Josué 3 - DIOSPA QHELQACHISQ

Israelitakuna Jordán mayuta chimpanku

¹ Q'ayantin paqarin tutamanta jatarispa, Josuewan, chantá tukuynin israelitakunawan Sitinmanta purirerqanku. Jordán mayu kantuman chayaspataj, manaraj mayuta chimpashaspa, chaypi jarakorqanku.

² Kinsa p'unchaymantaj kurajkunaqa tukuynin jarakunata muyorqanku.

³ Chantá israelitakunata kay jinata kamacherqanku: Maypachachus Tata Diosninchejpa arcanta sacerdotekunata apashajta rikunkichej chaypacha, maypichá kashankichej, chaymanta llojsimuychej, qhepantataj puririychej.

⁴ Ajinapi yachankichej maynintachus rinaykichejta, imaraykuchus qankunaqa mana jayk'ajpis chay ñanta purerqankichejchu. Chaywanpis ama arcaman anchata qayllankichejchu. Uj kilometrota jinalla qhepanta rinkichej, nispa.

⁵ Josuetaj israelitakunata nerqa: Llimphuchakuychej, imaraykuchus Tata Diosqa q'aya qankuna ukhupi t'ukunapaj jina ruwanqa, nispa.

⁶ Sacerdotekunamanpis Josué nillarqataj: Qankuna Diospa trato ruwasqan arcata lijraykukuspa, apaychej, chantá runakunaj ñawpaqenkuta puririychej, nispa. Sacerdotekunataj Diospa trato ruwasqan arcata lijrariykukuspa, runakunaj ñawpaqenkuta rerqanku.

⁷ Chantá Tata Dios Josueta nerqa: Kunan p'unchaymantapacha israelitakunajpa ñawpaqenkupi jatun respetowan qhawanaman tukuchisqayki. Ajinapi paykuna yachanqanku noqaqa qanwanpuni kashasqayta, imaynatachus Moiseswan karqani, jinata.

⁸ Qan kamachiy ari sacerdotekunata Diospa trato ruwasqan arcata apanankuta, chantá Jordán mayuman chayaytawan, yaku kantupi sayanankuta, nispa.

⁹ Chantá Josueqa israelitakunata nerqa: Qayllamuychej, Tata Diosniykichejpa nisqanta uyarinaykichejpaj.

¹⁰ Kawsaj Dios qankunawan kashasqanta kay jinamanta yachankichej: Risqaykichejman jina cananeokunata, jititakunata, heveokunata, ferezeokunata, gergeseokunata, amorreokunata, chantá jebuseokunata ima, paymin ñawpaqeykichejmanta wijch'onqa.

¹¹ Qhawaychej, Tata Diospa trato ruwasqan arcaqa Jordán mayuta ñawpaqeykichejta chimpanqa.

¹² Chayrayku kunanqa ajllaychej ari Israel ayllukunamanta chunka iskayniyoj qharikunata, sapa jatun ayllumanta ujta.

¹³ Tukuy kay pachata kamachej Tata Diospa arcanta apashaj sacerdotekuna Jordán mayupi yakuman saruykojtinkukama, yakoqa iskayman t'aqakonqa. Patamanta jamoj yakoqa qochayaspa jina kikinpi sayanqa, nispa.

¹⁴ Chantá israelitakunaqa Jordán mayuta chimpanankupaj tukuyninku toldonkuta phaskaspa purirerqanku. Ñawpaqenkutataj sacerdotekuna Tata Diospa trato ruwasqan arca lijrarisqa rerqanku.

¹⁵ Jordán mayu yakoqa sapa chajra oqharina tiempota wasaykuyta yachajpuni. Chaywanpis sacerdotekuna mayuman chayaspa, yaku kantuman saruykusqankutawan,

¹⁶ patanejmanta jamoj yakoqa kikinpi sayarqa, Adán nisqa llajtamanta Saretán nisqa llajtakama. Uraman p'itikoj yakutaj tukukunankama Wañusqa Qochaman urayk'orqa. Ajinata yakoqa mayupi iskayman t'aqarpayakorqa, israelitakunataj Jericó llajtanejman chayninta chimparqanku.

¹⁷ Tukuynin israelitakunaqa Jordán mayuta ch'aki pampata jina chimparqanku. Tata Diospa trato ruwasqan arcata apaj sacerdotekunataj tukuy chimpanankukama mayu chawpipi ch'aki pampapi jina sayarqanku.