunata wañucherqanku.

²⁶ Chantá tukuy israelitakuna, soldadokunapiwan ima watej Betelman rillarqankutaj, Tata Diospa ñawpaqenpi waqamunankupaj. Chaypitaj tukuy p'unchayta ayunarqanku. Chantá Tata Diosman jaywarqanku uywa ñak'asqa q'olachinakunata, jinallataj allinyakuna jaywanatawan.

²⁷ Jaqay tiempopeqa Diospa trato ruwasqan arcaqa Betelpi kasharqa,

²⁸ sacerdotenkutaj Finés karqa. Payqa Eleazarpa churin karqa, Aaronpa allchhintaj. Israelitakunataj Tata Diosta tapukorqanku: Benjamín jatun ayllu masiykuwan watejmanta maqanakoj risqaykuchu, chayrí manachu? nispa. Tata Diostaj paykunata nerqa: Maqanakoj rillaychej, noqataj q'aya atipanaykichejpaj yanapasqaykichej, nispa.

²⁹ Chaypacha israelitakunamanta wakin soldadokunaqa Gabaa qayllanpi pakaykukorqanku.

³⁰ Chay waj israelita soldadokunarí chay kinsa kaj p'unchaypi rerqanku Benjaminmanta kajkunawan maqanakoj Gabaa llajtaj chimpanpi, imaynatachus ñawpaj kutipi ruwasqanku, ajina.

³¹ Uj kutitawantaj Benjaminmanta kajkunaqa llajtamanta llojserqanku. Jinapi israelitakunawan maqanakuspataj, llajtankumanta karunchakorqanku. Chay kuti kinsa chunka israelitakunata wañucherqanku Betelman, chantá Gabaaman rina ñankunapi, chay pampankunapi ima.

³² Chayta rikuspa, Benjaminmanta kajkuna yuyarqanku ñawpaj kutipi jina israelitakunata atipashasqankuta. Israelitakunarí ñawpajpi yuyaycharikusqanku: Paykunamanta ayqesunchej, ajinamantataj ñankunapi qhepanchejta jamuspa, llajtankumanta karunchakonqanku, nispa.

³³ Jinallamantaj chay ayqeykachashaj israelitakunaqa kutirikuspa, maqanakunankupaj sayaykorqanku Baal Tamar cheqapi. Jinallataj q'omer pampapi pakasqa kasharqanku Gabaa llajtaj muyuyninpi. Chay israelita soldadokunapis maqanakoj llojsimullarqankutaj.

³⁴ Tukuynin israelitakunamanta sumaj wakichisqa maqanakoj soldadokunamanta 10.000 jina Gabaa llajtata jap'ej yaykorqanku. Maqanakoyqa may sinch'i karqa, Benjaminmanta kajkunataj atipachikushasqankutaña mana reparakorqankuchu.

³⁵ Tata Diosqa israelitakunata yanaparqa. Chay p'unchaypitaj soldadokunaqa Benjamín jatun ayllumanta 25.100 soldadokunata wañucherqanku. Chay wañojkuna sumajta maqanakuyta yachajkuna karqanku.

³⁶ Chaypacha Benjaminmanta kajkunaqa atipaykuchikusqankuta repararqanku. Kay jinata israelita soldadokunaqa Benjaminmanta soldadokunata atiparqanku. Chantá Benjaminmanta soldadokunaqa rikorqanku israelita soldadokuna ayqeshasqankuta. Chaywanpis israelitakuna ayqesqanku, imaraykuchus atinikusharqanku Gabaa llajta qayllapi pakasqa karqanku, chay israelita soldadokunapi.

³⁷ Chay pakasqa israelita soldadokunataj ujllata Gabaa llajtaman yaykuykuspa, tukuy qhepakojkunata wañuracherqanku.

³⁸ Llajta qayllapi pakasqa israelita soldadokunawan, ayqesharqanku, chay israelita soldadokunawan kay jinata yachachinaykukusqanku: Maypachachus llajtamanta ashkha nina q'oshñita rikunkichej chaypacha, yachankichej llajtata jap'isqaykutaña, nispa.

³⁹ Chantá ayqeshaj israelitakunaqa q'oshñita rikuytawan, kutirikamunanku karqa Benjaminmanta kajkunawan maqanakunankupaj. Benjaminmanta kajkunarí kinsa chunka israelitakunata wañurachisqankurayku, yuyarqanku ñawpaj kutipi jina israelitakunata atipaykushasqankuta.

⁴⁰ Jinallapi Benjaminmanta soldadokunaqa qhepata qhawarispa, rikorqanku nina lawrayta, q'oshñitawan llajtankumanta janajman oqharikushajta.

⁴¹ Chaypacha israelitakunaqa maqanakoj kutirikamorqanku. Benjaminmanta kajkunataj mancharisqa t'ukushaj qhepakorqanku, llajtankuta ruphaykushajta rikuspa.

⁴² Paykunataj israelitakunamanta ayqeyta qallarerqanku ch'innej ñanninta. Chaywanpis manataj ayqeyta aterqankuchu, imaraykuchus llajtamanta llojsimojkuna soldadokunañataj paykunata wañuracherqanku.

⁴³ Ajinata Benjaminmanta kajkunaqa israelitakunawan muyuykusqa rikhurerqanku. Israelita soldadokunataj paykunata qhatiykuspa, Menujamantapacha Gabaa llajtaj inti llojsimuynejkama t'ustiykorqanku.

⁴⁴ Ajinata chay p'unchaypi Benjamín jatun ayllumanta 18.000 soldadokunaqa maqanakupi wañorqanku.

⁴⁵ Chaymanta puchojkunataj kutirispa, ch'innejta, Rimón chhanka chaynejman ayqekorqanku. Chaypi 5.000 jina ñankunapi wañurachisqa karqanku. Israelitakunaqa Gidomkama paykunata qhatiykuspa, 2.000 soldadokunatawan jina wañucherqanku.

⁴⁶ Chay p'unchaypi Benjaminmanta sumaj soldadokunaqa 25.000 wañorqanku.

⁴⁷ Jinapis 600 jinaraj ch'innejman ayqekuspa, Rimón chhankapi tawa killata qhepakorqanku.

⁴⁸ Chaymanta israelita soldadokunaqa Benjaminpa llajtankuman kutirispa, kaj chhika runakunata wañuracherqanku. Jinallatataj uywakunata tarisqankutapis wañurachillarqankutaj, tukuy llajtatapis ruphaykuchillarqankutaj.