Jeremías 50 - DIOSPA QHELQACHISQ

Jeremías Babiloniaj contranpi sut'inchan

¹ Tata Diosqa sut'inchajnin Jeremiasnejta kay jinata willarqa caldeokunaj suyunku Babiloniamanta:

² Tukuy suyupi tiyakojkunapis yachanankupaj kayta willamuychej. Wiphalata señalta jina sayarichiychej, ama uj chhikanta pakarispataj, kay jinata niychej: Babiloniata atipaspa jap'enqanku. Bel diosninkoqa p'enqaypi rikhurichisqa kanqa. Merodac diosninkupis manchariywan junt'a kanqa. Lantinkukunataj phirisqa kanqanku.

³ Wichaynejmanta uj suyoqa Babiloniaj contranta jamushan, jallp'ankutataj ch'inman tukuchenqanku. Manaña runakuna, nitaj animalkunapis chaypi kawsanqankuñachu. Chay suyumanta tukuy ayqespa riponqanku, nispa.

Israelitakuna llajtankuman kutimponqanku

⁴ Tata Dios nin: Chay p'unchaypi israelitakuna, jinataj Judamanta kajkuna ima waqaspa Tata Diosninkuta mask'anqanku.

⁵ Sión orqoman rina ñanmanta tapukonqanku, chaymantataj nenqanku: Jakuchej, Tata Dioswan wiñay mana jayk'aj qonqana tratota ruwasunchej, nispa.

⁶ Aylloyqa chinkasqa ovejakuna jina kanku. Michejninkukunataj mana allintachu paykunata micherqanku, manachayqa orqonejpi paykunata chinkaracherqanku. Ovejaykunaqa orqomanta orqo purerqanku, puñuna kanchankutapis qonqaporqanku.

⁷ Pikunachus paykunata tarejkunaqa oqoykorqanku, awqankutaj nerqanku: Noqaykoqa mana juchayojchu kayku, imaraykuchus paykuna Tata Diospa contranpi juchallikorqanku. Paypimin ñawpa tatankukuna atinikorqanku, jinataj paykunaj samarikunanku karqa, nispa.

⁸ Babiloniamanta llojsiychej, caldeokunaj suyunkunamanta ayqeychej. Chivato jina tropaj ñawpaqenta riychej.

⁹ Noqa wichaynejmanta ashkha atiyniyoj suyukunata tantaykuspa, Babiloniaj contranta maqanakoj pusamusaj. Paykunataj sumajta wakichikonqanku maqanakunankupaj. Wichaynejmanta suyukunaqa Babiloniata atipaspa, jap'enqanku. Paykuna sumajta maqanakuyta yachajkuna kanku, flechankutataj arcowan kacharinku mana ujta pantarispa.

¹⁰ Chaypacha paykunaqa caldeokunaj tukuy kapuyninkuta apakaponqanku manaña atinankukama. Noqa Tata Diosmin chayta nini.

Babilonia suyuta jap'inku

¹¹ Qankuna caldeokuna, aylluymanta suwaspa kusikorqankichej, asirikorqankichejtaj. Qankunaqa, imaynatachus vakilla pasto patapi sink'urin, ajinata sink'urerqankichej, caballo jinataj qhaparerqankichej.

¹² Chayrayku suyuykichej, maypichus paqarikorqankichej, chayqa k'umuykachachisqa, p'enqachisqataj, kanqa. Chay Caldea suyoqa tukuy suyumanta aswan qhepapi kanqa, ch'in ch'aki t'ajra pampamantaj tukuchisqa kanqa.

¹³ Noqa phiñakusqayrayku Babilonia suyuta mana uj runayojta saqesaj, ch'in q'ara pampaman tukuchisqata. Tukuy chayninta pasajkunaqa t'ukuspa, alqochakonqanku, chay jina jasut'isqa kasqankuta rikuspa.

¹⁴ Arcowan kacharichinapaj flechayoj kajkuna, wakichikuychej Babilonia llajtata muyuykunaykichejpaj. Babiloniaj contranta mana sayk'uspa, arcowan flechaykichejta kachariychej, imaraykuchus paykunaqa noqa Tata Diospa contraypi juchallerqanku.

¹⁵ Tukuynejpi maqanakuman yaykunapaj qhapariychej. Babilonia atipasqaña kashan, torrenkuna, phatu perqankunapis thuñisqaña. Kayqa Tata Diospa vengakuyninmin. Babiloniamanta vengakuychej. Imaynatachus qankunawan ruwarqanku, ajinallatataj paykunawanpis ruwaychej.

¹⁶ Babiloniapi ama pitapis tarpojta, nitaj ruthojtapis saqeychejchu. Maqanakuta rikuspa, waj llajtayojkuna llajtankuman kutiponqanku, sapa ujtaj suyunkuman ayqekonqanku.

¹⁷ Israel aylloqa chinkasqa oveja jina, leonkunaj qhatiykachasqan. Ñawpajta Asiriata kuraj kamachejraj oqoykorqa. Chaymantataj Babiloniata kuraj kamachej Nabucodonosorñataj tullunta phiriykorqa.

¹⁸ Chayrayku Israelpa Tukuy Atiyniyoj Tata Diosnin kay jinata nin: Noqaqa Babiloniata kuraj kamachejta jasut'isaj, jinataj suyuntapis, imaynatachus Asiriata kuraj kamachejta jasut'erqani, ajinata.

¹⁹ Israel aylluytarí tiyakunanku llajtaman kutichimusaj, chaypitaj ovejakuna jina sumaj pastota mikhonqanku Carmelopi, Basanpi, Efrainpa orqonpi, Galaadpi ima, nispa.

²⁰ Noqa Tata Dios nillanitaj: Chaypacha Israelpa juchallisqanta mask'anqanku manataj tarenqankuchu. Judáj juchallisqantapis mask'allanqankutaj, manallataj tarenqankuchu, imaraykuchus noqa juchankuta pampacharqani.

Tata Dios Babiloniata juchachan

²¹ Meratayin jap'iyman maqanakoj wichariychej, jinataj Pecodpi tiyakojkunawanpis. Qhatiykuspa, tukuyninkuta wañurachiychej. Chay tukuy imata kamachisqayman jina ruwaychej. Noqa Tata Diosmin chayta nini.

²² Tukuy suyupi maqanakusqanku ch'ajwa uyarikun, manchay wañuchinaku ima.

²³ Babiloniaqa tukuy suyukunapaj phirej combo jina kaspapis, kunanqa p'akisqa, ñut'u phirisqataj kashan. Qhawariychej imaynatachus Babilonia tukuy suyukunapaj t'ukuspa, mancharinaman tukusqanta.

²⁴ Babilonia suyu, urmanaykipaj noqa tojllata churarqani, mana reparaspataj, chayman urmaykorqanki. Chaypi jap'ichikuspa, presochasqa rikhurerqanki, noqa Tata Diospa contrayta sayaykusqaykirayku.

²⁵ Noqa Tata Dios arma jallch'anay wasita kicharispa, k'araj phiñakuyniypa armanta orqhomorqani, imaraykuchus noqa Tukuy Atiyniyoj, Tukuyta Kamachej Tata Dios Babilonia suyupi imatachus ruwanayta junt'asaj.

²⁶ Chayrayku tukuynejmanta Babiloniaj contranpi maqanakoj jamuychej. Pirwankuta kichariychej. Tukuy wasinkuta, llajtaj perqantataj raqayman tukuchiychej. Amataj pitapis kawsashajta saqeychejchu.

²⁷ Tukuy wapu soldadonkunata wañuchiychej, ñak'ana cheqaman paykunata apaychej. Ay, paykunamanta, imaraykuchus wañunanku p'unchay chayamun, jasut'isqa kananku p'unchaytaj.

²⁸ Babiloniamanta ayqemojkunaj willasqanku Sionpi uyarikun. Paykuna willanku imaynatachus Tata Diosninchej Babiloniamanta vengakusqanta, Templonta phiriykusqankurayku.

²⁹ Arcowan tukuy flechajkunata tantamuychej, Babiloniaj contranta maqanakoj rinankupaj. Llajtaj tukuy muyuyninpi jarakuychej, ama pipis ayqenanpaj. Ruwasqanman jina kutichiychej. Imaynatachus waj suyukunawan ruwarqa, ajinallatataj paywan ruwaychej, imaraykuchus payqa Israelpa May Llimphu Kaj Diosnin, noqa Tata Diospa contraypi sayaykorqa.

³⁰ Chayraykumin wayna runankuna llajta ukhupi wañusqa urmaranqanku. Maqanakoj tukuy soldadonkunapis chay p'unchaypi wañuchisqa kanqanku. Noqa Tata Diosmin chayta nini.

³¹ Tukuy Atiyniyoj Tata Dios nillantaj: Runaykachaj suyu, qanpa contraykipi noqa kashani, imaraykuchus jasut'isunay p'unchayqa chayamunña.

³² Runaykachaj suyu, qanqa misk'aspa urmanki, manataj pipis sayarichisoj kanqachu. Tukuy llajtaykikunaman ninata jap'iykuchisaj, chay ninataj tukuy muyuynintinta ruphaykonqa, nispa.

³³ Tukuy Atiyniyoj Tata Dios nillantaj: Israel suyu, jinataj Judá suyupis manchay ñak'arichisqa kashanku. Awqanku paykunata presochaspa jap'inku, manataj kachariyta munankuchu.

³⁴ Jinapis preciota pagaspa kacharichejninkoqa may kallpasapamin, sutintaj Tukuy Atiyniyoj Tata Dios. Paymin paykunarayku justiciata ruwanqa, allin kawsaytataj suyunkuman apamonqa. Babiloniapi tiyakojkunamanrí jatun manchachikuyta kachaykonqa, nispa.

³⁵ Tata Dios nillantaj: Babiloniapi tiyakojkuna wañuchunku, jinallataj Caldeamanta kurajninkukunapis, yachayniyojninkukunapis wañullachunkutaj.

³⁶ Llulla sut'inchajkunapis locoyapuchunku. Wapu soldadonkukunapis manchachikuywan kharkatitichunku.

³⁷ Caballonkukuna wañuchunku, carretankunapis phirisqa kachunku. Mink'asqa soldadonkukunapis warmi jina pisi kallpaman tukuchunku. Babiloniajta qhapaj kayninta qhechuspataj, apakapuchunku.

³⁸ Yakuyoj mayunkupis ch'akipuchun, imaraykuchus Babiloniaqa millay lantikunayoj suyumin, chay lantikunaraykutaj yuyayninta chinkachikun.

³⁹ Chayraykumin Babiloniapi k'ita phiña animalkuna, chantá k'ita alqokunallaña kawsanqanku. Chay cheqallapitaj surikuna ima kawsanqanku. Chay suyupitaj manaña pipis ni jayk'aj tiyakonqañachu.

⁴⁰ Noqa Tata Dios imaynatachus Sodomata, Gomorrata, jinataj chay muyuyninpi llajtakunata chinkacherqani, ajinallataj Babiloniatapis chinkarparichisaj. Manaña chaypi pipis tiyakonqachu, nitaj ñan purejkunallapis chaynejpi jarakonqankuñachu. Noqa Tata Diosmin chayta nini.

⁴¹ Wichaynejpi karu suyumanta atiyniyoj ashkha soldado jamushanku. Uj jatun suyu, ashkha kuraj kamachejkuna ima kay pachaj k'uchunmantapacha jamunankupaj wakichikushanku.

⁴² Paykunaqa flechanapaj arcoyoj, t'ojsina lanzayoj ima jamushanku. Jinallataj rumi sonqo mana uj chhikan khuyakuyniyoj kanku. Ch'ajwasqankoqa mama qochaj qhollchoqeyasqan jina sonarin, caballopitaj purinku. Ñapis Babiloniaj contranpi maqanakoj yaykunankupajña kashanku.

⁴³ Babiloniamanta kuraj kamachejrí chayta yachaytawankama, mancharikuywan mana imanakuyta atinchu. Paqarichikoj warmi jina ñak'ariypi, nanaypitaj kashan, nispa.

⁴⁴ Ajinata Tata Diosqa Babiloniaj contranpi nin: Imaynatachus león Jordán mayu kantupi ch'umi ukhumanta ujllata llojsimuspa, sumaj wira uywaman phinkiykun, ajinata noqapis jamusaj, Babiloniamanta kajkunatataj chaynejmanta ayqechisaj. Chantá ajllakusqay kamachiyta churasaj chaypi kamachinanpaj. Pitaj noqa jina kanmanri? Pitaj noqaman sayaykuwanmanri? Mayqen michejtaj ñawpaqeypi sayanmanri?

⁴⁵ Jinaqa uyariychej imatachus noqa Tata Dios Babiloniaj contranpi wakichisqayta, imatatajchus ruwayta yuyasqayta caldeokunaj contrankupi: Awqankunaqa aswan juch'uy wawankunatapis apanqanku, llajtankutapis ch'in t'ajra pampaman tukuchenqanku.

⁴⁶ Babilonia suyoj urmasqanqa kay pachata kuyurichenqa, urmasqanmanta qhaparqachasqankutaj tukuy kay pachapi uyarikonqa, nispa.