Job 18 - DIOSPA QHELQACHISQ

Bildad Jobpa nisqanman ujtawan kutichin

¹ Chantá Súa llajtayoj Bildad kutichispa, nerqa:

² Mayk'ajkamataj parlallankipuniri? Unanchariwaj, chaymantaraj parlarisunchej.

³ Imaraykutaj uywata jina qhawawaykuri? Imajtintaj pisipaj qhawana runakunata jina jap'iwaykuri?

⁴ Qan phiñakuspa mitharakusqaykirayku, yuyankichu kay pacha ch'inman tukunanta? Chayrí chhankakuna maypichus kashasqankumanta kuyurinankuta?

⁵ Millayta ruwajpa k'anchaynenqa wañuponqa, ninanpis manaña lawranqachu.

⁶ Lamparanqa wañuponqa, wasinpi k'anchaypis chharpuyaponqa.

⁷ Kallpanpi jina thaskisqan manaña ajinachu kanqa. Ima tojllatachus churasqallanpitaj urmanqa.

⁸ Payllataj purinanman uj tojllata churakonqa, chay tojllapitaj ch'ipasqa rikhurenqa.

⁹ Chakin chaynejman lazo churasqa kanqa, chay lazotaj chaki talonninta mat'iykonqa.

¹⁰ Tojlla churasqaqa ñanpi sumaj pakasqa kanqa, chayninta pasashajtin, jap'inanpaj.

¹¹ Tukuynejmanta jap'iykushankumanpis jina reparakun, sapa thaskisqallanpi qhatiykachasqa kasqanta reparakun.

¹² Yarqhaywan kallpanpis tukukaponqa. Ima llakiypis paypa patanman urmaykunanpaj jinalla kashan.

¹³ Onqoyqa pisimanta pisi ukhunta tukonqa, wañuytaj makinta, chakinta oqoykonqa.

¹⁴ Wasinpi ima munayta tiyakushajtin, wijch'usqa kanqa. Manchachikuy kuraj kamachejman payta qhatatenqanku.

¹⁵ Kikin wasinpi waj wasipipis tiyakushanman jina tiyakonqa. Wasin pataman jallp'a jina azufre t'akakonqa.

¹⁶ Chay runaqa llajtanmanta sach'a jina sik'isqa kanqa, manataj jayk'aj aylluyojchu kanqa.

¹⁷ Paymanta yuyarikunaqa kay pachamanta chinkachisqa kanqa. Manaña ujtawanpis sutinta oqharenqankuchu.

¹⁸ K'anchaymanta laqhayayman payta wijch'onqanku, kay pachamantataj payta qharqonqanku.

¹⁹ Llajtanpeqa mana mirayninpis kanqachu, nitaj pipis wasinpi kawsashaj qhepakonqachu.

²⁰ Imaynatachus tukukusqan inti yaykuynejpi tiyakojkunata mancharichenqa, inti llojsimuynejpi tiyakojkunatapis kharkatitichenqa.

²¹ Ajinata millayta ruwaspa purejpa kawsaynin tukukapun. Pichus Diosta pisipaj qhawajqa ajinata tukukaponqa, nispa.