Jeremías 30 - DIOSPA QHELQACHISQ

Tata Diosqa israelitakuna kutimpunankuta nin

¹ Tata Diosqa ujtawan Jeremiasta nerqa:

² Noqa Israelpa Tata Diosnin kayta nini: Kay tukuy nisusqayta uj p'anqaman qhelqay:

³ Uj p'unchay jamushan, chay p'unchaytaj Israelmanta, Judamantawan apasqa kajkuna llajtankuman kutimponqanku. Noqaqa paykunata ñawpa tatankuman qosqay suyuman kutichimusaj, chaypi tiyakunankupaj. Noqa Tata Diosmin chayta nini.

⁴ Kaytamin Tata Dios Israelmanta, Judamantawan Jeremiasman nerqa:

⁵ Tata Dios nin: Runakunata manchachikuywan qhaparishajta uyarini. Sinch'i manchachikuy tiyan, manataj allin kawsay kanchu.

⁶ Ujta tapurisqaykichej: Qhareqa atinmanchu wawata paqarichikuyta? Chayta nini, imaraykuchus qharikunata rikuni onqoj warmi jina nanaywan q'ewiykachakojta. Imaraykutaj aya uyapacha kashankuri?

⁷ Sinch'i ñak'arina p'unchay qayllamushan, chay p'unchay jinaqa mana jayk'ajpis karqachu. Jatun llakiy p'unchay Jacobpa mirayninpaj kanqa. Chaywanpis noqa chaymanta paykunata kacharichisaj.

⁸ Noqa Tukuy Atiyniyoj Tata Dios nini: Wata runa kawsaymanta aylluyta kacharichisaj, watanankukunata p'itirasaj, amaña ujtawan waj llajtayojkunaj wata runanku kanankupaj.

⁹ Chantá noqa Tata Diosninkuta yupaychawanqanku, jinallataj churasqay kuraj kamachej Davidpa kamachiyninpipis kanqanku.

Tata Dios ayllunta kacharichenqa

¹⁰ Noqa Tata Dios nillanitaj: Kamachiy Jacobpa ayllun, ama manchachikuychejchu. Israel, ama mancharikuychu. Noqa qankunata, wawaykichejkunatapis karu llajtamanta kacharichimusaj, maymanchus apasqa karqankichej, chaymanta. Watej allin kawsaypi tiyakunkichej, ni pejpa ima nisqan, ni imata manchachikuspataj.

¹¹ Noqa Tata Dios nillanitaj: Qankunawan kashani kacharichisunaykichejpaj, nispa. Tukuy suyukunata kantumanta tukuchisaj, mayqenkunamanchus ch'eqeracherqaykichej, chaykunata. Jinapis qankunata mana tukuchisqaykichejchu. Juchallikusqaykichejman jina jasut'isqaykichej. Mana jasut'isuspaqa manapuni saqesqaykichejchu. Noqa Tata Diosmin chayta nini.

¹² Tata Dios nillantaj: K'irisqa kasqaykichejqa mana jampiy atina, onqoyniykichejpajpis mana jampi kanchu.

¹³ Qankunaqa mana piniyoj jina kankichej. K'irisqa kasqaykichejta mana pipis jampiykoj kanchu, nillataj jampipis kanchu.

¹⁴ Tukuy waynaykikuna qankunamanta qonqapusonqanku, manañataj pipis qankunamanta yuyarikonqankuchu. Noqa qankunata k'irerqaykichej awqaykichejpis kayman jina. May chhika millay ruwasqaykichejmanta manchay sinch'ita jasut'erqaykichej, mana yupay atina juchaykichejmanta ima.

¹⁵ Imaraykutaj k'irisqa kasqaykichejmanta qhaparqachankichejri? Chay nanayniykichejqa mana jampiy atina. Ashkha millay ruwasqaykichejmanta, mana yupay atina juchaykichejmanta ima ajinata ñak'arichiykichej.

¹⁶ Chaywanpis tukuy qankunata oqoykusojkunaqa oqoykusqallataj kanqanku. Qankunata ch'uskisojkunaqa ch'uskisqallataj kanqanku. Tukuy awqaykichejkunataj waj suyuman apasqa kanqanku. Qankunamanta suwajkunapis suwachikullanqankutaj.

¹⁷ Noqataj tukuy k'irisqa kasqaykichejta jampiykusaj, ajinamantataj nanasqaykikunata thañichisaj, imaraykuchus awqaykichejkuna qanmanta ninku: Sionqa saqerparisqa, manataj pipis paymanta yuyarikunchu, nispa. Noqa Tata Diosmin chayta nini.

¹⁸ Tata Dios nillantaj: Jacobta waj suyuman apasqa kasqanmanta kutichimusaj, suyunmantataj khuyakusaj. Llajtanqa raqaykuna patallapitaj watej sayarichisqa kanqa. Kamachina wasikunapis, maypichus karqanku, chayllapitaj sayarichisqa kanqanku.

¹⁹ Chaypi pachis nispa takiykuna uyarikonqa, kusikuymanta asiykunapis uyarikullanqataj. Noqa paykunata ashkhayachisaj, manañataj pisiyanqankuchu. Mana pipis paykunata pisipaj qhawanqachu, imaraykuchus noqamin paykunata jatunpaj qhawasaj.

²⁰ Israelitakunaqa ñawpajta jina kanqanku, tukuy runankuna ñawpaqeypi sinch'ita sayanqanku. Noqataj paykunata tukuy ñak'arichejkunata jasut'isaj.

²¹ Chantá paykuna ukhumanta kuraj kamachejninku rikhurenqa, paytaj paykunata kamachenqa. Noqaqa payta qayllachimusaj, paytaj qayllamuwanqa. Pitaj noqaman payllamanta qayllaykamuwanmanri?

²² Ajinamanta israelitakunaqa aylluy kanqanku, noqataj Diosninku kasaj. Noqa Tata Diosmin chayta nini.

²³ Tata Diospa k'araj phiñakuynenqa llojlla para jina, sinch'i muyoj wayra jinataj millay ruwajkunaj patankuman choqakun.

²⁴ Tata Diospa k'araj phiñakuynenqa mana thasnukonqachu imatachus pay munasqanta junt'anankama. Qankunataj qhepanejman chaymanta sut'ita yachankichej.