Jeremías 24 - DIOSPA QHELQACHISQ

Jeremiaspa mosqoypi jina rikusqan

¹ Babiloniata kuraj kamachej Nabucodonosorqa Joacinpa churin, Judamanta kuraj kamachej Jeconiasta, kurajkunata, jinataj yachajkunata, chantá Jerusalenpi fierrota takayta yachajkunata ima waj suyuman apacherqa. Chaymanta qhepamantaj Tata Diosqa higoyoj iskay canastata rikuchiwarqa, Tata Diospa Templonpa ñawpaqenpi churasqata.

² Ujnin canasta mishkhamanta sumaj poqosqa higoyoj karqa. Chay ujninrí mana allin poqosqa higoyoj karqa, millay mana mikhunapaj jinachu.

³ Chantá Tata Dios tapuwarqa: Jeremías, imatataj rikunkiri? nispa. Noqataj nerqani: Higokunata rikuni. Chay sumaj poqosqa higokunaqa may sumachajpuni kashan. Chay mana walej kajkunarí mana mikhunapaj jinachu, nispa.

⁴ Chantá Tata Dios niwarqa:

⁵ Noqa Israelpa Diosnin Tata Dios kayta nini: Chay sumachaj poqosqa higota jina Judá aylluta allinpaj qhawasaj, mayqentachus kaymanta caldeokunaj suyunkuman apachisaj, chaykunata.

⁶ Paykunata waqaychasaj, kay suyumantaj kutichimusaj. Kaypitaj paykunata allinta sayachisaj, manañataj urmachisajchu. Paykunata mallkisaj, manataj jayk'ajpis t'irasajchu.

⁷ Jinallataj allin yuyayta paykunaman qosaj, noqa Tata Dios kasqayta rejsinawankupaj. Paykunaqa aylluy kanqanku, noqataj paykunaj Diosninku kasaj, imaraykuchus paykuna tukuy sonqowan kutimpuwanqanku.

⁸ Chaywanpis Judamanta kuraj kamachej Sedequiasta, kurajkunata, Jerusalenpi qhepakojkunata, chay waj llajtakunapi tiyakojkunata, Egiptoman tiyakoj rejkunata ima, chaykunata mikhunapaj mana allin kaj higota jina qhawasaj. Noqa Tata Dios chayta nini.

⁹ Paykunawanqa t'ukunapaj jina ruwasaj, paykunata rikuspataj, tukuy runakuna mayta mancharikonqanku. Maymanchus paykunata apachisaj, chay suyukunapi tiyakojkuna paykunamanta alqochakonqanku, asipayanqanku, chantá k'umuykachenqanku ima.

¹⁰ Paykunaman maqanakuta, yarqhayta, onqoytapis apachimusaj, kay suyumanta tukuy chinkanankukama, mayqen suyutachus paykunaman, chantá ñawpa tatankumanpis qorqani, kaymanta, nispa.