Josué 8 - DIOSPA QHELQACHISQ

Israelitakuna Hai llajtata jap'inku

¹ Chaymanta Tata Diosqa Josueta nerqa: Ama manchachikuychu, nitaj q'ewakuychu. Manachayqa tukuy soldadoykikunata pusariykukuspa, Hai llajtayojkunawan maqanakoj puririy, imaraykuchus noqa Hai llajtaj kuraj kamachejninta, runantintawan atipanaykipaj yanapasqayki. Chantá jallp'ankuta, llajtankuta ima jap'ikapunkichej.

² Qanqa Hai llajtata chantá kuraj kamachejninta ima, imaynatachus Jericó llajtata ruwarqanki, ajinallatataj ruwanki. Chaywanpis kunan kuteqa uywankuta, chantá imankuchá tiyapusqanta qankuna jap'ikapunkichej. Ujllata atipaykunaykichejpajqa kay jinata ruwaychej: Soldadokunata llajtaj wasanman pakaykuy, kaymanta jinalla phawaykunankupaj, nispa.

³ Chantá Josué, tukuy soldadonkuna ima Hai llajtayojkunawan maqanakoj rinankupaj wakichikorqanku. 30.000 soldadokunata ajllaspa, Josué paykunata tutallan kacharqa,

⁴ kay jinata kamachispa: Allinta uyariychej: Qankunaqa llajtaj wasanman riychej, chaypitaj pakaykukuychej, phinkimunaykichejpaj jinataj wakichisqalla suyaychej.

⁵ Noqatajrí wakin soldadokunawan llajtaman qayllamusqayku. Maypachachus noqaykuwan maqanakoj llojsiykamonqanku chaypachaqa, noqayku ñawpaj kutipi jina ñawpaqenkuta ayqekusqayku.

⁶ Ajinata llajtamanta ayqejtiykoqa, qhepaykuta qhatiykamuwasqayku, ujtawan ayqechishawasqaykuta yuyaspa.

⁷ Chantá qankunaqa pakakushasqaykichejmanta llojsimuytawan, llajtata jap'inkichej, imaraykuchus Tata Diosniykichej chay llajtata makiykichejman jaywasonqachej.

⁸ Llajtata jap'ispataj, ruphaykuchiychej, Tata Diospa nisqanman jina. Kayta noqa kamachiykichej, nispa.

⁹ Chantá Josueqa soldadokunata kacharqa, paykunataj rispa, Hai llajtaj inti yaykuynejpi, Betelwan Haiwan tinkuypi jina pakaykukorqanku. Chaykamataj Josueqa jarallapiraj chay ch'isi qhepakorqa.

¹⁰ Q'ayantintaj Josueqa tutamanta jatarispa, soldadonkunata tantarqa, jinaytawantaj, soldadonkunaj ñawpaqenkuta chantá israelitakunaj kurajninkukunawan khuska purirerqa, Hai llajtayojkunaj contrankuta maqanakunankupaj.

¹¹ Jinapi Josueqa, soldadonkunawan ima llajtaj ñawpaqenmanta qayllaykorqanku, jarakorqankutaj Hai llajtamanta wichaynejpi. Paykunataqa Hai llajtamanta uj valle t'aqasharqa.

¹² Josueqa 5.000 soldadokunata llajtamanta inti yaykuynejman pakaykorqa, Betelwan Haiwan kashan chay chawpipi jina.

¹³ Ajinaqa soldadokuna iskayman t'aqasqa karqanku: Uj t'aqa llajtamanta inti yaykuynejpi pakasqa kasharqa, ujtaj llajtamanta wichaynejpi jarasqa. Chay tutataj Josueqa khuskan vallekama llajtaman qayllaykorqa.

¹⁴ Jinapi Hai llajtata kuraj kamachejqa Josuéj soldadonkunata rikuytawan, soldadonkunata tantaykuspa, israelitakunawan maqanakoj Jordán valleman urayk'orqa. Chaywanpis pay mana yacharqachu wakin israelitakuna llajtaj wasanpi pakasqa kashasqankuta.

¹⁵ Josuerí soldadonkunawan ima ayqej ayqej tukorqanku, ch'innejman rishan, chay ñannejta.

¹⁶ Chantá Haimanta soldadokuna israelitakunata qhatiykunankupaj tantaykukorqanku. Josueta qhatiykuspataj, llajtamanta karunchakorqanku.

¹⁷ Haimanta chantá Betelmanta ima israelitakunata qhatiykunankupaj llojsimorqanku. Tukuyninku israelitakunata qhatiykuyta munasqankuraykutaj llajtaj punkunta kichasqallata saqerparerqanku.

¹⁸ Chantá Tata Dios Josueta nerqa: Jap'ishanki, chay lanzata Hai llajtanejman oqhariy, Hai llajtaj contranta maqanakoj yaykunankupaj. Noqataj chay llajtata jap'iyta yanapasqayki, nispa. Jinata Tata Dios nejtintaj, Josueqa jap'isharqa chay lanzata Hai llajtanejman oqharerqa.

¹⁹ Josueta lanzanta oqharejta rikuytawantaj, pakasqa kasharqanku, chay soldadokunaqa llajtaman yaykuspa, ninata jap'iykucherqankupacha.

²⁰ Chantá Haimanta runakuna qhepankuta qhawarikuspa, llajtamanta q'oshñi manchayta pataman wicharishajta rikorqanku. Manaña ni mayman ayqeyta aterqankuchu, imaraykuchus ñawpaqenkuta ch'innejman ayqeshaj israelitakunaqa paykunawan maqanakoj ujllata tijrakamorqanku.

²¹ Josuetaj tukuy israelitakunawan ima, pakasqa israelitakuna llajtaman ninata jap'iykuchisqankuta rikuspa, paykunapis Haimanta kaj soldadokunawan maqanakullarqankutaj.

²² Chaymantataj Hai llajtaman yaykoj israelitakuna llojsimorqanku. Jinamanta Haimanta kajkunaqa chawpipi rikhurerqanku, israelitakunataj tukuyninkuta mana ni uj puchuyojta wañuracherqanku.

²³ Chaywanpis Hai llajtamanta kuraj kamachejninta mana wañucherqankuchu. Kawsashajta jap'ispa, Josueman pusarqanku.

²⁴ Israelitakunaqa Haimanta soldadokunata qhatiykuspa, tukuyninkuta espadawan wañuracherqanku. Chaymantataj Hai llajtaman kutiykuspa, puchojkunatapis wañurachillarqankutaj.

²⁵ Chay p'unchaypi Hai llajtayojkunamanta tukuyninku wañuchisqa karqanku, 12.000 qharikuna, warmikuna ima.

²⁶ Josueqa Hai llajtanejman lanzan oqharisqallapuni karqa, chay llajtayojkunamanta tukuyninta israelitakuna wañurachinankukama.

²⁷ Chantá israelitakunaqa uywakunata, llajtapi imakunachus karqa, chay tukuyninta paykunapaj jap'ikaporqanku, Tata Dios Josueman kamachisqanman jina.

²⁸ Josuetaj Hai llajtata ruphaykuchispa, wiñaypaj thuñisqata saqerparerqa. Kunankamataj ajina kashan.

²⁹ Chaymanta Josueqa Hai llajtamanta kuraj kamachejta uj sach'aman warkhuspa, sipicherqa, ayantaj inti yaykuykama warkhurayarqa. Inti yaykuytataj Josué kamacherqa Hai llajtata kamachejpa ayanta urayk'uchispa, llajtaman yaykuna punkuman wijch'umunankuta. Patanmantaj rumita tawqaykunankuta kamachillarqataj. Chay tawqasqa rumitaj kunankama kashan.

Josueqa Ebal orqopi Diospa kamachisqanta ñawirin

³⁰ Chantá Josué Israelpa Diosnin Tata Diospaj Ebal orqopi uj altarta ruwaporqa.

³¹ Chayta Tata Diospa kamachin Moisés israelitakunaman kamachisqanman jina ruwarqa. Imaynachus Moisespa kamachisqan qhelqasqa kashan, chayman jina mana ch'eqosqa rumimanta uj altarta ruwarqanku. Chay altar patapi israelitakunaqa uywa ñak'asqata q'olachispa Tata Diosman jaywarqanku. Chayllapitaj k'achata kawsakuy jaywanata jaywallarqankutaj.

³² Chaymantaqa israelitakuna rikushajtinku, Josueqa altarmanta rumikunapi Moisespa qosqan kamachisqakunata qhelqarqa.

³³ Chaymantaqa tukuy israelitakuna, waj llajtayojkuna ima, chantá kurajninkukuna, soldadokunata kamachejkuna, juezkuna ima Tata Diospa trato ruwasqan arcaj qayllanpi chimpapurantin sayarqanku, levita sacerdotekuna Diospa arcanta lijrasharqanku, chaykunaj ñawpaqenkupi. Chayqa Israel ayllu saminchasqa kananpaj karqa, Tata Diospa kamachin Moisés kamachisqanman jina. Khuskanqa Guerizín orqonejpi sayasharqanku, khuskantaj Ebal orqonejpi.

³⁴ Chantá Josueqa saminchasqa kanamanta maldicisqa kanamantapis kamachisqa qhelqasqata, tukuyninta ñawirerqa.

³⁵ Josueqa Moisespa kamachisqanta Israel suyumanta qharikunaman, warmikunaman, wawakunaman, chantá waj llajtayojkunaman ima tukuyninta ñawirerqa.