Job 6 - DIOSPA QHELQACHISQ

Job Elifazman kutichin

¹ Chantá Job kutichispa, nerqa:

² Sichus ñak'arisqay pesapi pesasqa kanman, sitajchus llakiyniyta balanzaman churayman chayqa,

³ Mama qochapi t'iyumanta astawan pesanman. Chayrayku imatapis parlarparillani.

⁴ Tukuy Atiyniyoj Dios arcowan flechanta kacharispa, jap'ichiwan, chay flechaj venenontaj tukuy ukhuyman junt'aykun. Diosqa tukuy imaymana llakiykunawan seq'owan.

⁵ Burroqa mikhuna patapi kashaspa, waqanchu? Toropis q'achu patapi kashaspa, bujarinchu?

⁶ Mana kachiyoj mikhunata pipis mikhunmanchu? Runtoj yurajnenqa mana kachiyoj sumajchu?

⁷ Ima mikhunatachus mana mikhuyta munajchu kani, chaymin kunan mikhunayqa.

⁸ Allin kanman sichus Dios imatachus mañakusqayta qowanman chayqa. Ima sumajchus kanman, imatachus munasqayta jaywawanman chayqa.

⁹ Allin kanman Dios ujkama ñat'urparinawan. Ima sumajchus kanman Dios wañuchiwanman chayqa.

¹⁰ May jinatapis nanashawachun. Sichus kunanpacha wañupuyman chayqa, allin kanman, imaraykuchus noqaqa Diospa munasqanta ruwani.

¹¹ Suyanaypaj manaña kallpay kanchu, kawsanaypaj jina manaña imapis kanchu.

¹² Noqaqa rumi jina sinch'ichu kani? Aychayqa broncemantachu?

¹³ Noqa kikiymanta mana imatapis ruwayta atinichu, nitaj pipis yanapariwaj kanchu.

¹⁴ Ñak'arej kawsaqetaqa sonqochaykuna, Tukuy Atiyniyoj Diosmanta qonqakapojtinpis.

¹⁵ Qankuna wawqeykunarí sonqoyta p'akiykuwankichej, mayuta wasaykoj yaku jina kankichej.

¹⁶ Qonchu yakoqa urayk'amun, chhullunkawan, rit'iwan ima chhapusqa.

¹⁷ Q'oñi tiempo chayamojtinrí, mayu ch'akipun, sinch'i ruphay kasqanraykutaj yaku chinkapun.

¹⁸ Ñan purej runakunaqa yakuta mask'aspa, ñanmanta pantaykunku, ch'innejpitaj chinkapunku.

¹⁹ Temanmanta qhatuwan purejkunaqa yakuta mask'anku, Sabamanta kajkunataj yaku tariyta suyanku.

²⁰ Chayman chayaspataj, ch'aki mayullata tarinku. Yaku tariyta suyasqankoqa qhasi manakajlla kasqanta rikunku.

²¹ Qankunaqa noqapaj chay jina kankichej. Qankuna ñak'arisqayta rikuspa, manchachikunkichej.

²² Noqaqa mana imaykichejtapis mañakuykichejchu, nitaj qolqeykichejta jaywanawaykichejta nerqaykichejchu, kacharichisqa kanaypaj.

²³ Awqaymantapis preciota pagaspa kacharichiwaychej nerqaykichejchu? Chayrí, sajra runakunaj makinkumantapis qhespichinawaykichejta nerqaykichejchu?

²⁴ Yachachiwaychej, noqataj ch'inmanta uyarisqaykichej. Rikuchiwaychej imapichus pantasqayta.

²⁵ Maychus kajta parlasqataqa mana pipis ninmanchu mana allinchu kasqanta. Qankunarí manakajmanta juchachashawankichej.

²⁶ Qankunaqa parlasqaymanta rimankichej, parlasqaytaqa wayralla apakapun.

²⁷ Qankunaqa wajcha runatapis venderpariwajchejsina. Qankunaqa kawsaqeykichejta p'ampaykunaykichejpaj t'oqotapis allawajchejsina.

²⁸ Kunanqa uyayta qhawariwaychej, niwaychejtaj sichus llullakushasqayta.

²⁹ Parlasqaykichejmanta kutiriychej, ama qhasimanta juchachawaychejchu. Cheqanta parlasqayta rimariychej.

³⁰ Noqaqa mana llullakuspachu parlani. Allin mana allin kajtapis manachu reparayta atini?