Job 16 - DIOSPA QHELQACHISQ

Job Elifazman kutichin

¹ Chantá Job kutichispa, nerqa:

² Chay jinata parlajtaqa mashkha kutitachus uyarinipis. Qankuna sonqochanawaykichejtaqa astawan ñak'arichillawankichej.

³ Qhasi manakaj parlayqa jayk'ajtaj tukukonqari? Ajinata churanakuymanpuni yachasqa kankichej.

⁴ Sichus qankuna noqa jina kawajchej chayqa, noqapis qankuna jina parlayman, qankunaj contraykichejta sinch'ita parlayman. Umayta khiwirispa qankunata kusipayayman.

⁵ Noqachus qankuna jina kayman chayqa, kallpachaykichejman, misk'i simiwan parlapayaspataj, nanasqa sonqoykichejta thañirichiykichejman.

⁶ Parlarikuni chaypis, nanayneyqa mana thañinchu, nitaj ch'in kakojtiypis, nanayniy tukukunchu.

⁷ Diosqa kallpayta tukuchin. Tukuy kawsaqeykunatapis qhechuwan.

⁸ Payqa muyuykuwan. Noqaj contrayta parlaspa juchachawan, qhasi manakajta juchachawan.

⁹ Tata Diosqa qhatiykachawaspa, mithawan, león jina contrayta khamurarikun. Awqaypis kanman jina ñawinwan oqoykuwan.

¹⁰ Runakunaqa noqaj contrayta tantakunku, asiykukuwaspataj, umankuta khiwirinku. K'umuykuchinawankupaj uyaypi laq'awanku.

¹¹ Diosqa mana cheqanta ruwajkunaj makinkuman jaywaykuwan, millayta ruwajkunaj makinkumantaj wijch'uykuwan.

¹² Ni imamanta llakiyniyoj kawsakushajtiy, payqa kunkaymanta jap'iwarqa. Q'allpispa, phirita ruwawarqa, arconwan flechanawanpajtaj sayachiwarqa.

¹³ Tukuynejmanta flechamuwan, mana khuyariwaspa ukhuyta jusk'urawan, wijsaymanta kaj chhikataj pampaman qhallikun.

¹⁴ Patanpi patanpi ukhuyta khallarawan. Maqanakoj soldado jinataj noqaman phinkiykamuwan.

¹⁵ Llakisqa kasqayta rejsichinaypaj qhashqa p'achata churakorqani, jallp'atataj umayman qhallikorqani.

¹⁶ Waqasqaypi uyay punkiykuwan, ñawiypis laqhayaykuwan.

¹⁷ Mana pitapis kallpayman atinikuspa maqarqanichu, Diosmanta mañakusqaypis llimphu sonqowan karqa.

¹⁸ Jallp'a, ama yawarniyta pakaychu ari. Ama saqeychu qhaparikusqay ch'inyananta.

¹⁹ Noqamanta parlarejqa janaj pachapi kashan, patapi kajqa jark'akuwajniy kashan.

²⁰ Diospa ñawpaqenpi mana sonqochay atinata waqarikuni, imajtinchus kawsaqeykuna noqamanta asikuwanku.

²¹ Tata Dioswan siminakuyta munayman, imaynatachus runa masiywan siminakuni, ajinata.

²² Mashkha unaytawanchus kawsanayqa tukukapushanña, mana kutirimuyniyojta ñapis ripusajña, nispa.