Job 9 - DIOSPA QHELQACHISQ

Job Bildadman kutichin

¹ Chantá Job kutichispa, nerqa:

² Noqa allinta yachani chayqa ajinapuni kasqanta. Runaqa mana niyta atinchu Diospa ñawpaqenpi llimphu kasqanta.

³ Sichus pillapis Dioswan churanakuyta munanman chayqa, Tata Dios waranqa kutita tapusqanman mana ujllatapis kutichiyta atinmanchu.

⁴ Diosqa may yachayniyoj, may atiyniyojtaj. Pitaj Diosman sayaykuspa, llimphu llojsiyta suyanmanri?

⁵ Diosqa k'arajta phiñakuspa orqokunata kuyurichin, urmachintaj, nitaj pipis reparanchu.

⁶ Payqa jallp'ata thalarin, jallp'aj tijsinkunatapis kharkatichin.

⁷ Diosqa intita mana llojsimunanta kamachin, jinallataj ch'askakunatapis mana lliphipinankuta.

⁸ Pay sapallan janajta toldota jina aysarqa, mama qochaj qhollchoqeyasqan patapitaj purin.

⁹ Paymin tukuy ch'askakunata ruwarqa, t'aqa t'aqapitaj t'aqararqa Llama Ñawi sutiyoj ch'askakunata, Orión sutiyoj ch'askakunata, Cabrilla sutiyoj ch'askakunata ima. Chantá uranejpi Cruz nisqa ch'askakunatawan ima ruwallarqataj.

¹⁰ Payqa may jinata t'ukunapaj jina imatapis ruwan, imatachus ruwasqantaqa mana pipis yachayta atinmanchu.

¹¹ Sichus Dios ñawpaqeyta pasanman chayqa, noqaqa mana rikuyta atisajchu. Pay pasanqa, noqatajrí mana reparasajchu.

¹² Sichus imatapis jap'ikapun chayqa, pitaj mañakapuyta atinmanri? Pitaj imatachus ruwasqanmanta cuentata mañanmanri?

¹³ Sichus Dios phiñakun chayqa, phiñakuynin mana usqhayta tiyaykuyta atinchu. Chakin urapi k'umuykuchisqa kanqanku, pikunachus Rajabta yanapajkuna.

¹⁴ Imaynatataj imatachus ninayta tariyman, Dioswan churanakunaypajri?

¹⁵ Mana juchayoj kayman chaypis, noqaqa mana kutichikuyta atiymanchu. Payqa juezniy, chayraykutaj paymanta khuyarikunallawanta mañarikuyta atiyman.

¹⁶ Sichus payta wajyajtiy jamunman chayqa, mana yuyaymanchu nisqayta pay uyarinawanta.

¹⁷ Payqa ñak'ariykunata sinch'i parata jina kachaykamuwan, mana imallamanta astawanraj nanaykuchiwan.

¹⁸ Astawan sinch'i llakiykunawan junt'aykuchiwanman, ni samarikojllatapis saqewanmanchu.

¹⁹ Sichus atiyninmanta parlasunman chayqa, cheqapuni payqa sinch'i atiyniyoj. Sichus quejaykusunman chayqa, pitaj payta chayachimunmanri?

²⁰ Sichus noqa niyman mana juchayoj kasqayta chayqa, simillaytaj juchachaykuwanman. Sichus cheqan kasqayta niyman chaypis, chay nisqallaytaj juchayoj kasqayta rikhurichiwanman.

²¹ Noqaqa mana juchayojchu kani, chaywanpis chayqa mana imananchu. Noqarí kawsaspa sayk'uniña.

²² Tukuy imapis pachallan kashan. Kayta noqaqa yuyani: Juchayojta, mana juchayojta Diosqa tukuchin.

²³ Sichus mana juchayoj runakuna mana yuyasqallamanta ima pasajtin wañunku chayqa, mana imatapis ruwayta atisqankumanta Diosqa asikun.

²⁴ Kay pachata millayta ruwajkunaj makinkuman saqen, juezkunaj ñawinkutataj wisq'aykun. Sichus chayta mana Dioschu ruwan chayqa, pitaj ruwanri?

²⁵ Kawsayneyqa imata jina phawan, kusiy kawsay imachus kasqanta mana rikuspalla.

²⁶ Kawsayneyqa mama qochapi t'uturamanta ruwasqa phawaj bote jina ripushan, anka imatapis jap'ej phawaykun, ajinata.

²⁷ Sichus llakiyniyta qonqaj churakuyman, sitajchus kusisqapis kayman jina puriyman chayqa,

²⁸ tukuy nanayniy watej mancharichiwanman. Noqa yachakuni Diosqa juchayojta jina qhawawasqanta.

²⁹ Sichus Dios juchayoj kasqayta qhawawan chayqa, imapajtaj imatapis ruwasajri?

³⁰ Ushpha yakuwanpis ukhuyta khitukuyman, jabonwanpis makiyta mayllakuyman.

³¹ Ajinata ruwashajtiypis, Diosqa q'opaman wijch'uwanman, p'achaypis noqamanta millachikuwanman.

³² Dioswanqa mana uj runawan jina uyanchanakuymanchu, nitaj niyta atiymanchu: Jaku, justicia ruwana wasiman rinachej, nispa.

³³ Walej kanman noqayku ukhupi justiciata ruwaj kanan, paypa ñawpaqenpi quejaykuta ch'uwachanaykupaj.

³⁴ Payqa Tata Dios jasut'inawanmanta jark'akuwanman, nitaj Dios manchachinawanta saqenmanchu.

³⁵ Chaypacha noqaqa payta mana manchachikuspa parlarikuyman. Chaywanpis kunan manchachikuni, nispa.