San Juan 15 - DIOSPA QHELQACHISQ

Jesusqa sumaj uva sach'a jina

¹ Jesús yachachisqankunata nillarqapuni: Noqaqa sumaj uva sach'a jina kani, Tataytaj uva huertata qhawaj jina.

² Noqaman ujchasqa kaj yura, sichus mana poqon chayqa, Tatay k'uturparenqa. Poqoj yuratarí, podaspa llimphuchanqa, astawan poqonanpaj.

³ Qankuna llimphuchasqaña kankichej noqaj parlasqayrayku.

⁴ Chaywanpis noqallamanpuni ujchasqa kaychej, imaynatachus noqapis qankunawan ujchasqa kani, ajinata. Imaynatachus yura uva sach'aman mana ujchasqa kaspa, sapallanmanta mana poqoyta atinchu, ajinallatataj qankunapis Diospa munasqanta ruwayta mana atinkichejchu, manachus noqaman ujchasqallapuni kankichej chayqa.

⁵ Noqa uva sach'a jina kani, qankunataj chay uva sach'aj yuran jina kankichej. Pillapis noqaman ujchasqallapuni kaj, noqataj payman, chaymá ashkhata poqonqa. Chaywanpis sichus qankunamanta pillapis noqamanta t'aqakun chayqa, mana imatapis ruwayta atenqachu.

⁶ Mana noqaman ujchasqallapuni kajqa k'utusqa yura jina huertamanta jawaman wijch'usqa kanqa, ch'akiponqataj. Chay wijch'usqa yurakunata tantaspataj, runaqa ninaman wijch'un.

⁷ Sichus qankuna noqaman ujchasqallapuni kaspa, tukuy nisqayta kasunkichej chayqa, munasqaykichejta Diosmanta mañakuychej, paytaj qosonqachej.

⁸ Maypachachus qankuna uva yura jina ashkha poqoyniyoj kankichej chaypacha, cheqapuni yachachisqay kasqaykichejta yachayta qoshankichej, chaynejtataj Tatay jatunchasqa kanqa.

⁹ Imaynatachus Tata Dios noqata munakuwan, ajinallatataj noqapis qankunata munakuykichej. Ajinaqa qankunapis kasuwaspa puriychej munakususqaykichejmanta ama karunchakunaykichejpaj.

¹⁰ Munakususqaykichejman jina kawsanaykichejpaj, kamachisqaykunata kasunaykichej tiyan, imaynatachus noqapis Tataypa kamachiwasqanta kasuspa munakuyninpi kawsani, ajinata.

¹¹ Chaykunata niykichej noqawan khuska mayta kusikunaykichejpaj, chay kusikuytaj sonqoykichejmanta phullchirenqa.

¹² Kaytamin kamachiykichej: Qankunapura munakuychej, imaynatachus noqa munakuykichej, ajinata.

¹³ Pillapis kawsaqenkunarayku wañojqa imaynatapunichus paykunata munakusqanmanta yachayta qon.

¹⁴ Qankunataj kawsaqeykuna kankichej, sichus kamachisqayta kasunkichej chayqa.

¹⁵ Manaña wata runay nisqaykichejchu, imaraykuchus wata runaqa patronnin imatachus ruwasqanta mana yachanchu. Manachayqa kawsaqeykuna nisqaykichej, imaraykuchus Tataypa tukuy ima niwasqanta rejsichiykichej.

¹⁶ Mana qankunachu ajllawarqankichej, aswanpis noqa qankunata ajllarqaykichej. Chantá churarqaykichej, rispa ashkha poqoyniyoj yura jina kanaykichejpaj, chay ruwasqaykichejtaj unaypaj kananpaj. Ajinamanta tukuy imatachus noqaj sutiypi Tata Diosmanta mañakusqaykichejta pay qosonqachej.

¹⁷ Ujtawan kamachiykichej: Purajmanta munakuychej, nispa. Ajinata Jesús yachachisqankunata nerqa.

Runakuna Jesusta, chantá yachachisqankunata ima chejnenqanku

¹⁸ Jesús nillarqataj: Sichus Diosman mana kutirikojkuna chejnisunkichej chayqa, yachaychej noqataraj ñawpajta chejniwasqankuta.

¹⁹ Sichus qankuna paykuna jinallataj kawajchej chayqa, munakusunkichejman. Qankunarí manaña paykuna jinachu kankichej, imaraykuchus noqa qankunata ajllakorqaykichej manaña paykuna jina kanaykichejpaj. Chayraykumin paykuna chejnisunkichej.

²⁰ Imatachus qankunaman nisqayta yuyarikuychej: Wata runaqa patronninmanta mana aswan kurajchu, nispa. Noqatachus qhatiykachawarqanku chayqa, qankunatapis qhatiykachallasonqachejtaj. Nisqaytachus kasorqanku chayrí, qankunaj nisqaykichejtapis kasullanqankutaj.

²¹ Paykuna chay tukuyta ruwasonqachej yachachisqay kasqaykichejrayku, imajtinchus Diosman mana kutirikojkunaqa pichus Kachamuwajta mana rejsinkuchu.

²² Sichus noqa jamuspa, mana paykunaman parlayman karqa chayqa, mana juchayojchu kankuman karqa. Kunanrí juchallisqankumanta mana imatapis niyta atinkuchu.

²³ Pillapis noqata chejnikuwajqa Tataytapis chejnikullantaj.

²⁴ Manachus paykuna ukhupi ni pejpa ruwasqan t'ukunata ruwayman karqa chayqa, mana juchayojchu kankuman karqa. Kunanrí t'ukuna ruwasqayta rikunkuña. Chaywanpis noqata, Tataytapis chejnikuwayku.

²⁵ Chayqa ajina, Diospa Qhelqachisqanpi kay nisqan junt'akunanpaj: Manakajmanta chejnikuwanku, nispa.

²⁶ Noqarí qankunaman Sonqochajta kachamusaj, chay Santo Espiritutaj Tataymanta jamuspa, cheqa kajmanta yachachisonqachej. Maypachachus Santo Espíritu Tata Diosmanta jamonqa chaypacha, pay noqamantamin willanqa.

²⁷ Qankunapis rikojkuna jina noqamanta parlallankichejtaj, imaraykuchus qallariymantapacha noqawan karqankichej, nispa.