Job 7 - DIOSPA QHELQACHISQ

¹ Kay pachapi runaj kawsaynenqa uj soldado imachus ruwananta junt'ajpata jinalla.

² Uj wata runa llanthumanta imata jina wañurin, llank'aj runapis pagonta jap'iyta mayta suyan. Ajina runaj kawsaynenqa.

³ Noqaqa killan killanta yanqha manakajta suyakuspa kawsarqani. Sapa ch'isi ñak'arispa karqani.

⁴ Noqaqa puñukapuni, tutataj mana sut'iyayta atinchu. Sut'iyanankama kayman jaqayman tijraykachakuspa sayk'uni, sonqoypitaj nini: Mayk'ajtaj sut'iyanqari? nispa.

⁵ Ukhoyqa khuru junt'a, sarnallataj, tukuy ukhuymanta q'eyalla surushan.

⁶ Kawsayniypa tukukuynenqa awana lanzadera jina phawashan, manaña ima allin kajpis noqapaj kananta suyashanichu.

Job Diosta tapun

⁷ Yuyarikuy ari, Diosníy, kawsayneyqa samay jinalla kasqanta, manañásina kusiy kawsayta rikusajchu.

⁸ Pikunachus kunan rikushawanku, chaykunaqa manaña jayk'ajpis rikuwanqankuchu. Qan qhawawajtiykikama, manaña kasajchu.

⁹ Imaynatachus phuyu chinkapullan, ajinata pillapis wañuspaqa, mana ujtawan kutirimonqañachu.

¹⁰ Wañojqa manaña wasinman kutinñachu, llajtanpitaj ni pipis paymanta yuyarikonqañachu.

¹¹ Chayrayku mana ch'in kakuyta atinichu. Nanayniypi, llakiyniypitaj kaspa, atisqayta quejakusaj.

¹² Noqaqa mama qochapi sierpechu kasqani, ñawillaykipi purichinawaykipaj?

¹³ Noqaqa puñunaypichari samariyta tarisaj, puñuspachari chay jina llakiyniyta qonqasaj, nispa nerqani.

¹⁴ Qantajrí puñushajtiy, manchachiwanki, tukuy imaymanata mosqoypi rikuchiwaspa, musphachiwanki.

¹⁵ Q'allpiwaspa wañuchinawayki allin kanman, kay jinata ñak'arinaymantaqa wañupullaytaña munayman.

¹⁶ Manaña atinichu, nitaj kawsaytapis munaniñachu. Saqellawayña, imaraykuchus kawsayneyqa samay jinalla.

¹⁷ Imataj runa kasqa payta jatunchaspa paymanta chay jinatapuni llakinaykipajri?

¹⁸ Imaraykutaj sapa p'unchay wateqanki, sapa kutitaj watunkiri?

¹⁹ Mayk'ajkamataj ñawillaykipi purichiwanki, manataj thoqaynillaytapis pasaykuchejta saqewankichuri?

²⁰ Runakunata qhawaj Dios, sichus juchallikuni chayqa, ima mana allintataj ruwaykiri? Imaraykutaj noqawan jap'inakuwankiri? Imaraykutaj llasa q'epita jina qhawawankiri?

²¹ Manachu juchayta pampachawankiman? Manachu mana allin ruwasqaytapis pampachallawajtaj? Noqaqa ñapis jallp'aj sonqonman yaykupusajña. Mask'awanki, noqataj manaña kasajchu, nispa.