Josué 5 - DIOSPA QHELQACHISQ

Gilgalpi israelitakuna jarakunku

¹ Chaypacha amorreokunaqa Jordanmanta inti yaykuynejpi tiyakusharqanku, cananeokunataj Jatun Mama Qocha qayllapi. Chantá chay llajtayojkunaj kuraj kamachejninkukuna uyarerqanku israelitakuna chimpanankupaj Tata Dios imaynatachus Jordán mayuta ch'akichisqanta. Chayrayku manchachikuywan llawch'iyaspa, israelitakunawan mana maqanakuyta munarqankuchu.

² Chaypacha Tata Diosqa Josueta nerqa: Rumimanta cuchillokunata ruwakuy, israelitakunaj churinkukunata circuncidanaykipaj, nispa.

³ Josuetaj Tata Diosta kasuspa, rumimanta cuchillokunata ruwarakorqa, chaywantaj israelitakunata Aralot orqopi circuncidarqa.

⁴ Josué chayta ruwarqa, imaraykuchus tukuy qhari Egiptomanta llojsimorqanku, chaykuna ch'innejpi wañusqankuña.

⁵ Egiptomanta llojsimojkunaqa tukuyninku circuncidasqa karqanku. Ch'innejta jamushajtinku paqarejkunarí mana circuncidasqachu karqanku.

⁶ Israelitakunaqa tawa chunka watata ch'innejta purerqanku. Chaypi Egiptomanta llojsimoj tukuy israelitakuna maqanakuman rinapaj jina llojsimojkuna wañupusqankuña. Chay qharikunaqa Tata Diosta mana kasusqankuchu. Chayrayku Tata Dios tiluspa, nisqa tatankuman qonanta nisqan jallp'ata mana rikunankuta. Chay jallp'a manchay sumaj jallp'a kasqanrayku lechewan chantá abeja misk'iwan yaku jina purishaj jallp'a karqa, nispa.

⁷ Chayrayku Josueqa ch'inpi wañojkunaj wawankukunata circuncidarqa, pikunachus tatankukunaj cuentankumanta churasqa karqanku, chaykuna. Paykunaqa ñan puriypi kasqankurayku manaraj circuncidasqachu karqanku.

⁸ Tukuyninku circuncidachikuytawantaj, qhaliyanankukama jarankupi qhepakorqanku.

⁹ Chantá Tata Dios Josueta nerqa: Kunan circuncidasqaykichejwan Egiptopi wata runa kasqaykirayku p'enqachisqa kasqaykichejta chinkachini, nispa. Chayrayku chay cheqaqa kunankama Gilgal nisqa sutiyoj kashan.

¹⁰ Israelitakunaqa Gilgalpi jarakorqanku, chantá chay killapi chunka tawayoj p'unchay ch'isiyaytataj, Jericó pampapi Pascua raymita ruwarqanku.

¹¹ Q'ayantintaj chay jallp'api poqojmantaña mikhorqanku, mana levadurayoj t'antata chantá trigo jank'atawan ima.

¹² Chaymantapacha Maná nisqa manaña karqachu. Israelitakunaqa Canaán suyupi poqojllataña chay watapi mikhorqanku.

Josueqa Tata Diospa soldadonkunata kamachejwan parlan

¹³ Uj kuti, Josueqa Jericó qayllapi kashaspa, ñawpaqenpi uj runata espada jap'irisqata rikorqa. Josuetaj qayllaykuspa, taporqa: Qanqa noqaykojmantachu kanki, chayrí awqaykojmantachu? nispa.

¹⁴ Chay runataj nerqa: Ni mayqenmanta, noqaqa Tata Diospa soldadonkunata kamachej jina jamuni, nispa. Chantá Josueqa pampakama k'umuykuspa, taporqa: Imatataj kunan Tata Dios kamachiyta munashawanri? nispa.

¹⁵ Tata Diospa soldadonkunata kamachejtaj nerqa: Juk'utaykita lluch'ukuy, imaraykuchus maypichus kashanki chayqa, Diospaj T'aqasqa Cheqamin, nispa. Josuetaj kasuspa, kikinta ruwarqa.