Jeremías 27 - DIOSPA QHELQACHISQ

Yugomanta rijch'anachina

¹ Kuraj kamachej Josiaspa churin Sedequías Judapi kamachiyta qallarishajtin, Tata Diosqa Jeremiasta nerqa:

² Coyundata, yugota ima ruwakuspa, much'uykiman churaykukuy.

³ Chantá kay suyukunamanta tukuy kuraj kamachejkunaman willachiy: Edomman, Moabman, Amonman Tiroman, Sidonman ima. Paykunaqa Jerusalenman Judata kuraj kamachej Sedequiasta waturikunankupaj runakunata kachamusqanku, qantaj chay kachakunanejta kay nisqayta willachiy.

⁴ Chay kachakunata kamachiy kamachejninkuman kay jinata ninankuta: Israelpa Diosnin Tukuy Atiyniyoj Tata Dios kayta nisunkichej:

⁵ Jatun atiyniywan noqa kay pachata, runakunata, kay pachapi kashanku, chay animalkunatapis ruwarqani. Chantá chay tukuy imata pimanchus munarqani, chayman qorqani.

⁶ Kunanqa noqa kay suyukunata Babiloniata kuraj kamachej kamachiy Nabucodonosorpa makinman churani. Jinallataj k'ita animalkunatapis paypa makinman churallanitaj.

⁷ Tukuy suyukuna Nabucodonosorpa, churinpa, chantá allchhinpa kamachiyninpi ima kanqanku. Chay kanqa kikin Babilonia suyu atipasqa kanan p'unchay chayamunankama. Chaypacha waj jatuchaj suyukuna, jinataj atiyniyoj kuraj kamachejkuna payta atipanqanku.

⁸ Mayqen suyupis, chayrí kamachejkunapis Nabucodonosorpa kamachiyninpi kayta mana munajkunataqa, noqa chay suyukunata maqanakuywan, yarqhaywan, onqoywan ima jasut'isaj tukuyninku paypa atiyninman yaykunankukama. Noqa Tata Diosmin chayta nini.

⁹ Chayrayku sut'inchajniykichejkunata, imachus jamunanmanta parlajkunata, mosqoykunata sut'inchajkunata ama kasuta ruwaychejchu. Nillataj p'ajpakukunata: Rikuni, nispa nejkunatapis, pikunachus umachasunkichej Babiloniaj kuraj kamachejninta ama sirvej rinaykichejta, chaykunatapis amallataj kasuta ruwaychejchu.

¹⁰ Chay tukuy sut'inchasqankoqa llullalla. Chayta kasuspaqa, qankuna jallp'aykichejmanta wijch'usqa kayllata tarikunkichej. Jinallataj qankunaqa noqa ch'eqerachisunaykichejta, wañunaykichejta ima mask'akushankichej.

¹¹ Mayqen suyukunachus kuraj kamachej Nabucodonosorta sirvejkunarí, jallp'ankuta llank'akuspa, suyullankupi tiyakonqanku. Noqa Tata Dios chayta nini.

¹² Noqaqa Judamanta kuraj kamachej Sedequiasmanpis chay kikillantataj nerqani: Babiloniamanta kuraj kamachejpa kamachiyninpi kaychej. Jinallataj runankunaj munasqankutapis ruwallaychejtaj, chantá kawsankichej.

¹³ Imaraykutaj qan, chantá llajta masiykikunawan ima espadawan, yarqhaywan chayrí onqoykunawan wañuchisqa kawajchej? Pikunachus Babiloniamanta kuraj kamachejta mana sirvenqankuchu, chaykunata chay tukuy llakiy qhatirenqapuni.

¹⁴ Chantá pikunachus Babiloniamanta kuraj kamachejta ama kasunaykichejta umachasunkichej, chaykunata ama kasuychejchu, imaraykuchus paykunaj nisqankoqa llullalla.

¹⁵ Tata Dios nin: Noqa paykunata manapuni kachamunichu. Paykunaqa: Diospa sutinpi parlashayku, nispa, llullakushallanku. Paykunatachus kasunkichej chayqa, noqa llajtaykichejmanta wijch'usqaykichej, qankunataj tukuchisqa kankichej, jinallataj chay llulla sut'inchajkunapis, nispa.

¹⁶ Chantá sacerdotekunata, tukuy runatapis nillarqanitaj: Tata Dios kayta nisunkichej: Chay sut'inchajkunata ama kasuychejchu. Paykunaqa nisunkichej: Babiloniamanta ñapis kutichimponqankuña Diospa Templonmanta apasqanku imakunata, nispa. Chay nisqankoqa llullalla.

¹⁷ Ama paykunata kasuychejchu. Astawanpis Babiloniamanta kuraj kamachejpa munayninta ruwaychej, chantá kawsankichej. Imaraykutaj kay llajta raqayllaman tukuchisqa kanmanri?

¹⁸ Sichus cheqapuni sut'inchaj kanku chayqa, sitajchus cheqatapuni paykunaman parlani chayqa, noqa Tukuy Atiyniyoj Tata Diosmanta mañakuwachunku. Noqataj, imachus Templopi qhepakunraj, chay imakunata Babiloniaman apanankuta mana saqesajchu. Jinallataj Judá suyuta kuraj kamachejpa kamachinan wasipi, Jerusalenpipis qhepakunkuraj, chaykunata apajta manallataj saqesajchu, nispa.

¹⁹ Noqa Tukuy Atiyniyoj Tata Dios kayta nini: Babiloniamanta kuraj kamachej Nabucodonosorqa chaypacha Temploj sayantankunata, broncemanta chay jatun yaku churanata ima mana aparqachu. Nitaj chay chukukunata, nillataj Templopi waj imakunatapis aparqachu.

²⁰ Manachayqa payqa Joacinpa churin Judá suyuta kuraj kamachej Jeconiasta, chantá Jerusalenmanta kamachejkunatawan Babiloniaman aparqa.

²¹ Kunantajrí imakunachus Diospa Templonpi, Judamanta kuraj kamachejpa wasinpi, Jerusalenpipis qhepakorqa, chaykunamanta parlaspa, Israelpa Diosnin Tukuy Atiyniyoj Tata Dios nin:

²² Chaykunatapis Babiloniaman apakaponqanku, chaypitaj qhepakonqanku, mayk'ajchari noqa ujtawan kutichimuyta munasaj, chaykama. Noqa Tata Diosmin chayta nini.