Jeremías 42 - DIOSPA QHELQACHISQ

Jeremiasta ninku Diosmanta mañapunanta

¹ Soldadokunata kamachejkuna ukhumanta Careajpa churin Johanán, Osaiaspa churin Jezaniaspis, jinataj tukuy runakuna juch'uymanta jatunkama,

² Diosmanta sut'inchaj Jeremiasta nerqanku: Kay mañakusqaykuta uyaririwayku, amataj qhesachawaykuchu. Kay pisilla puchojkunapaj Diosniykimanta mañapuwayku. Ñawpajta ashkha karqayku, kunantajrí uj chhikallaña kayku, rikunki jina.

³ Diosniyki Tata Diosmanta mañapuwayku, maymanchus rinaykuta rikuchinawaykupaj, imatatajchus ruwanaykuta ninawaykupaj, nispa.

⁴ Chantá Jeremías paykunaman kuticherqa: Niwasqaykichejqa walejpacha. Tata Diosniykichejmanta qankunarayku mañasaj, imaynatachus mañawasqaykichejman jina. Chantá imatachus Dios kutichiwasqanta, ni imata pakaspa rejsichisqaykichej, nispa.

⁵ Chaypacha paykuna Jeremiasta nerqanku: Sichus Tata Diosniyki noqaykuman qannejta imatachus nisqanta mana junt'aykumanchu chayqa, Tukuyta Kamachej Tata Diosniyki noqaykoj contraykupi cheqanta parlaj testigo kachun.

⁶ Tata Diospa nisqan allinpis kachun manapis, nisqanta kasusqaykupuni, pimanchus parlanaykita nerqayku, chayta, jinamanta allin rinawaykupaj, nispa.

Jeremiaspa mañakusqanman Tata Dios kutichin

⁷ Chunka p'unchaymanta qhepaman Tata Diosqa Jeremiasman kuticherqa.

⁸ Chantá Jeremiasqa Careajpa churin Johananta wajyarqa, jinallataj paywan kashaj soldadokunata kamachejkunatapis. Jinallataj tukuy runata juch'uymanta jatunkama wajyallarqataj.

⁹ Paykunamantaj nerqa: Qankuna niwarqankichej Israelpa Tata Diosninmanta mañapunayta, paytaj kay jinata nisunkichej:

¹⁰ Sichus qankuna kay suyupi qhepakunkichej chayqa, noqa qankunata yanapasqaykichej, manataj chinkachisqaykichejchu. Sach'ata jina mallkisqaykichej, manataj t'irasqaykichejchu. Mayta llakikuni kay ñak'ariykunata qankunaman kachaykamusqaymanta.

¹¹ Babiloniata kuraj kamachejtarí amaña manchachikuychejchu, pitachus mayta manchachikunkichej, chayta. Ama payta manchachikuychejchu, imaraykuchus noqa qankunawan kashani waqaychasunaykichejpaj, atiyninmantataj qankunata kacharichinaypaj. Noqa Tata Diosmin chayta nini.

¹² Noqa qankunamanta khuyakuspa, Babiloniata kuraj kamachejpa sonqonta wakichisaj khuyaspa llajtaykichejman kutichimpusunaykichejpaj, nispa.

¹³ Chaywanpis ichapis qankuna Tata Diosta mana kasuyta munaspa, niwajchej: Mana kaypi tiyakusqaykuchu.

¹⁴ Manachayqa Egiptoman tiyakoj ripuyta munayku. Chaypi maqanakuta mana rikusqaykuchu, manataj soldadokunata wajyaj cornetata waqajta uyarisqaykuchu, manallataj yarqhaymantapis wañusqaykuchu, nispa.

¹⁵ Chaytachus ninkichej chayqa, qankuna Judamanta puchojkuna Israelpa Tukuy Atiyniyoj Tata Diosnin imatachus nisqanta uyariychej: Sichus qankuna Egiptomanpuni ripuyta munankichej chayqa,

¹⁶ maqanaku, yarqhay, mayqenkunatachus qankuna manchachikushankichej, chaypuni Egipto suyupi qhatirisonqachej, jaqaypitaj wañunkichej.

¹⁷ Pikunachus Egiptoman ripuspa, tiyakamuyta munashankichej, tukuyniykichej chaypi maqanakupi wañunkichej. Manachayrí yarqhaywan, chantá onqoywan ima wañunkichej. Manapuni pipis kawsashajqa qhepakonqachu, nitaj pipis ñak'ariykunata qankunaman kachaykamusqaymanta llusp'enqachu, nispa.

¹⁸ Israelpa Tukuy Atiyniyoj Tata Diosnin nillantaj: Imaynatachus Jerusalenpi tiyakojkunaj contrankupi phiñakuyniy k'ajarerqa, ajinallatataj qankunaj contraykichejta k'arajta phiñakusaj, sichus qankuna Egiptoman ripunkichej chayqa. Qankunaqa tukuypa rikunanta maldicisqa kankichej, chaytaj mayta t'ukunapaj jina kanqa. Manañataj ni jayk'aj kay suyuta ujtawan rikunkichejchu, nispa.

¹⁹ Noqataj niykichej: Tata Diosqa qankuna Judá ayllumanta puchojkunaman kamachisunkichej: Ama Egiptoman ripuychejchu, nispa. Ama qonqaychejchu imatachus noqa mayta nishaykichej, chayta:

²⁰ Qankuna jatunta pantarqankichej, maypachachus kay jinata niwarqankichej chaypacha: Tata Diosniykimanta noqaykurayku mañaripuwayku, chantá sut'inchawayku imatachus kamachiwasqaykuta, chayman jina ruwanaykupaj, nispa.

²¹ Noqa kunan qankunaman rejsichiykichej, imatachus Tata Dios qankunaman ninayta kamachiwarqa, chayta. Chaywanpis qankunaqa manapuni kasuyta munankichejchu.

²² Chayrayku kayta allinta yachaychej: Qankunaqa maqanakupi wañunkichej, yarqhaywan, onqoywantaj, maymanchus tiyakoj ripuyta munashankichej, chaypi, nispa.