Jueces 14 - DIOSPA QHELQACHISQ

Sansón casarakun

¹ Ujpacha Sansón Timnat llajtaman urayk'uspa, filistea llajtayoj uj sipasta rikorqa.

² Jinapi wasinman kutipuspa, tatankunaman willarqa: Timnat llajtapi Filisteamanta uj sipasta rikuni, payta warmiypaj mañaqampunawaykichejta munani, nispa.

³ Tatan mamanrí Sansonta nerqanku: Imapajtaj mana israelita warmita warmiykipaj mask'ashanki, chay filisteo mana circuncidasqa llajtayojkunamantari? Llajta masinchej ukhupi, chayrí tukuy israelitakuna ukhupipis manachu kanman uj warmi paywan casarakunaykipaj? nispa. Sansontajrí kuticherqa: Chay warmitapuni munani. Chayrayku paytapuni mañaqampuwaychej, nispa.

⁴ Sansonpa tatan mamanrí mana yacharqankuchu chay tukuy ima Tata Diosmanta kasqanta, imaraykuchus Diosqa filisteokunaj contrankupi achakita mask'asharqa paykunata jasut'inanpaj. Chaypacha filisteokunaqa israelitakunata munayninkuta ruwaj kanku.

⁵ Chantá Sansonqa, tatan maman ima Timnatman rerqanku. Ñapis Sansón uva huertaman chayashajtinña, uj maltun león qhaparispa payman phinkiykorqa.

⁶ Chaypacha Tata Diospa Espiritonqa Sansonman sinch'i kallpata qorqa, Sansontaj makillanwan uj chivituta jina leontaqa t'isarparerqa. Chaywanpis chayta ruwasqantaqa tatan mamanman mana willarqachu.

⁷ Chaymanta Sansonqa chay munakusqan sipaswan parlaj rerqa.

⁸ Qhepanejmantaj mana unaymanchu, Sansón kutillarqataj chay sipaswan casarakunanpaj. Chantá ñanmanta uj ladoman ithirerqa wañusqa leonta qhawarimunanpaj, chaypitaj wañusqa leonpi abejakunaqa uj t'eqe misk'itaña ruwaykusqankuta rikorqa.

⁹ Sansontaj chay t'eqemanta makinwan misk'ita orqhoytawan, mikhurispa riporqa. Tatanta mamanta taripaspataj, misk'ita paykunamanpis qorillarqataj, paykunataj mikhorqanku. Jinapis mana paykunaman willarqachu wañusqa leonmanta orqhosqantaqa.

¹⁰ Chantá Sansonpa tatanqa sipasta parlapayaj rerqa. Chaypitaj Sansonqa uj raymita ruwarqa, imaynatachus chay llajtayoj waynakuna ukhupi ruwayta yachasqankuman jina.

¹¹ Filisteokunaqa Sansonta rikuytawan, kinsa chunka waynakunata paywan kanankupaj pusarqanku.

¹² Chantá chay kinsa chunka runakunaman Sansonqa nerqa: Uj watuchikuta willasqaykichej. Kay qanchis p'unchay raymi kanankama sichus kay watuchiku imatachus niyta munasqanta niwankichej chayqa, noqaqa sapa ujniykichejman qosqaykichej sumaj linomanta ruwasqa uj p'achata, chantá raymiman rina uj p'achatawan.

¹³ Manatajchus watunkichej chayrí, sapa ujniykichej mosoj linomanta uj p'achata, jinataj raymiman rina uj p'achatawan noqaman qowankichej, nispa. Chay waynakunataj kuticherqanku: Kunanqa niwayku ari: Imataj chay watuchikuri? Sumajta uyarisqayku, nispa.

¹⁴ Sansontaj nerqa: Imas imas kanman? Imachus wañuchispa mikhojmantaqa mikhuna llojsimun, kallpayojmantataj misk'i llojsimun, nispa. Kinsa p'unchay junt'api chay waynakuna manapuni chay watuchikuta kutichiyta aterqankuchu.

¹⁵ Tawa p'unchayninmantaj paykunaqa Sansonpa warminta nerqanku: Tapuy qosaykita chay watuchiku imatachus niyta munasqanta. Manachus chay watuchiyta sut'inchawayku chayqa, qanta, chantá tataykej aylluntawan ima ruphaykuchisqayku. Qankunaqa q'alallatachu saqerpayta munashawayku, nispa.

¹⁶ Chantá warmeqa Sansonta waqaspa nerqa: Qanqa mana munakuwankichu, chejniwanki. Uj watuchikuyta willanki llajta masiykunaman, noqamantaj mana sut'inchawankichu imatachus niyta munasqanta, nispa. Sansontaj kuticherqa: Ni tatayman, nitaj mamaymanpis willashanichu. Imaynatataj qanman willaykimanri? nispa.

¹⁷ Warmintajrí raymi tukukunankama waqallarqapuni. Anchatapuni Sansonta mat'iykojtin, chay raymej qanchis kaj p'unchayninpi Sansonqa watuchikuta warminman sut'incharqa. Sansonpa warmintaj llajta masinkuman chayta willamorqa.

¹⁸ Chantá qanchis kaj p'unchaypi manaraj inti yaykushajtin, chay filisteo waynakunaqa Sansonta nerqanku: Mana imapis abeja misk'imanta aswan misk'eqa kanchu. Nillataj imapis leonmanta aswan kallpayojqa kanchu, nispa. Sansontaj paykunaman kuticherqa: Manachus terneraywan llank'awajchej karqa chayqa, ni jayk'aj watuchisqaytaqa sut'inchayta atiwajchejchu karqa, nispa.

¹⁹ Chaypacha Tata Diospa Espíritun Sansonman sinch'i kallpata qorqa. Sansontaj filisetokunaj llajtanku Ascalonman rispa, kinsa chunka runakunata wañucherqa. Chaykunamanta p'achata lluch'uspataj, watuchisqanta sut'inchajkunaman qorqa. Chaymantataj may phiñasqa tatanpa wasinman kutiporqa.

²⁰ Chaywanpis tatanpa wasinpi Sansón kashanankama chay sipaspa tatanqa Sansonpa warminta wajwan casaracherqa, pichus casarakupi Sansonpa kawsaqen kasqa, chaywan.