San Juan 21 - DIOSPA QHELQACHISQ

Jesús qanchis yachachisqankunaman rikhurin

¹ Chay qhepata, Tiberias qocha qayllapi Jesús ujtawan yachachisqankunaman rikhurerqa. Kay jina karqa:

² Chaynejpi Jesuspa kay yachachisqankuna tantasqa kasharqanku: Simón Pedro, Dídimo nisqa Tomás, Galileapi Caná llajtamanta Natanael, Zebedeoj iskaynin churinkuna, chantá iskay yachachisqakunapiwan ima.

³ Jinapi Simón Pedro paykunata nerqa: Challwata jap'ej rishani, nispa. Paykunataj nerqanku: Noqaykupis qanwan risqayku, nispa. Chantá rispa, uj boteman wicharerqanku. Chaywanpis chay tutantin mana uj challwallatapis jap'erqankuchu.

⁴ Sut'iyashajtinña, Jesús qocha kantupi rikhurerqa. Yachachisqankunatajrí Jesús kasqanta mana repararqankuchu.

⁵ Chantá Jesús paykunata nerqa: Kawsaqekuna, challwata jap'inkichejñachu? nispa. Paykunataj nerqanku: Mana, ni ujtapis jap'iykuchu, nispa.

⁶ Jesús paykunata nillarqataj: Ch'ipata botej pañannejman choqaykuychej, chaypitaj jap'inkichej, nispa. Yachachisqankunataj ch'ipata choqaytawan, mana orqhoyta aterqankuchu may ashkha challwayoj kasqanrayku.

⁷ Jinapi, pitachus Jesús munakorqa, chaymin Pedrota nerqa: Payqa Tukuyta Kamachej Jesús, nispa. Simón Pedrotaj Tukuyta Kamachej Jesús kasqanta nejta uyarispa, q'ara wasalla kashasqanrayku patanchana p'achanta churaykukorqa. Chantá usqhayta qocha kantuman chayananpaj yakuman phinkiykorqa.

⁸ Wakin yachachisqakunataj botepi jamorqanku, ch'ipa junt'a challwata aysamuspa, imaraykuchus qocha kantuman pachaj metro jinallaña karqa.

⁹ Chantá qocha kantuman chayaspa, paykuna t'antata rikorqanku, nina k'aja patapitaj uj challwa churasqata.

¹⁰ Jesustaj paykunata nerqa: Kunan jap'isqaykichej challwakunamanta wakinta apamuychej, nispa.

¹¹ Chantá Simón Pedro boteman wicharispa, qocha kantuman ch'ipata orqhorqa, jatuchaj challwakunawan junt'ata. Chay ch'ipapi 153 challwakuna karqanku. Chay chhika challwawanpis ch'ipaqa mana llik'ikusqachu.

¹² Jinataj Jesús yachachisqankunata nerqa: Jamuychej, mikhurikuychej ari, nispa. Mana mayqenninkupis taporqankuchu: Pitaj kanki? nispa, imaraykuchus yachallarqanku Tukuyta Kamachej Jesuspuni kasqanta.

¹³ Jesustaj paykunaman qayllaytawan, t'antata oqharispa jaywarqa, jinallataj challwatapis.

¹⁴ Kaywanqa Jesús wañusqamanta kawsarimpuytawan yachachisqankunaman rikhurisqanqa kinsa kutiña karqa.

Jesusqa Simón Pedrowan parlan

¹⁵ Mikhuyta tukusqankutawan, Jesusqa Simón Pedrota nerqa: Jonaspa churin Simón, kaykunamanta astawanchu munakuwanki? nispa. Pedrotaj kuticherqa: Arí, Tukuyta Kamachej, munakususqayta qan yachanki, nispa. Jesustaj nerqa: Ajina chayqa, corderoykunata michipuway, nispa.

¹⁶ Chantá Jesús ujtawan Pedrota taporqa: Jonaspa churin Simón, munakuwankichu? nispa. Pedrotaj kuticherqa: Arí, Tukuyta Kamachej, munakususqayta qan yachanki, nispa. Jesús nillarqataj: Jina chayqa, ovejaykunata michipuway, nispa.

¹⁷ Ujtawanpis Jesús tapullarqataj: Jonaspa churin Simón, munakuwankichu? nispa. Pedrotaj llakiywan oqharichikorqa, kinsa kutikama: Munakuwankichu? nispa Jesús nisqanmanta. Chantá kuticherqa: Tukuyta Kamachej Jesusníy, qan tukuy imata yachanki. Qanta munakususqaytapis yachallankitaj, nispa. Jesustaj payta nerqa: Jina chayqa, ovejaykunata michipuway.

¹⁸ Kayta sut'ita niyki: Waynallaraj kashaspaqa, qan chumpillikoj kanki, munasqaykiman jinataj purej kanki. Machuña kaspatajrí, makiykita oqharinki, wajtaj p'achaykita churasonqa, maymanchus mana munasqaykimantaj pusasonqa, nispa.

¹⁹ Chayta Jesús nerqa, Pedro imaynata wañuspachus Diosta jatunchananmanta yachayta qonanpaj. Chayta niytawantaj, Jesús nillarqataj: Qhepayta jamuy, nispa.

²⁰ Jinapi Pedro qhepata qhawarispa, rikorqa Jesuspa munasqa yachachisqanta jamushajta. Payllataj cenapi Jesusman atiykukuspa, tapusqa: Tukuyta kamachej, pitaj jap'ichisonqari? nispa.

²¹ Pedrotaj chay yachachisqata rikuspa, Jesusta nerqa: Tukuyta Kamachej Jesús, paywanrí, imataj kanqari? nispa.

²² Jesustaj kuticherqa: Sichus kutimunaykama pay kawsananta munani chayqa, qanpata ima ruwanayki tiyan? Qanrí noqata qhatiwaypuni, nispa.

²³ Jesús ajinata nisqanrayku, Jesusta qhatejkuna aswan qhepaman paykunapura ninakorqanku chay yachachisqa mana wañunanta. Jesusrí mana nisqachu: Mana wañonqachu, nispaqa. Aswanpis nisqa: Sichus kutimunaykama pay kawsananta munani chayqa, qanpata ima ruwanayki tiyan? nispa.

²⁴ Jesuspa chay yachachisqanqa chay tukuyta willarqa, qhelqarqataj. Yachanchejtaj imatachus nisqanqa ajinapuni kasqanta.

²⁵ Jesuspa ruwasqanqa may chhikaraj tiyan. Chaykunachus ujmanta uj qhelqasqa kanman chayqa, yuyani tukuy kay pacha mana wakinmanchu chay qhelqasqa p'anqakunata churanapaj.