Jeremías 36 - DIOSPA QHELQACHISQ

Barucqa Temploj pationpi Diosmanta qhelqasqata ñawirin

¹ Josiaspa churin Joacín Judá suyuta tawa watataña kamachishajtin, Tata Diosqa Jeremiasta nerqa:

² Uj qaraman tukuy kay nisusqayta qhelqay, Josiaspa tiemponmanta kunankama, Israelmanta, Judamantawan, chantá chay waj suyukunamanta imatachus nerqani, chay tukuyta.

³ Ichapis Judá suyupi tiyakojkuna ñak'ariykunata kachaykamunayta uyarispa, tukuy mana allin purisqankuta saqenkuman, noqataj millay ruwasqankuta, juchankutapis qhespichiyman, nispa.

⁴ Chantá Jeremías Neriaspa churin Baructa wajyaspa, kamacherqa Tata Diospa tukuy nisqanta qhelqananta. Baructaj uj qaraman qhelqaykorqa.

⁵ Chaymantá Jeremías Baructa nerqa: Noqaqa Tata Diospa Templonpa pationman mana riyta atiymanchu, imajtinchus preso kashani.

⁶ Chayrayku jamoj ayunana p'unchaypi Temploj pationman yaykuspa, chaypi jatunmanta, imatachus qhelqacherqayki, chay p'anqata ñawiriy. Jinamanta Jerusalenpi tiyakojkuna, jinataj Judá jap'iypi kaj llajtakunamanta jamojkunapis Tata Diospa nisqanta uyarenqanku.

⁷ Uyarispa, ichapis Tata Diosmanta mañakunkuman, millay ruwasqankumantataj kutirikunkuman, imaraykuchus Tata Diospa k'araj phiñakuynenqa manchachikunapaj jinamin, nispa.

⁸ Chantá Neriaspa churin Barucqa Diosmanta sut'inchaj Jeremiaspa tukuy kamachisqanman jina ruwarqa: Tata Diospa Templonman rispa, Tata Diospa nisqan qarapi qhelqasqata tukuypa uyarinanta ñawirerqa.

⁹ Chay karqa, maypachachus Josiaspa churin Joacín phishqa watataña kamachisharqa, chaypacha. Chay wataj jisq'on kaj killanpi Joacín kamachisqa Jerusalenpi tukuy tiyakojkuna, jinataj Judapi waj llajtakunamanta jamojkunapis Tata Diospa ñawpaqenpi ayunanankuta.

¹⁰ Jinapi Baruc Diospa Templonpa pata kaj pationman rerqa, Mosoj Punku nisqa, chaynejman. Chaypi kuraj kamachejpa qhelqerin Safanpa churin Gemariaspa cuarton karqa, chaynejmantapachataj Baruc tukuy runaj uyarinanta ñawirerqa, imatachus Jeremías qhelqachisqa, chay tukuyta.

Barucqa kuraj kamachejta yanapajkunaj uyarinankuta ñawirin

¹¹ Baruc Tata Diospa nisqanta ñawirishajtin, Gemariaspa churin Safanpa allchhin Micaías chayta uyarerqa.

¹² Chantá chayta uyariytawankama, Micaías kuraj kamachejpa kamachinan wasipi qhelqerej cuartonman rerqa, maypichus tukuy kurajkuna tantasqa kasharqanku, chayman. Chaypitaj kasharqanku: Kuraj kamachejpa qhelqerin Elisama, Semaiaspa churin Delaía, Acborpa churin Elnatán, Safanpa churin Gemarías, Jananiaspa churin Sedequías, chantá waj kurajkuna ima.

¹³ Chantá Micaías, imatachus Baruc ñawirisqanta Judamanta tukuy runaj ñawpaqenpi, chay uyarisqanta willarqa.

¹⁴ Chayta uyariytawantaj, kuraj kamachejpa wasinpi kurajkunaqa Netaniaspa churin, Selemiaspa allchhin, Cusij allchhinpa allchhin Yehudita kacharqanku Neriaspa churin Barucman nimunanpaj: Runakunaj ñawpaqenkupi ñawirerqanki, chay p'anqata apamuy, nispa. Baructaj chay p'anqa aparisqa paykunaman rerqa.

¹⁵ Chantá paykuna Baructa nerqanku: Tiyarikuspa, chay p'anqamanta ñawiripuwayku, nispa. Baructaj ñawirerqa.

¹⁶ Chayta uyariytawankama, paykunaqa may mancharisqa ujkuna ujkunaman ninakorqanku: Kay tukuy uyarisqanchejta kuraj kamachejman willananchej tiyan, nispa.

¹⁷ Jinapis ñawpajta Baructa tarporqanku: Kay tukuy imata imaynatachus qhelqasqaykita willariwayku ari, nispa.

¹⁸ Baructaj kuticherqa: Jeremías kikinpuni kay tukuyta niwarqa, noqataj chay tukuy niwasqanta tintawan qaramanta ruwasqa p'anqaman qhelqarqani, nispa.

¹⁹ Chantá kurajkunaqa Baructa nerqanku: Qanwan, Jeremiaswan ima pakakamuychej, amataj pipis maypichus kasqaykichejta yachachunchu, nispa.

²⁰ Chaymanta kurajkunaqa kuraj kamachejpa qhelqerin Elisamaj cuartonman qaramanta ruwasqa p'anqata saqespa, kamachina wasiman rerqanku, chaymanta kuraj kamachejman willamunankupaj.

Kuraj kamachejqa Jeremiaspa qhelqachisqanta ruphaykuchin

²¹ Chayta uyarispa, kuraj kamachejqa Yehudita kacharqa kuraj kamachejpa qhelqerin Elisamaj cuartonmanta qaramanta ruwasqa p'anqata apamunanpaj. Yehuditaj p'anqata apamuytawan, kuraj kamachejpa uyarinanta, jinataj tukuy kurajkunaj uyarinankuta ima ñawiriyta qallarerqa.

²² Jisq'on kaj killa kasqanrayku kuraj kamachej chirimanta pakakuna cuartonpi kasharqa, q'oñikunanpaj nina k'ajaj ñawpaqenpi tiyaspa.

²³ Chantá Yehudí kinsa, chayrí tawa t'aqataña ñawirejtin, kuraj kamachejqa chay t'aqata qhelqerej cuchillonwan khuchuspa, ninaman wijch'uykorqa. Ajinata ruwarqa qaramanta ruwasqa p'anqa ninapi ruphasqa tukukunankama.

²⁴ P'anqamanta ñawirisqata uyarishaspapis, mana kuraj kamachej nitaj yanapajninkunapis mancharikorqankuchu, nitaj uj chhikanta sonqonkuta nanachikojmanpis rijch'akorqankuchu.

²⁵ Elnatán, Delaía, Gemarías imalla kuraj kamachejta parlapayarqanku ama chay p'anqata ruphachinanpaj. Paytajrí manapuni kasukorqachu.

²⁶ Aswanpis kuraj kamachejqa churin Yeramelta, Azrielpa churin Seraiasta, Abdelpa churin Selemiasta ima kamacherqa Diosmanta sut'inchaj Jeremiasta, chantá qhelqerin Baructawan jap'imunankuta. Tata Diostajrí paykunata pakaykorqa.

Jeremías waj p'anqapi qhelqachillantaj

²⁷ Jeremías imatachus ñawpajta Barucwan qhelqacherqa, chay p'anqata kuraj kamachej ruphachejtinkama, Tata Diosqa Jeremiasta nerqa:

²⁸ Qaramanta ruwasqa waj p'anqapi ujtawan qhelqay, imachus Judata kuraj kamachej Joacinpa ruphachisqan p'anqapi qhelqasqa karqa, chay tukuyta.

²⁹ Chantá Judata kuraj kamachej Joacinman kay jinata ninki: Tata Dios nin: Qanqa qaramanta ruwasqa p'anqata ruphacherqanki, imaraykuchus chaypi qhelqasqa nin: Babiloniamanta kuraj kamachejqa jamonqapuni kay suyuta chinkachinanpaj, manataj ni uj runallatapis nitaj uj uywallatapis kawsajta saqenqachu, nispa.

³⁰ Kunanqa noqa Tata Dios Judata kuraj kamachej Joacinman kayta nini: Joacinpa qhepanpi mana mirayninmanta kajchu Davidpa kamachinan tiyanapi kamachinanpaj tiyaykonqa. Joacín wañupojtintaj, ayan p'unchay ruphaypi, tutantaj chiripi wijch'urayanqa.

³¹ Noqataj payta, jinataj mirayninta, tukuy kamachinkunatapis ima millay ruwasqankumanta jasut'isaj. Paykunaj patankuman, Jerusalenpi tiyakojkunaman, Judapi tiyakojkunamanpis tukuy imaymana ñak'ariykunata kachaykusaj. Ñawpajmantapacha paykunaman imakunatachus kachaykamunayta nerqani, chaykunata, imaraykuchus paykuna tukuy nisqayta mana kasuwarqankuchu, nispa.

³² Chantá Jeremías qaramanta ruwasqa waj p'anqata jap'ispa, qhelqerin Neriaspa churin Barucman jaywarqa. Paytaj Jeremiaspa tukuy nisqanta qhelqarqa, mayqenchus Judata kuraj kamachej Joacinpa ruphachisqan p'anqapi qhelqasqa karqa, chay tukuyta. Jeremiastaj ñawpajta qhelqachisqanman waj imakunatawan yapacherqa.