Jeremías 39 - DIOSPA QHELQACHISQ

Jerusalén llajtata caldeokuna jap'inku

¹ Judá suyuta kuraj kamachej Sedequías jisq'on wata chunka killataña kamachishajtin, Babiloniata kuraj kamachej Nabucodonosor tukuy soldadonkunawan Jerusalenpa contranta jamuspa, llajtata muyuykorqa.

² Chantá chunka ujniyoj watataña kuraj kamachej Sedequías Judá suyuta kamachishajtin, chay watapi tawa kaj killanpi jisq'on kaj p'unchayninpi, Babiloniamanta soldadokuna perqata jusk'uspa, Jerusalén llajtaman yaykuykorqanku.

³ Babiloniata kuraj kamachejpa tukuy kurajninkunapis yaykuykullarqankutaj, chawpipi kaj punkupitaj tiyaykukorqanku. Chaykuna karqanku Nergal Sarézer, Samgar Nebo, kuraj kamachejpa kuraj kamachin Sarsequín, waj Nergal Sarézer ima, pichus kuraj kamachillataj karqa.

⁴ Jinapi kuraj kamachej Sedequías, chantá soldadonkunapis chay tukuyta rikuspa, Jerusalenmanta ayqekorqanku kuraj kamachejpa huertan chaynejta. Iskaynin perqa chawpipi punku kasharqa, chayninta tutan llojsispa, Jordán valleman rej ñanta jap'irerqanku.

⁵ Caldeokunaj soldadonkutajrí Sedequiasta qhatiykuspa, Jericó pampanejpi tariparqanku. Payta jap'ispataj, paykuna kuraj kamachej Nabucodonosorpa ñawpaqenman aparqanku. Nabucodonosorqa Jamat nisqa suyupi kaj Ribla llajtapi kasharqa. Chantá Nabucodonosorqa imachus Sedequiaswan ruwasqa kananta kamacherqa:

⁶ Chaypeqa Sedequías qhawashajtin, Babiloniata kuraj kamachej Sedequiaspa churinkunaj umankuta qholucherqa, jinallatataj Judamanta kaj kurajkunajtapis.

⁷ Chantá Babiloniaman apanankupaj, Sedequiaspa ñawinta orqhocherqa, cadenawantaj wataykucherqa.

⁸ Chaykama Caldeo soldadokunaqa kuraj kamachejpa wasinta ninawan jap'iykucherqanku, jinallataj llajtapi wasikunatapis. Jerusalén llajtaj perqantapis thuñirarqanku.

⁹ Chay qhepatataj soldadokunata kamachej Nabuzaradán llajtapi qhepakojkunata jinallataj caldeokunaman chimpapojkunatapis Babiloniaman apacherqa.

¹⁰ Judá suyupi tiyakunankupaj saqerqa chay allin wajchakunata, ni imayoj kajkunata ima. Chay p'unchaypitaj paykunaman uva huertata, llank'ana jallp'ata ima qorqa.

Nabucodonosor Jeremiasta kacharipun

¹¹ Chantá Babiloniata kuraj kamachej Nabucodonosor soldadonkunata kamachej Nabuzaradanta kamacherqa Jeremiaswan imatachus ruwananta. Pay nerqa:

¹² Jeremiasta carcelmanta orqhomuspa, paymanta qhaway. Amataj ni ima mana allintapis payta ruwaychu, manachayqa tukuy mañakususqanta jayway, nispa.

¹³ Chantá Nabuzaradán, Nabusazbán jinataj Nergal Sarezerwan, chantá Babiloniata kuraj kamachejpa tukuy kurajninkuna ima soldadokunata kacharqanku

¹⁴ Jeremiasta kuraj kamachejpa wasinta qhawajkunaj pationmanta orqhomunankupaj. Ajicanpa churin, Safanpa allchhin Gedaliasmantaj nerqanku, Jeremiasta qhawananta, wasinmantaj pusananta. Jinamanta Jeremías Judá suyupi llajta masinkunawan tiyakorqa.

Dios nin Ébed Melecta waqaychananta

¹⁵ Manaraj caldeo soldadokuna Jerusalenta atipaykushajtinku, Jeremías llajtata qhawajkunaj patiollanpiraj kasharqa. Chantá Tata Diosqa Jeremiasta nisqa:

¹⁶ Rispa, kayta niy Etiopía llajtayoj Ébed Melecman: Israelpa Tukuy Atiyniyoj Tata Diosnin nisunki: Kay llajtaman ñak'ariykunata kachaykamunayta nisqayta junt'asajpuni. Chay tukuy ima rikushajtiyki, junt'akonqa.

¹⁷ Chaywanpis noqa waqaychasqayki, pikunatachus manchachikushanki, chay runakunaj makinkuman ama urmanaykipaj. Noqa Tata Diosmin chayta nini.

¹⁸ Nillanitaj: Cheqatapuni noqa waqaychasqayki ama wañuchisqa kanaykipaj. Qan noqapi atinikusqaykirayku kawsallankipuni, nispa.