Job 12 - DIOSPA QHELQACHISQ

Jobqa Sofarpa nisqanman kutichin

¹ Chantá Job kutichispa, nerqa:

² Cheqapuni qankunaqa tukuy runaj sutinkupi parlankichej. Wañojtiykichejqa, yachaypis qankunawan khuska wañullanqataj.

³ Chaywanpis qankuna jinallataj noqapis yachani, qankunamantaqa mana imapipis pisichu kani. Pitaj tukuy chaykunata mana yachanchuri?

⁴ Noqaqa mana juchayoj, nitaj k'amina jina kani. Ñawpa tiempopi Diosqa mañakusqayta uyariwaj, kunanrí kawsaqeykuna noqamanta asikuwanku.

⁵ Pichus allinpi kajqa mana allinpi kajta pisipaj qhawan, pichus urmaykunanpaj jinaña kajtaqa mana khuyakuspa tanqaykun.

⁶ Suwakunaqa wasinkupi allinpi kawsakunku, Diosta phiñachejkunapis ni imamanta manchachikuspa tiyakullankutaj, Diosta makinkupi apaykachasqankuta yuyaspa.

⁷ Animalkunata qhaway, paykunamantataj yachakuy, jinallataj phawajkunata qhaway, imatachus nisusqankuta uyariy.

⁸ Chayrí yachachisunanpaj jallp'ata tapuriy. Mama qochapi kaj challwakunatapis tapurikullaytaj, paykunapis yachachillasonqankutaj.

⁹ Kanmanrajchu pipis Tata Dios kay tukuy imata makinwan ruwasqanta mana yachaj?

¹⁰ Tukuy kawsayniyojpa kawsayninkoqa Diospa makinpi kashan, paymin tukuy runaman kawsayta qon.

¹¹ Ninreqa pejpa parlasqan allinchus manachus kasqanta reparan, jinallataj simipis mikhuna misk'ichus manachus kasqanta reparan.

¹² Machu runakunaqa yachayniyoj kanku, unayta kawsasqanku paykunata yachachin.

¹³ Atiywan, yachaywanqa Diospatamin kanku, imatachus wakichisqanta junt'anpuni.

¹⁴ Diospa thuñisqantaqa ni pipis watej sayarichiyta atinchu. Sichus Dios pitapis jap'in chayqa, mana pipis kacharichiyta atinchu.

¹⁵ Sichus pay mana parachimun chayqa, tukuy ima ch'akipun. Sitajchus sinch'ita parachimun chayqa, jallp'atañataj yaku p'ampaykun.

¹⁶ Atiywan, yachaywanqa Diospatamin kanku. Ch'awkiyajwan ch'awkiyachikojpis makinpi kashanku.

¹⁷ Diosqa yachayniyojkunaj yachayninkuta chinkachin, juezkunajpatapis umankuta muyuchin.

¹⁸ Diosqa kuraj kamachejkunaj atiyninkuta jap'ispa, q'alallata waj suyuman apachin.

¹⁹ Sacerdotekunata ruwanankumanta wijch'un, kamachejkunatapis kamachiyninkumanta orqhopun.

²⁰ Atinikunapaj jina sumaj yuyaychajkunatapis mana parlarejta saqen, kurajkunamantapis yuyayninkuta qhechun.

²¹ Sumaj runapaj qhawasqa kajkunata manakajpaj qhawachin, sinch'i kallpayojkunatataj mana kallpayojta saqen.

²² Diosqa mana rikukoj kajta sut'iman rikhurichin, tukuy ima pakasqa kajtataj sut'iman orqhon.

²³ Payqa suyukunata jatunchan, chantá payllataj thuñirparin. Suyukunata ch'eqerachispa, payllataj tukuynejmanta tantaykun.

²⁴ Diosqa uj suyumanta kurajkunaj yuyayninkuta qhechun, ch'innejpitaj paykunata pawichin.

²⁵ Paykunaqa llankhaykachaspa laqhapi jina purinku, machasqa jina kayman jaqayman chankaykachaspa, nispa.