Job 5 - DIOSPA QHELQACHISQ

Elifaz parlallanpuni

¹ Kunanqa Job, qhaparikuy. Pitaj uyarimusonqari? Mayqen angelmantaj qayllaykunkiri?

² Cheqapuni wamputaqa sinch'i phiñakuy wañuchin. Pichus payllapaj imatapis munajtaqa envidia tukuchin.

³ Noqa rikuni wampu imaynatachus runayasqanta. Chaywanpis wasenqa usqhayllata thuñisqa karqa.

⁴ Wawankunata mana pipis yanaparej kanchu. Justicia ruwana wasipeqa mana allintachu paykunata qhawarinku, nitaj pipis paykunata jark'akoj kanchu.

⁵ Poqochisqankutaqa yarqhachikojkuna mikhukapunku. Khishka ukhumantapis pallakapunku. Kapuynintataj tukuy ch'akichikojkuna tukuykonqanku.

⁶ Millayta ruwanaqa mana jallp'amantachu p'utumun, nitaj llakiykunapis pampamantachu llojsimun.

⁷ Imaynatachus nina k'ajay phawan, ajinallataj runaqa phutiykunata jatarichin.

⁸ Qan kaspaqa, noqa Diosman qayllaykuyman, imachus phutichishawasqantataj payman willakuyman.

⁹ Payqa jatuchaj imakunata, musphay t'ukunatawan ruwan, chaykunatataj mana pipis yupayta atinmanchu.

¹⁰ Diosqa parata kay jallp'a pataman parachimun, chaywantaj tukuy jallp'ata qarpan.

¹¹ Payqa llamp'u sonqoyojkunata pataman oqharin, llakiyniyojkunatataj sonqochan.

¹² Millay yuyayniyojkunaj yuyasqankuta manakajman tukuchin, imatachus ruwasqanku ama allin rinanpaj.

¹³ Payqa millay yuyayniyojkunata sajra yuyaynillankuwantaj ch'ipaykun. Millayta ruwanankupaj wakichisqankutataj manakajman tukuchin.

¹⁴ Paykunaqa p'unchaypacha laqhapi jina purinku, chawpi p'unchaypi tutapi jina thamaykachanku.

¹⁵ Diosqa wajcha runata, ñak'arichisqa kajta ima kacharichin, millayta ruwajkunaj makinkumanta.

¹⁶ Paymanta jap'ikuspa pisi kallpayojkunaqa allin kajta suyayta atinku, payllataj millayta ruwajkunaj siminkuta llup'aykun.

¹⁷ Pi runatachus Tata Dios cheqan ñanman churayta munaspa k'amin, chaymin kusisqa. Chayrayku qanqa Tukuy Atiyniyoj Tata Dios k'amisusqanta ama qhesachaychu.

¹⁸ Sichus pay runaj ukhunta nanaykuchin chayqa, payllataj jampenqa. Sichus runata onqochin chayqa, payllataj thañichenqa.

¹⁹ Ashkha kutita jatun llakiymanta orqhosonqa, mana allin kajtaj qanman mana chayamusonqachu.

²⁰ Yarqhay tiempopi wañunamanta qhespichisonqa, maqanaku tiempopitaj wañuchisqa kanaykimanta waqaychasonqa.

²¹ Millayta parlaj runamanta waqaychasonqa. Manchay llakiy chayamojtintaj, qanqa mana manchachikunkichu.

²² Yarqhay kajtin, mana allin kajtinpis asikunki. K'ita phiña animalkunamantapis mana manchachikunkichu.

²³ Jallp'ayki rumiraralla kajtinpis, chajra poqonanta mana jark'anqachu, k'ita animalkunapis kawsaqeykikuna kanqanku.

²⁴ Wasiykipi mana imamanta llakiyniyoj kawsakunki. Uywaykikunata waturikunki chayqa, mana ujpis faltanqachu.

²⁵ Wawaykikunaqa ashkhapuni kanqanku, campopi qhora chhikapuni.

²⁶ Unayta kawsaspa, kallpallaykipiraj wañupunki, sumaj poqosqa trigo marq'a jina.

²⁷ Kay tukuyta waturispa, jinapuni kasqanta yachayku. Kayta uyariwasqayku chayqa, qan kikiyki waturiyta atinki, nispa. Ajinata Elifaz nerqa.