Job 2 - DIOSPA QHELQACHISQ

¹ Aswan qhepaman Diosta sirvej angelkuna tantakunanku p'unchay chayamojtin, Satanaspis paykunawan khuska Tata Diospa ñawpaqenman jamullarqataj.

² Chantá Tata Dios payta taporqa: Maymantataj jamushankiri? nispa. Ch'ataykoj angeltaj kuticherqa: Kay pachata muyumusqaymanta jamushani, nispa.

³ Chantá Tata Dios taporqa: Manachu kamachiy Jobta rikunki? Pay jinaqa jallp'a patapi mana pipis kanchu. Payqa noqaj kamachisqayta tukuy sonqo junt'an, cheqanta purisqanraykutaj mana imamanta k'amina, nitaj pitapis mana allinta ruwanchu. Qantajrí mana imallamanta payta ñak'arichinayta niwarqanki. Chaywanpis payqa kasuwaspallapuni purin, nispa.

⁴ Chantá ch'ataykoj ángel Tata Diosman kuticherqa: Runata imachus astawan nanan, mana chayta t'ojpinchejchu chayqa, tukuy imapis allillan. Qhalilla kawsananrayku runaqa imatapis ruwayta atin.

⁵ Sichus aychanta, tullunta ima onqochiwaj chayrí, uyarishajtiyki contraykita rimanqa. Kay rikullankipis, nispa.

⁶ Tata Diostajrí ch'ataykoj angelta nerqa: Jina kajtenqa, paywan munasqaykita ruway. Chaywanpis amapuni payta wañuchinkichu, nispa.

⁷ Chantá ch'ataykoj angelqa Tata Diospa ñawpaqenmanta ripuspa, Jobman sarnaman rijch'akoj onqoyta churarqa. Chay onqoytaj chakinmanta umankama junt'aykorqa.

⁸ Chantá Jobqa ushpha patapi tiyakuspa, uj k'anallawan khitukorqa, sarna onqoy anchata sejsisqanrayku.

⁹ Jinapi Jobpa warmin payta k'amispa, kay jinata nerqa: Kay jinata ñak'arishaspapis, qanqa Diosta mana wasanchaspallapunichu kanki? Diosta maldiciy, jinajtiykitaj Dios wañuchisonqa, nispa.

¹⁰ Jobtajrí kuticherqa: Mana yuyayniyoj warmi jina parlashanki. Sichus Tata Diosmanta allin kajta jap'inchej chayqa, manachu mana allin kajta apachimuwasqanchejtapis jap'ikullasunmantaj? nispa. Chay tukuywanpis Jobqa manapuni Diospa contranta parlaspa juchallerqachu.

Jobta kinsa kawsaqenkuna watukunku

¹¹ Jobpataqa kinsa kawsaqenkuna karqanku: Temán llajtamanta Elifaz, Súaj llajtamanta Bildad, chantá Namat llajtamanta Sofar ima. Paykunaqa Jobta chay jina manchay llakiykuna qhatirisqanta yachaspa, parlanarikorqanku, watukoj rispa sonqocharimunankuta.

¹² Job tiyakorqa, chaynejman chayaspataj, karullamantaraj ñak'ayllata Jobta rejserqanku. Chayrayku qhaparispa, waqarqanku, p'achankutapis llik'irakorqanku, jallp'atataj umankuman qhallirakorqanku.

¹³ Chaymantaqa Jobwan khuska pampapi qanchis p'unchayta, qanchis tutatawan tiyarqanku. Paykunaqa Jobta sonqo nanayta ñak'arishasqanta rikuspa, mana parlapayaykuyta aterqankuchu.