Jeremías 43 - DIOSPA QHELQACHISQ

Jeremiasta Egiptoman pusanku

¹ Ajinata Jeremiasqa Tata Dios imatachus nisqanta llajta masinkunaman willayta tukorqa.

² Chantá Osaiaspa churin Azarías, Careajpa churin Johananwan, waj wapuykachaj runakunapiwan Jeremiasta nerqanku: Imatachus nisqaykeqa llulla. Tata Diosniykoqa mana kachamusunkichu ninawaykupaj: Ama Egiptoman tiyakoj riychejchu, nispa.

³ Neriaspa churin Baruclla noqaykoj contraykupi chayta ninaykipaj umata sat'isunki, caldeokunaj makinkuman jaywaykunawaykupaj. Chantá paykuna wañuchiwasqayku, chayrí Babiloniaman apawasqayku, nispa.

⁴ Ajinaqa ni Careajpa churin Johanán, nitaj soldadokunata kamachejkuna, nillataj Judamanta puchoj runakunapis Tata Diospa nisqanta kasorqankuchu, Judapi qhepakunankupaj.

⁵ Aswanpis Careaj churin Johanán, soldadokunata kamachejkunapiwan Judamanta puchoj runakunata tantaykorqanku Egiptoman pusanankupaj, pikunachus tukuynejman ch'eqerachisqa kasqankumanta Judaman tiyakoj kutimpusqanku, chaykunata.

⁶ Qharikunata, warmikunata, wawakunata, kuraj kamachejpa ususinkunatawan ima tantallarqankutaj, pikunatachus Babiloniamanta soldadokunata kamachej Nabuzaradanqa Ajicanpa churin Gedaliasman qhawananpaj saqesqa, chaykunata. Jinallataj Diosmanta sut'inchaj Jeremiasta, Neriaspa churin Baructawan ima tantallarqankutaj.

⁷ Chantá Tata Diospa kamachisqanta mana kasuspa, tukuyninku Egipto suyuman riporqanku, Tafnes llajtamantaj chayarqanku.

⁸ Tafnes llajtapiña kashajtinku, Tata Diosqa Jeremiasta nerqa:

⁹ Judamanta kajkunaj rikunankuta jatuchaj rumikunata oqharispa, faraonpa kamachinan wasiman yaykunaj ladrillasqa pationpa uranman p'ampaykuy.

¹⁰ Chantá niy: Israelpa Tukuy Atiyniyoj Tata Diosnin ajinata nin: Noqaqa Babiloniamanta kamachiy Nabucodonosorta kayman pusamusaj, chaymantataj Jeremiaspa p'ampachasqan rumikuna patapi kamachinan tiyanata churasaj, jinallataj pay toldontapis chaypi sayarichenqa.

¹¹ Chantá pay Egipto suyuta phirita ruwanqa. Pikunachus wañunankupaj churasqa kashanku, chaykuna wañonqanku. Jinallataj pikunachus llajtankumanta waj suyuman apasqa kanankupaj churasqa kashanku, chaykuna apasqapuni kanqanku. Pikunatajchus maqanakupi wañuchisqa kanankupaj churasqa kashanku, chaykunapis maqanakupi wañullanqankutaj.

¹² Chantá Egiptoj diosninkukunaj yupaychana wasinkukunaman Nabucodonosor ninata jap'iykuchenqa, diosninkukunatataj jap'ispa apakaponqa. Egiptopi ajinata ruwaytawantaj, imaynatachus uj michej qhatakunanmanta usata thalariytawan ripunpacha, ajinallatataj paypis ni pej ni ima nisqan riponqa.

¹³ Ajinallataj Nabucodonosorqa Egiptopi Bet Semespa lantinta phirillanqataj, lanti yupaychana wasikunatapis kanaykonqa, nispa.