Job 11 - DIOSPA QHELQACHISQ

Sofar Jobta k'amin

¹ Chantá Namat llajtayoj Sofarñataj Jobta nerqa:

² Chay chhikata thawtisqanmanqa manachu kutichina kanman? Anchata parlaj runaqa llimphuchu llojsinman?

³ Chay jinata thawtispachu noqaykuta ch'inyachiyta munawayku? Chay jinata alqochakuwasqaykumanta manachu pipis imata nisonqa?

⁴ Qanqa ninki: Noqaj nisqayqa cheqanpuni, Diospa ñawpaqenpitaj mana k'amina kani, nispa.

⁵ Mayta noqa munayman Dios parlarinanta, kikin siminwantaj qanta juchachasunanta.

⁶ Payqa yachaypa pakasqa imankunata yachachisunkiman, chay mana entiendey atina imakunata. Ajinapi yachawaj Diosqa manaraj juchaykiman jinachu jasut'isusqanta.

⁷ Diospa pakasqa imankunata tariyta atiwajchu? Tukuy Atiyniyoj Dios jina mana pantayniyoj kawajchu?

⁸ Imanawajtaj chaykuna janaj pachamanta nisqa astawan patapi kajtinkuri? Imatataj qan yachawaj sichus chaykuna ukhu pachamantapis astawan ukhupi kanku chayri?

⁹ Diospa pakasqa imankunaqa kay pachamantapis astawan jatuchaj kanku, mama qochamantapis astawan jatunmin.

¹⁰ Sichus Dios jamuspa jap'isunkiman, chantá juzgasunanpaj wajyasunkiman chayqa, pitaj payta jark'ayta atinmanri?

¹¹ Diosqa pichus llulla kasqanta yachan, payqa runaj millay ruwasqantapis rikun. Yuyankichu pay mana imatapis reparasqanta?

¹² Wampu runaqa yuyayninman churakonqa, maypachachus k'ita burromanta uj runa paqarinman, chaypacha.

¹³ Ujkama cheqan sonqowan imatapis ruwaj churakuy, Diosmantataj yanapasunanta mañakuy.

¹⁴ Sichus jucha q'epirisqa kashanki chayqa, chay juchata wijch'uy, wasiykipi millay kajta ruwanata ama qhawakullaychu.

¹⁵ Ajinatachus ruwanki chayqa, mana p'enqakunkichu, mana imata manchachikuspataj kawsakunki.

¹⁶ Tukuy ñak'ariyniykimanta qonqapunki, pasarparej yakuta jina qonqapunki.

¹⁷ Kawsayniykeqa chawpi p'unchaypi intimanta astawan k'ancharenqa, laqhayaypis sut'iyarqamuy jina kanqa.

¹⁸ Diospi atinikuspa suyakusqaykirayku mana imata manchachikuspa kawsakunki, Diospa waqaychasqantaj misk'ita puñukunki.

¹⁹ Puñushajtiyki, ni imapis mancharichisoj kanqachu. Yanapanaykita mask'aspataj ashkha jamusonqanku.

²⁰ Millayta ruwajkunarí qhasillata pipis yanapananta mask'anqanku. Maymanchus pakakunankutapis mana tarenqankuchu. Paykunaqa wañuyllataña suyanqanku, nispa.