Job 4 - DIOSPA QHELQACHISQ

Elifaz Jobta k'amin

¹ Chantá Temanmanta Elifaz kay jinata nerqa:

² Job, kunan imatachus nisusqay, ichapis mana allinchu rijch'asonqa. Chaywanpis mana ch'inlla kakuyta atinichu.

³ Qanqa ashkha runaman yachachej kanki, pisi kallpayojkunatapis kallpachaj kanki.

⁴ Pichus urmajtaqa parlapayaspa, sayarichej kanki, urmanayajtapis jap'iykurej kanki.

⁵ Kunan llakiyta ñak'arinayki qanman chayamusojtinrí, q'enaqakushanki. Llakiykunaj ñit'isqan kaspa, sonqo p'akisqa kashanki.

⁶ Qanqa Diospa sumaj kamachin kanki, cheqanta purej runa. Chantá imaraykutaj Diosmanta mana tukuy sonqo jap'ikunkichuri?

⁷ Yuyaycharikuy ari: Pitaj mana juchayoj kashaspa, chinkaporqari? Mayk'ajtaj cheqanta purej runa chinkachisqa karqari?

⁸ Noqaqa kayta rikuspa parlani: Pikunachus millay ruwanata tarpojkunaqa chayllatataj oqharinku.

⁹ Diosqa chay jina runata samaynillanwan wañuchin, sinch'i phiñakuyninwantaj ujkama tukuchin.

¹⁰ León jina may jinata qhaparishajtinkupis, Diosqa kirunkuta p'akiykuspa, ch'inyachenqa.

¹¹ Machu leonqa manaña imatapis jap'iyta atispa, yarqhaymanta wañun. China leonpa uñankunapis tukuynejman ch'eqerapunku.

¹² Mana pejpa yachasqallan willawarqanku, ninriytaj ayphullata parlajta uyarerqa.

¹³ Ch'isin tukuy runakuna misk'ita puñushajtinku, mosqokuspa mancharinapaj jina muspharqani.

¹⁴ Chay ch'isi manchay manchachikuy jap'iwarqa, tukuy tulluypis kharkatitirerqa.

¹⁵ Wayra jinalla uyayta phukuspa, pasarpawarqa. Ukhuypi chujchapis sayarirerqa.

¹⁶ Ñawpaqeypi runapis kanman jina sayarqa. Uyanta mana rikuyta aterqanichu chaypis, chhichispa parlasqanta uyarerqani:

¹⁷ Diospa ñawpaqenpi cheqan runa kanmanchu? Runaqa ruwajninpa ñawpaqenpi llimphu kayta atinmanchu?

¹⁸ Diosqa sirvejninkunapi mana atinikunchu, angelninkunajtapis pantasqankuta tarin.

¹⁹ Jina chayqa, imaynatataj Diosqa pisi kallpa runapi atinikonqari? Runaqa t'urumanta ruwasqa wasi jinallamin, thuta jinalla sarurparisqa kanqa.

²⁰ Runaqa tutamanta ch'isiyaykamalla chinkachisqa rikhurin. Wañojtenqa, mana pipis paymanta yuyarikunñachu.

²¹ Runaj kawsaynenqa p'itikoj q'aytu jinata tukukun. Manaraj yuyayniyoj, yachayniyoj ima kashaspa, wañupun.