Job 10 - DIOSPA QHELQACHISQ

Job ñak'arisqanmanta waqan

¹ Job nillarqapuni: Kay kawsaywan sayk'usqaña kani. Chayrayku quejakuspa thasnukusaj, llakiy kawsayniymanta atisqayta parlasaj.

² Diosta nisaj: Ay Diosníy, ama juchachawaychu ari, imamantachus juchachawasqaykita niway ari.

³ Qanmin ruwawarqanki. Allinchu rijch'asunki kay jinata ñak'arichiwaspa, pisipaj qhawawasqaykeqa? Millay ruwajkunaj wakichisqankuta yanapaytachu munanki?

⁴ Imaynatachus runa qhawan, ajinatachu qan qhawanki?

⁵ Qanpa kawsayniykeqa wañoj runaj kawsaynin jina pisillachu? Wañoj runa jinachu pisi tiempollata kawsanki?

⁶ Jina kajtenqa, ima nispataj millay juchayta, millay ruwasqaytawan mask'aspa purinkiri?

⁷ Qan allinta yachanki noqaqa mana juchayojchu kasqayta, yachallankitaj qanpa atiyniykimanta ni pipis kacharichiwayta atisqanta.

⁸ Qanpuni makiykiwan ruwawarqanki, kunantajrí chinkachiwayta munanki.

⁹ Yuyarikuy ari t'urumanta ruwawasqaykita. Kunanqa watejchu jallp'allamantaj kutichiwanki?

¹⁰ Qanqa ukhuyta ruwarqanki, imaynatachus leche cuajajtin, quesota ruwanku, ajinata.

¹¹ Aychata, qaratawan ima churawarqanki, tulluykunatataj ankuwan t'inkirarqanki.

¹² Kawsayta qowarqanki, munakuwarqankitaj, waqaychawaspataj kawsachiwarqanki.

¹³ Chaywanpis kunan yachani sonqoyki ukhupi pakasqa yuyaykunaraj kasqanta.

¹⁴ Juchallisajchus manachus, chayta qhawashawarqanki, ajinamanta juchallikojtiy, juchachanawaykipaj.

¹⁵ Sichus juchayoj kani chayqa, noqamanta imachus kanqapis. Sichus mana juchayoj kani chaypis, mana uyamanta qhawayta atiykimanchu, imaraykuchus qanqa k'umuykuchiwanki, ñak'arichiwankitaj.

¹⁶ Sichus umayta oqharini chayqa, qanqa león jina qhatiykachawanki, chinkachinawaykiraykutaj t'ukunata ruwanki.

¹⁷ Contrayta rikojkuna willasojkunaqa tiyanpuni, k'araj phiñakuyniykitaj contrayta astawan yapakushan. Soldadokuna jina mana sayk'uspa qhatiykachawanki.

¹⁸ Imapajtaj paqarichiwarqankiri? Manaraj pi rikushawajtin, wañunay karqa.

¹⁹ Chinkapullayman karqa, manapis jayk'aj kaymanchu karqa jina. Mamaypa wijsanmanta jallp'aj sonqonman yaykupuyman karqa.

²⁰ Kawsayniy pisi tiempollapaj kasqanrayku, samarikojta saqerillaway ari. Uj chhikallantapis kusirikojta saqellaway ari,

²¹ manaraj mana jayk'aj kutirimuyniyojta ripushajtiy, laqha wañuy llanthu suyuman.

²² Tuti laqha llajtaman ripusaj, chaypitaj k'anchayqa tuti laqha jinallataj kashan, nispa.