Jeremías 28 - DIOSPA QHELQACHISQ

Jananías llullakuspa, nin Diosmanta sut'inchashasqanta

¹ Kuraj kamachej Sedequías Judá suyupi tawa watataña kamachishajtin, phishqa kaj killapi, Gabaón llajtamanta Azurpa churin sut'inchaj Jananías Jeremiaswan parlarqa. Chantá Diospa Templonpi sacerdotekunaj, jinataj tukuy runaj ñawpaqenkupi Jeremiasta nerqa:

² Israelpa Tukuy Atiyniyoj Tata Diosnin nin: Babiloniaj kuraj kamachejpa atiyninta p'akisaj.

³ Chantá iskay watamanta kuraj kamachej Nabucodonosorqa Diospa Templonmanta Babiloniaman apasqan imakunata kayman kutichimponqa.

⁴ Jinallataj Joacinpa churin Judata kuraj kamachej Jeconiastapis kayman kutichimponqa, pikunachus Judamanta Babiloniaman apasqa karqanku, chaykunatawan. Arí, noqaqa Babiloniaj kuraj kamachejninpa atiyninta p'akisaj. Ajinata Tata Dios nin, nispa Jananías nerqa.

⁵ Chantá Jeremías sut'inchaj Jananiasman kuticherqa, Diospa Templonpi kasharqanku, chay sacerdotekunaj ñawpaqenkupi, jinataj tukuy runaj ñawpaqenkupi ima, nerqataj:

⁶ Arí, may allinchá kanman ajinata Tata Dios ruwajtenqa. Tata Dios sut'inchasqayki junt'akunanta munachun, Diospa Templonpi kaj imakunata kutichimpunankupaj, jinallataj Babiloniaman apasqa kajkunatapis kutichimpunankupaj.

⁷ Chaywanpis kay tukuy runaj ñawpaqenpi kay nisqayta uyariway:

⁸ Manaraj qan, nitaj noqapis kashajtinchej, Diosmanta sut'inchajkuna ashkha suyoj contrankupi, jinataj atiyniyoj kuraj kamachejkunaj contrankupi ima unay willasqankuña maqanakuymanta, yarqhaymanta, onqoymantawan.

⁹ Pi Diosmanta sut'inchaj allin kawsay jamunanmanta willajtin, sichus chay willasqan junt'akun chayqa, chaypacha Tata Diospuni payta kachamusqan yachakun, nispa.

¹⁰ Chaypacha Jananiasqa Jeremiaspa kunkanmanta yugota phaskaraspa, p'akirparerqa.

¹¹ Jinaspataj, tukuy runaj uyarinankuta nerqa: Tata Dios nin: Ajinallatataj iskay watamantawan tukuy suyukunaj kunkankumanta Babiloniata kuraj kamachej Nabucodonosorpa yugo watasqanta phaskaraspa p'akirparisaj, nispa. Chayta Jananías nejtinkamataj, Jeremías riporqa.

¹² Jananías Jeremiasmanta yugota qhechuspa, p'akisqanmanta qhepanejman Tata Dios Jeremiasta nillarqataj:

¹³ Rispa, noqa Tata Dios kay nisqayta Jananiasman nimuy: K'aspimanta yugota p'akerqanki, chaypa cuentanmanta fierromantañataj yugota ruwasaj.

¹⁴ Noqa Israelpa Tukuy Atiyniyoj Tata Diosnin nini: Fierro yugota tukuy suyoj kunkankuman noqa churani, Babiloniamanta kuraj kamachej Nabucodonosorpa kamachinkuna kanankupaj. K'ita animalkunatapis paypa makinman churallanitaj, nispa.

¹⁵ Chaypacha Diosmanta sut'inchaj Jeremiasqa Jananiasta nerqa: Uyariy, Jananías: Mana Tata Dioschu kachamusunki. Llullakuspa parlasqaykiwan kay runakunata q'otiyashanki.

¹⁶ Chayrayku Tata Dios nisunki: Noqaqa kay pachamanta chinkachisqayki. Qanqa kay watapi wañunki, imaraykuchus sut'inchasqaykiwan runakunata enqhaykunki contrayta oqharikunankupaj, nispa.

¹⁷ Jinataj Jeremías nisqanman jina, Jananías chay kikin watapi qanchis kaj killanpi wañorqa.