Job 3 - DIOSPA QHELQACHISQ

Jobqa paqarisqan p'unchaymanta quejakun

¹ Chantá Job manaña kakuyta atispa, paqarisqan p'unchayta maldicispa, parlayta qallarerqa.

² Jatunmanta parlaspataj, nerqa:

Job

³ Yumawasqanku ch'isi qonqayman churasqa kachun, maldicisqa kachun: Qhari wawa kasqa, nispa nisqanku tutaqa.

⁴ Paqarisqay p'unchayqa laqhaman tukuchun. Janaj pachapi kaj Dios ama cuentaman churachunchu, chay p'unchaytaj intipis ama k'anchachunchu.

⁵ Chay p'unchayta tuti laqha p'ampaykuchun, chayrí laqhayarishaj yana phuyu qhataykuchun, chayrí inti onqospa, manchaykuchichun.

⁶ Chay ch'isita tuti laqhayay chinkachichun. Chay p'unchayqa ama yupasqachu kachun ni watapi, nitaj killa ukhupi.

⁷ Chay ch'isi ama pipis wijsallikunanchu karqa, nillataj chay ch'isi kusikuymanta qhaparina kanmanchu karqa.

⁸ Chay ch'isitaqa layqayta yachajkuna layqachunku, pikunachus mama qochapi kawsaj sierpeta rijch'arichinankupaj atiyniyoj kanku, chaykuna.

⁹ Sut'iyayta llojsej ch'askakuna chay paqarin ama k'anchachunkuchu, chay jina suyasqa k'anchayqa ama chayamuchunchu. Sut'iyarqamuyta intipis ama k'anchachunchu.

¹⁰ Maldicisqa kachun mamaypa wijsanmanta llojsimusqay tutaqa, kay jina llakiyta rikunaypaj paqarichiwasqanmanta.

¹¹ Imaraykutaj mamaypa wijsallanpiraj, mana wañorqanichuri? Imaraykutaj paqarikushaspa, mana wañorqanichuri?

¹² Imapajtaj mamitay arphinpi jap'iwarqari? Imapajtaj ñuñuntapis chuchuchiwarqari?

¹³ Chaypachachus wañupuyman karqa chayqa, kunan sumajta puñurikushayman karqa, sumaj misk'itataj samarikushayman karqa.

¹⁴ Kuraj kamachejkunawan, kamachejkunata yanapajkunawan ima samarikuyman karqa. Pikunajtachus p'ampakunankupaj sumaj aya p'ampanata ruwakusqankoqa raqayllaña kashan, chaykunawan samarikuyman karqa.

¹⁵ Chayrí kamachejkuna wasinkuman qorita, qolqetawan junt'achejkunawan khuska kayman karqa.

¹⁶ Imaraykutaj tatay mamay sullusqa wawata jina mana p'ampaykuwarqankuchuri, chayrí manaraj paqarishaspa wañusqa wawata jinari?

¹⁷ Jallp'aj sonqonpi millayta ruwajkunaqa manaña mana allinta ruwankuchu. Sayk'usqakunapis chaypi samarikuyta tarinku.

¹⁸ Presokunapis chaypi samariyta tarinku, jilaqataj qhaparisqantapis manaña uyarinkuchu.

¹⁹ Jallp'aj sonqonpeqa jatunpis, juch'uypis uj rejlla kanku. Wata runapis chaypeqa manaña patronninpa makinpichu.

²⁰ Imaraykutaj Tata Diosqa ñak'arej runata k'anchayta rikunanta saqellanri? Imaraykutaj may jina llakiyniyojtapis kawsachillanpuniri?

²¹ Wañupuyta suyajmanqa wañuypis mana chayanchu, qorita jina wañuyta mask'ashajtinpis.

²² Maypachachus jallp'aj sonqonman yaykun, chaypachallaña chay runapaj kusikuna chayamun.

²³ Diosqa mana rikuyta atejta jina purichin, purinanta tukuynejmanta wisq'aykun.

²⁴ Mikhunayqa jik'un jik'unta waqarikuylla, ujyanaypis nanaymanta ayqoylla.

²⁵ Imatachus manchachikoj kani, imatajchus manchayta manchachiwaj, chaypuni patayman urmaykamun.

²⁶ Sonqo tiyaykuyta mana tarinichu, nitaj samariytapis. Sonqo samariyta tarinaytaqa phutikuyllata tarini, nispa.