Jeremías 37 - DIOSPA QHELQACHISQ

Jeremiasta jap'inku

¹ Babiloniata kuraj kamachej Nabucodonosor Josiaspa churin Sedequiasta churarqa Judapi kuraj kamachej kananpaj, Joacinpa churin Coniaspa cuentanmanta.

² Chaywanpis mana Sedequías, nitaj yanapajninkuna, nitaj ayllunmanta kajkunapis kasorqankuchu imatachus Tata Dios Jeremiasnejta willachisqanta.

³ Mana kasojtinkupis, kuraj kamachej Sedequiasqa Selemiaspa churin Jucalta, jinataj Maseiaspa churin sacerdote Sofoniasta ima kacharqa Jeremiasta kay jinata nimunankupaj: Noqaykurayku Tata Diosmanta mañapuwayku, nispa.

⁴ Chaypacha Jeremías manaraj wisq'asqachu kashaspa, llajta ukhupi maytapis puriyta atillarqa.

⁵ Jinapi Babiloniamanta soldadokuna Jerusalenta muyuykushajtinku, Egiptomanta faraonpa soldadonkuna Sedequiasta yanapaj llojsimorqanku. Chayta yachaspataj, caldeokunaqa Jerusalenmanta karunchakaporqanku.

⁶ Chaypacha Tata Diosqa Jeremiasta nerqa:

⁷ Noqa Israelpa Tata Diosnin ajinata nini: Qankunaqa Judamanta kuraj kamachej, pichus tapunawaykichejpaj kachamusorqachej, chayman niychej: Faraonpa soldadonkuna, pikunachus yanapanasuykichejpaj jamushasorqachej, chaykuna Egiptoman kutiykapunkuña.

⁸ Caldeamanta soldadokunataj Jerusalén llajtaj contranta maqanakunankupaj kutimonqanku, jinaspataj, kay llajtata ruphaykuchenqanku.

⁹ Chantá Tata Dios kaytapis nillantaj: Ama qhasita yuyakuychejchu Caldeamanta soldadokuna kaymanta ripunankuta. Paykuna manamin riponqankuchu.

¹⁰ Sichus qankuna Caldeamanta soldadokunata maqanakupi atipaspa, jarankupi iskay chayrí kinsa k'irisqa soldadokunata kawsajta saqewajchej chayqa, chay soldadokunalla llajtaykichejta ninawan ruphaykuchinkuman, nispa.

Jeremiasta carcelman wisq'anku

¹¹ Maypachachus Caldeamanta soldadokuna yachasqanku faraonpa soldadonkuna Sedequiasta yanapaj jamushasqankuta chaypacha, paykuna Jerusalenmanta karunchakorqanku.

¹² Chantá Jeremías Jerusalén llajtamanta Benjamín jatun aylloj jap'iyninman jallp'a rak'inakuyman riyta munarqa, chaypi payman chayaj jallp'ata jap'inanpaj.

¹³ Jinapis maypachachus Benjaminpa Punkun nisqaman chayasharqa chaypacha, uj runa Irías sutiyoj chaypi kasharqa. Pay karqa Selemiaspa churin, Jananiaspa allchhin, qhawajkuna ukhumanta kuraj kaj. Chantá payqa Jeremiasta jap'ispa, nerqa: Qanqa Caldeamanta runakunaman chimpapuyta munashanki, nispa.

¹⁴ Jeremiastajrí kuticherqa: Chayqa mana jinachu, mana Caldeamanta runakunaman chimpapushanichu, nispa. Chaywanpis Irías mana uyarerqachu, manachayqa Jeremiasta jap'ispa, kurajkunaj ñawpaqenkuman pusarqa.

¹⁵ Chay kurajkunataj manchayta Jeremiaspaj phiñakorqanku, kamacherqankutaj seq'oytawan Jonatanpa wasinman wisq'aykamunankuta. Jonatanqa kuraj kamachejpa qhelqerin karqa, paypa wasintataj carcelman tukuchisqanku.

¹⁶ Ajinata Jeremiasta chay wasi urapi kaj carcelman wisq'aykorqanku, chaypitaj unayta wisq'asqa qhepakorqa.

¹⁷ Chantá kuraj kamachej Sedequías kamacherqa Jeremiasta kamachinan wasiman pusamunankuta. Chaypitaj kuraj kamachejqa Jeremiasta pakayllapi tapurerqa: Tata Dios noqamanta imatapis nisunkichu? nispa. Jeremiastaj kuticherqa: Arí, kay jinata niwan: Qan Babiloniata kuraj kamachejpa makinman jaywaykusqa kanki, nispa.

¹⁸ Chantá Jeremías kuraj kamachej Sedequiasta tapurillarqataj: Qanpa contraykita imatataj ruwasqaniri? Chayrí yanapasojkunaj contrankupichu, chayrí kay llajtaj contranpichu imatapis ruwasqani carcelman wisq'anawaykichejpajri?

¹⁹ Maypitaj chay sut'inchajniykichej kashanku, pikunachus nerqasunkichej: Babiloniamanta kuraj kamachej mana kay suyuman nitaj llajtaykichejmanpis yaykumonqachu, nispa nejkunari?

²⁰ Kunanqa wiraqochi kuraj kamachejníy, uyariway imatachus mañarikusqayta: Ama saqeychu ujtawan qhelqeriyki Jonatanpa wasinpi wisq'anawankuta, ama chaypi wañunaypaj, nispa.

²¹ Chantá kuraj kamachej Sedequías kamacherqa Jeremías kuraj kamachejpa wasinta qhawajkunaj pationpi wisq'asqa kananta. Kamachillarqataj sapa p'unchay t'antata ruwajkunamanta payman t'antata jaywanankuta, llajtapi t'anta kanankama. Ajinata chay llajtapi t'anta tukukunankama ruwarqanku. Ajinatamin Jeremías kuraj kamachejpa wasinta qhawajkunaj pationpi qhepakorqa.