Jeremías 33 - DIOSPA QHELQACHISQ

Jamoj p'unchaykunapaj allin willaykuna

¹ Jeremías kuraj kamachejpa wasinta qhawajkunaj pationpi wisq'asqa kashajtin, ujtawan Tata Dios payman nerqa:

² Noqa Tata Dios, pichus kay pachata ruwarqani maychus kananpi sinch'i sayasqa kananpaj, chay Diosmin noqa kani. Noqa Diosmin kay jinata nini:

³ Mañakuway, noqataj t'ukuna imakunata, chantá mana yachasqayki imakunata ima rejsichisqayki.

⁴ Noqa Israelpa Tata Diosnin kayta nini: Qankunaqa wasikunata urmacherqankichej jinataj Judata kuraj kamachejpa wasintapis urmachillarqankichejtaj, chaykunawan perqata sumajta phatuchanaykichejpaj. Ajinata ruwaspa, Babiloniamanta soldadokunata yaykumunankumanta espadawan jark'akuyta munarqankichej.

⁵ Qankunaqa caldeo soldadokunawan maqanakuyta munashankichej. Jinapis Jerusalenmanta runakuna wañuchisqa jinaña kashanku, imaraykuchus sinch'i phiñakuyniypi paykunata wañuchinayta nerqaniña. Millayta ruwasqankurayku noqa paykunata saqerparerqani.

⁶ Chaywanpis qhepanejman kay llajtayojkunata jampispa, qhaliyachisaj. Chantá chhika patata allin kawsaypi paykunata kawsachisaj, nitaj ni imamanta manchachikonqankuchu.

⁷ Noqaqa Judata, Israeltawan watej t'ikarichisaj, jinaspataj, imaynachus ñawpajta karqanku, ajinata sayarichisaj.

⁸ Paykunata contraypi tukuy mana allin ruwasqankumanta llimphuchasaj, jinallataj contraypi oqharikuspa tukuy juchallisqankutapis pampachallasajtaj.

⁹ Chantá Jerusalén llajta kusikunay llajta kanqa, tukuy suyoj ñawpaqenkupi manchay uyarisqa kanqa. Paykunanejta kay pachapi tukuy suyukunaj ñawpaqenpi yupaychasqa, chantá manchay uyarisqa kasaj. Jinataj sonqo tiyaykuy kawsayta qosqayrayku chantá tukuy imawan junt'achisqayta rikuspa, waj suyukunamanta runakuna kharkatitenqanku, nispa.

¹⁰ Tata Dios nillantaj: Qankuna ninkichej: Kay cheqaqa ch'in mana runayoj nitaj uywayoj kashan, nispa. Chaywanpis Jerusalenpa callenkunapi, jinataj Judáj llajtankunapipis, mayqenchus kunan ch'usajpacha kashanku, mana runayoj, nitaj uywayoj, chaypi kusiy takiykuna watej uyarikullanqataj

¹¹ Jinallataj casarakojkunaj kusiymanta takisqanku ima uyarikullanqataj. Chantá Tata Diospa Templonman pachis nispa jaywanata apamojkunaj takisqanku uyarikullanqataj. Kay jinata takenqanku: Tukuy Atiyniyoj Tata Diosman pachis niychej, imaraykuchus Tata Diosqa k'achamin, khuyakuynintaj wiñaypaj, nispa. Arí, noqa kay suyuta watejmanta kutichisaj, ñawpajta karqa, ajinallataj kananpaj. Noqa Tata Diosmin chayta nini.

¹² Tukuy Atiyniyoj Tata Dios nillantaj: Kay suyoqa kunan ch'inpacha kashan, manataj runakuna, nitaj uywakunapis kanchu. Chaywanpis tukuynejpi watej pasto wiñallanqataj, tukuy michejkuna chaypi ovejankuta michinankupaj.

¹³ Chay orqopi kaj llajtakunapi, inti yaykuynej pampapi, Néguev ch'innejpi, Benjamín jap'iypi ima uywankuta yuparispa kanqanku. Jinallataj Jerusalenpa muyuyninpi kaj llajtakunapi, Judá suyoj wakin llajtanpipis watej michejkuna ovejankuta yupaspa kallanqankutaj. Noqa Tata Diosmin chayta nini.

¹⁴ Tata Dios nillantaj: Uj p'unchay jamonqa, chay p'unchaypitaj, imatachus Israelman, Judaman ima qonayta nerqani, chayta noqa junt'asaj.

¹⁵ Chay p'unchaypi Davidpa mirayninmanta uj kuraj kamachejta churasaj, paytaj chay suyupi cheqan kajta, justiciata ima ruwanqa.

¹⁶ Chay p'unchaypi Judapi tiyakojkuna kacharichisqa kanqanku, Jerusalentaj sumaj waqaychasqa kawsakonqa. Chaypacha kay jina sutiwan sutichasqa kanqa: Tata Diosmin Noqanchejpaj Justiciata Ruwaj, nispa.

¹⁷ Noqa Tata Diosmin kayta nini: Mana jayk'ajpis Davidpa mirayninmanta Israelpa kamachinan tiyanapi tiyajqa tukukonqachu.

¹⁸ Jinallataj levitakuna, sacerdotekuna ima kallanqapuni, sapa p'unchay uywa ñak'asqa q'olachinata jaywanankupaj, ch'aki mikhuy jaywanata, waj jaywanata ima jaywanankupaj, nispa.

¹⁹ Tata Dios Jeremiasman nillarqataj:

²⁰ Noqa Tata Dios nini: Manapuni p'unchaywan, ch'isiyaywan trato ruwasqayta p'akiyta atiwajchejchu, imaynachus tutapis p'unchaypis kallanpuni, ajinata.

²¹ Jinallataj kamachiy Davidwan trato ruwasqayta mana pipis p'akiyta atinmanchu, mirayninmanta kamachina tiyanapi uj tiyaykoj mana kananpaj. Jinallataj Leví jatun ayllumanta sacerdoteykunawan trato ruwasqayta manallataj pipis p'akiyta atinmanchu.

²² Kamachiy Davidpa mirayninta, Levijpa mirayninmanta sacerdoteykunatapis may chhikaman mirachisaj janajpi ch'askakuna chhikata, chantá mama qochaj t'iyun chhikata, mana yupay atinata, nispa.

²³ Tata Diosqa Jeremiasta nillarqataj:

²⁴ Manachu reparanki imatachus runakuna nishasqankuta? Paykuna nishanku: Tata Diosqa chay iskaynin ajllakusqan aylluta qhesachan, nispa. Chayrayku pisipaj qhawaspa, aylluytaqa manaña suyupaj jinachu qhawashanku, nispa.

²⁵ Jinapis noqa Tata Dios kayta nini: P'unchaywan, ch'isiyaywanpis noqa tratota ruwarqani, kamacherqanitaj imaynatachus janajwan, kay pachawan purinankumanta.

²⁶ Kikillantataj mana jayk'ajpis Jacobpa mirayninta, nitaj kamachiy Davidpa mirayninmanta kamachinanpaj qhesachasajchu. Paykuna ukhumanta Abrahampa, Isaacpa, Jacobpa mirayninta kamachinanpaj jatarichisaj. Paykunamanta khuyakuspa, watej kay suyuman kutichimpusaj, nispa.