Job 30 - DIOSPA QHELQACHISQ

Job sonqo nanaylla kashasqanmanta llakikun

¹ Kunanrí noqamanta aswan waynakuna asikuwanku. Noqaqa paykunaj tatankuta mana jap'iymanchu karqa, uywayta qhawaj alqokunata qhawanallankupajpis.

² Paykunaqa mana imapipis yanapawankumanchu karqa, pisi kallpayoj runakuna kasqankurayku.

³ Mana imayoj kaspa, yarqhaymanta ima, tutan ch'innejpi, ch'aki saphita khashkaj kanku.

⁴ Ch'umi ukhumanta qhorata pallakoj kanku, retamaj saphintataj mikhoj kanku.

⁵ Paykunaqa tukuy runaj chejnisqan karqanku, suwata jina qhaparispa qhatiykachasqantaj.

⁶ Chayrayku paykunaqa qaqa jusk'ukunapi tiyakoj kanku, wakintaj wayq'opi, chhanka jusk'upi ima.

⁷ Ch'umi ukhupi qhaparispa purej kanku, khishkarara sach'a urapitaj tantakoj kanku.

⁸ Paykunaqa ni imapaj walej runakuna kanku, ni piniyoj. Millay runa kasqankurayku mana llajtankupi kawsanankupaj jinachu karqanku.

⁹ Kunanqa paykunaj alqochakunanku kani, paykunaj asikunankutaj.

¹⁰ Noqata millachikuwaspa karunchakunku, uyaypipis thoqaykuwanku.

¹¹ Kunanqa Tata Dios kay jinata k'umuykuchiwasqanrayku, chantá wijch'urpariwasqanrayku, manaña respetowanchu qhawawanku.

¹² Qayllayman may chhika tantaykakamuspa, urmachiwanku, maqanawankupaj qhawawaspataj, wañuchiwayta munanku.

¹³ Chinkachiwayta munaspa, purinayta wisq'aykunku, nitaj pipis paykunata sayachej kanchu.

¹⁴ Perqapi q'asanta junt'aykamunku, tukuy kallpankuwan mancharinapaj jina patayman phawaykamuwanku.

¹⁵ Sinch'i mancharisqa kashani. Maypaj qhawasqa kasqayqa wayra jina ripun, qhapajyasqaypis phuyu jina chinkapun.

¹⁶ Manaña kawsayta munaniñachu. Ñak'ariywan ñit'isqa kani.

¹⁷ Nanayqa tulluykama chayan, ch'isintaj mana samariyta ñak'arichiwan.

¹⁸ Diosqa ujllata kunkaymanta jap'iwan, tukuy kallpanwantaj p'achaymanta thalawan.

¹⁹ Pampaman wijch'uwan, jallp'apis, chayrí ushphapis kayman jina.

²⁰ Diosníy yanapanawaykita mañarikuyki, manataj uyariwankichu. Qanman k'umuykamuyki, nitaj qhawarillawankipischu.

²¹ Qanqa noqapaj mana sonqoyojman tukunki, tukuy atiyniykiwantaj qhatiykachawanki.

²² Qanqa wayrawan apachiwanki, para wayrawantaj thalachiwanki.

²³ Noqa yachakuni wañuyman apashawasqaykita, tukuy wañojkuna maymanchus rinanku kashan, chayman.

²⁴ Noqaqa manachu pisichikojta yanaparqani, khuyayllata kawsananmanta orqhospa?

²⁵ Manachu noqaqa pichus llakiypi kashajmanta waqarqani? Manatajchu wajchakunamantapis khuyakorqani?

²⁶ Allin kajta suyashajtiy, mana allin kajlla jamuwan, kusiy kawsayta suyashajtiytaj, llakiylla chayamuwan.

²⁷ Sonqoyqa phatanayashanña, nitaj samarikunchu. Llakiylla noqata suyashawan.

²⁸ May llakisqa kashani, phuyusqa p'unchay jina. Tukuypa uyarinanta yanapanawankuta mañakuni.

²⁹ K'ita alqokunaj wawqenku jina kani, surikunaj kawsaqenku jinataj.

³⁰ Aycha qaraypis yanaman tukun, tukuy ukhuytaj k'aja onqoywan lawrarishan.

³¹ Arpaj waqasqan, qenaj waqasqan ima noqapajqa llakiy waqayman tukun, nispa.