Jeremías 35 - DIOSPA QHELQACHISQ

Recabpa ayllun kasukuyta yachanku

¹ Josiaspa churin Joacín Judá suyupi kuraj kamachej kashajtin, Tata Diosqa Jeremiasta nerqa:

² Recabpa ayllunman rispa, paykunawan parlamuy. Chaymanta Templo patiopi ujnin kaj cuartoman pusaspataj, paykunaman vinota ujyanankupaj jayway, nispa.

³ Chantá noqa Jeremías Recab ayllumanta kajkunata pusamoj rerqani: Jabasiniaspa allchhin Jazaniasta, pichus waj Jeremiaspa churin karqa, chayta, wawqenkunata, churinkunata, tukuynin ayllunta ima.

⁴ Chantá Diospa Templonman paykunata pusaykorqani, Igdaliaspa churin Jananpa churinkunaj tiyakunanku cuartoman. Jananqa Diospa kamachin karqa. Chay cuarto Diospa Templonta qhawajkunaj tiyakunanku qayllapi karqa, Salunpa churin Maseiaspa cuarton patapi. Salunqa Templopi punkuta qhawaj karqa.

⁵ Chantá recabitakunaman vasopi vinota jaywaspa, nerqani: Kay uj chhika vinota ujyarikuychej, nispa.

⁶ Paykunatajrí kutichiwarqanku: Noqaykoqa vinota mana ujyaykuchu, imaraykuchus Recabpa churin ñawpa tatayku Jonadab kamachiwarqayku mana jayk'ajpis vinota ujyanaykuta, noqayku nitaj wawaykukunapis.

⁷ Jinallataj wasita ama ruwakunaykuta kamachiwarqayku, nitaj chajrata tarpunaykuta nitaj uvatapis mallkinaykuta. Kamachillawarqaykutaj toldollapi tiyakunaykuta, ajinamanta kay jallp'api unayta tiyakunaykupaj, maypichus waj llajtayoj runa jina purishayku, chaypi.

⁸ Noqaykoqa Recabpa churin ñawpa tatayku Jonadab tukuy kamachiwasqaykuta kasushallaykupuni. Chayrayku mana jayk'ajpis vinota ujyaykuchu, nitaj warmiykupis, nillataj wawaykukunapis.

⁹ Manallataj wasitapis ruwakuykuchu, nillataj uva huertaykupis kanchu, nitaj tarpuna jallp'aykupis.

¹⁰ Toldollapi tiyakuyku, ñawpa tatayku Jonadabpa kamachiwasqaykuta junt'aspa.

¹¹ Jinapis maypachachus Babiloniaj kuraj kamachejnin Nabucodonosor kay suyuman yaykuykamorqa chaypacha, nerqayku: Jaku Jerusalenman rinachej caldeo soldadokunamanta, chantá arameo soldadokunamantapis pakakunanchejpaj, nispa. Chayraykumin Jerusalenpi tiyakushayku, nispa.

¹² Chantá Tata Diosqa Jeremiasta nerqa:

¹³ Noqa Israelpa Tukuy Atiyniyoj Tata Diosnin kamachiyki, rispa Judapi, Jerusalenpiwan kaj runakunaman sutiypi nimunaykita: Recabitakunaj ruwasqankumanta yachaqakuspa, kamachisqayta kasuychej. Noqa Tata Diosmin chayta nini.

¹⁴ Recabpa churin Jonadabpa ayllonqa ñawpa tatankoj kamachisqanta kasuspa, mana vinota ujyankuchu. Chayrayku paykunaqa kunankama mana vinota ujyankuchu, imaraykuchus ñawpa tatankoj kamachisqanta junt'ashanku. Noqapis qankunaman kutin kutinta parlapayarqaykichej, jinapis qankunaqa mana kasuwankichejchu.

¹⁵ Qhepan qhepanta noqamanta sut'inchajkunata kachamorqaykichej ninasuykichejpaj: Mana allin ruwasqaykichejta, millay kawsayniykichejta ima saqeychej. Ama waj dioskunaj qhepankuta ripuychejchu, nillataj paykunata yupaychaychejchu. Kay nisqaytachus kasuwankichej chayqa, qankunaman, jinataj ñawpa tataykichejmanpis qosqay jallp'api tiyakullankichejpuni, nispa. Chaywanpis qankunaqa manapuni kasuwarqankichejchu, nitaj nisqayta junt'arqankichejchu.

¹⁶ Recabpa churin Jonadabpa ayllonqa ñawpa tatankoj kamachisqanta kasunkupuni. Kay aylluyrí mana kasuta ruwawanchu.

¹⁷ Chayrayku noqa Israelpa Tukuy Atiyniyoj Tata Diosnin nini: Noqa Judapi tiyakojkunaj patanman, jinataj Jerusalén llajtapi tiyakojkunaj patankumanpis tukuy ima ñak'ariykunata kachaykamusaj. Noqa parlapayarqaykichej, qankunatajrí mana kasuwarqankichejchu. Jinallataj wajyarqaykichej, manataj uyariwarqankichejchu, nispa.

¹⁸ Chay jawa Jeremías recabitakunaman nillarqataj: Tukuy Atiyniyoj, Tukuyta Kamachej Tata Dios nin: Qankunaqa ñawpa tataykichej Jonadabpa kamachisqanta kasorqankichej, yachachisqanta ima, junt'arqankichejtaj tukuy paypa nisqanta.

¹⁹ Chayrayku noqa Israelpa Tukuy Atiyniyoj Tata Diosnin niykichejpuni: Recabpa churin Jonadabpa ayllunmanta uj runa kallanqapuni kamachisqayta ruwananpaj, nispa.