Josué 17 - DIOSPA QHELQACHISQ

Manasés jatun aylloj jap'isqan jallp'a

¹ Jinallataj Joséj kuraj kaj churin Manasespa jatun ayllunpajñataj suerteta choqarqanku. Manasespa kuraj kaj churenqa Maquir karqa, paytaj sumajta maqanakoj runa karqa. Maquirqa Galaadpa tatan karqa, paypajtaj Galaad jap'iy, Basán suyuwan karqa.

² Chaymanta Manasespa wakin churinkunapajñataj suerteta choqarqanku, mashkhachus kasqankuman jina, chaytaj kay jina karqa: Abiezerpa churinkunapaj, Jelecpa, Asrielpa, Sichempa, Jeferpa, chantá Semidaj churinkunapaj ima. Chaykuna Manasespa churinkuna chantá Joséj allchhinkuna ima karqanku.

³ Selofejadqa Jeferpa churin karqa, Galaadpa allchhin, Galaadtaj Maquirpa churin Manasespa allchhin karqa. Paypata mana qhari wawankuna karqachu, manachayqa warmi wawakunalla, sutinkutaj karqa: Malá, Nogá, Joglá, Milca, Tirsa ima.

⁴ Paykunataj Eleazar sacerdoteman, Nunpa churin Josueman chantá kurajkunaman ima rispa, nerqanku: Tata Dios Moisesman kamacherqa aylluykuwan khuska noqaykuman jallp'ata qonawaykuta, nispa. Josuetaj Tata Diospa nisqanman jina tatankoj ayllunpa jallp'an ukhupi paykunamanpis jallp'ata qollarqataj.

⁵ Ajinata Manasés jatun aylloqa chunka suyutawan jap'erqa. Chantá Jordán Mayoj inti llojsimuynej chimpapi Galaad jap'iyta, Basán suyuta ima jap'illarqataj.

⁶ Manasespa ususinkunaqa qharikunawan khuska jallp'ata jap'erqanku. Galaad jap'iypi jallp'aqa Manasespa wakin churinkunapaj karqa.

⁷ Manasés jatun aylloj jallp'anqa Aser jatun aylloj jap'iyninmanta Micmetatkama karqa, chaytaj Sichem nisqa chimpanpi karqa. Uraynejmantaj jap'iynenqa Tapuajpi tiyakojkunaj jap'iyninkukama karqa.

⁸ Tapuaj jap'iy Manasespata karqa chaypis, llajtaqa Efraín jatun ayllojta karqa, Manasés jatun aylloj jap'iyninpa mojón qayllapi kashajtinpis.

⁹ Chay mojonqa uraynejman Caná wayq'okama karqa. Efrainpa llajtankunaqa, Manasespa llajtankunawan khuskallataj karqa. Manasespa mojonnenqa Caná wayq'oj wichaynejta mama qochakama llojsishan, chaynintin karqa.

¹⁰ Efraín jatun ayllojtaqa wayq'omanta uraynejman karqa, Manasespatataj wayq'omanta wichaynejman, mojonninkutaj Jatun Mama Qocha karqa. Wichaynejman mojonqa Aser jatun aylloj jap'iyninwan tinkorqa, inti llojsimuynejmantaj Isacarpa jap'iyninwan tinkorqa.

¹¹ Isacarpa jap'iynin ukhupi chantá Aser jatun aylloj jap'iynin ukhupi ima, Manasés jatun ayllojta llajtakuna, chantá juch'uy llajtakuna ima kallarqataj. Kaykuna karqanku: Bet Seán, Ibleam, Dor, Endor, Tanac chantá Meguido ima. Kinsa kaj llajtaqa Nafot karqa.

¹² Chaywanpis Manasés jatun ayllumanta kajkunaqa chaypi tiyakojkunata mana wijch'uyta aterqankuchu, imaraykuchus cananeokunaqa mana llojsiyta munarqankuchu.

¹³ Aswan qhepamantaj israelitakunaqa kallpachakuspa cananeokunata sinch'i ruwanaman churarqanku. Chaywanpis manapuni chay jallp'amanta paykunata wijch'uyta aterqankuchu.

Joséj jatun ayllunmanta kajkuna astawan jallp'ata munanku

¹⁴ Uj kuti Joséj mirayninmanta kajkuna Josueta nerqanku: Imajtintaj suerteta choqaspa jallp'ata uj cheqallapi qowaykuri, noqayku Tata Diospa yanapasqanwan may chhika kashajtiykuri? nispa.

¹⁵ Josuetaj kuticherqa: Sichus qankuna ashkha kankichej, jallp'aykichejtaj pisi chayqa, ferezeokunaj jap'iyninkuman chantá refaitakunaj jap'iyninkuman yaykuspa, monteta chaqomuychej ari, nispa.

¹⁶ Paykunatajrí nerqanku: Arí, Efraín jap'iypi orqorara cheqaqa cheqamanta mana tukuyniykupaj wakinchu. Chaywanpis pampakunapi tiyakoj cananeokunaqa fierromanta carretakunayoj kanku, jinallataj Bet Seanpi chantá Jezrel vallepi tiyajkunajtapis, nispa.

¹⁷ Josuetaj Joséj mirayninmanta kajkunaman Efraín jatun aylluman, Manasés jatun aylluman ima nerqa: Qankunaqa cheqamanta ashkha kankichej, kallpayojkunataj, chayrayku qankunapajqa mana uj chhika jallp'allachu kanan tiyan.

¹⁸ Chay sach'arara orqokunantin qankunajta kanan tiyan. Chay monteta chaqospa, jallp'ata jap'ikapuychej. Chaypi tiyakoj cananeokunataqa qankuna wijch'unkichej. Mana imananchu fierro carretakunayoj kasqankoqa, nitaj may jina kallpayoj kasqankupis, nispa.