Jeremías 23 - DIOSPA QHELQACHISQ

Israelitakunamanta puchojkuna kutimponqanku

¹ Tata Dios nin: Ay, michejkuna imapichus tukukonqanku, pikunachus ovejaykunata ch'eqerachinku, chinkachinkutaj, chaykuna, nispa.

² Chayrayku Israelpa Tata Diosnin nillantaj: Aylluyta michejkuna, qankunaqa ovejaykunata ch'eqeracherqankichej, ayqeracherqankichejtaj, manataj allintachu qhawarqankichej. Chayrayku noqapis millayta ruwasqaykichejmanta jasut'isqaykichej. Noqa Tata Diosmin chayta nini.

³ Tata Dios nillantaj: Noqa kikin puchoj ovejaykunata tantasaj, maymanchus wijch'orqani, chay suyumantapacha kanchankuman kutichimpusaj, chaypitaj mayta miranqanku.

⁴ Chantá waj michejkunata paykunata michinankupaj churasaj, ovejaykunataj mana manchachikonqankuchu, nitaj ni ujpis chinkanqachu. Noqa Tata Diosmin chayta nini.

⁵ Tata Dios nillantaj: Uj p'unchay chayamonqa, chay p'unchaypitaj Davidpa mirayninmanta uj kuraj kamachejta jatarichisaj. Chay kuraj kamachejqa yachaywan, justiciawan, cheqanta ruwaspataj kamachenqa.

⁶ Pay kamachishajtin, Judá suyuta allin renqa, Israel suyupis sumaj waqaychasqa tiyarikonqa. Chay kuraj kamachejtaj sutichasqa kanqa: Tata Diosmin Justiciata Ruwajninchejqa, nispa.

⁷ Tata Dios nillantaj: Uj p'unchay chayamonqa, chaypachataj manaña tilonqankuchu: Tata Diospa sutinrayku tiluyku, pichus israelitakunata Egiptomanta orqhomorqa, chayrayku, nispa.

⁸ Manachayqa tilonqanku: Tata Diospa sutinpi tiluyku, pichus wichaynej suyumanta, chantá tukuynin waj suyukunamantapis, ch'eqerasqa kasharqanku, chay israelitakunata pusakamporqa, chayrayku, nispa. Chantá paykuna kikin suyunkupi tiyakonqanku, nispa.

Llulla sut'inchajkunapaj willay

⁹ Pikunachus Diosmanta sut'inchaj kasqankuta nejkunapaj Jeremías ajinata nerqa: Sonqo p'akisqa kashani, tukuy ukhuytaj kharkatitishan. Machasqa runa jinataj kashani. Phiri machasqa jina kashani Tata Diosrayku, may cheqan nisqanraykutaj.

¹⁰ Kay suyoqa khuchichakuspa millayta ruwanawan junt'a kashan. Kawsayninkoqa millay puriylla, atiyninkutataj mana allin ruwanapaj apaykachanku. Chayrayku Tata Dios kay jallp'ata maldicerqa. Jallp'aqa ch'akiporqa, ch'innejpi kaj pastopis ch'akipullarqataj, nispa.

¹¹ Tata Dios nillantaj: Pikunachus Diosmanta sut'inchaj kasqankuta nejkuna, sacerdotekunapis Diosta mana manchachikoj, millayta ruwajkuna ima kanku. Paykunata kikin Temploypi millayta ruwashajta taripaykuni.

¹² Chayrayku imaynatachus ruwasqankoqa laqhapi llusk'anallankupaj kanqa. Chayman tanqasqa kanqanku, chaypitaj urmanqanku. Maypachachus paykunamanta cuentata mañasaj chaypacha, paykunaj patankuman may ñak'ariyta kachaykamusaj. Noqa Tata Diosmin chayta nini.

¹³ Samariapi tiyakoj sut'inchajkunata rikuni kay millachikuna imata ruwashajta: Paykuna Baalpa sutinpi sut'inchaspa, Israel aylluyta pantachinku.

¹⁴ Jerusalenpi tiyakoj sut'inchajkunatapis manchay millayta ruwashajta rikullanitaj. Paykunaqa khuchichakunku, llullakuspataj purinku. Astawanpis millay ruwajkunata kallpachanku, chayraykutaj paykuna manapuni millay ruwasqankumanta kutirikunkuchu. Paykuna, tukuy chay llajtapi tiyakojkuna ima Sodoma chantá Gomorra llajtayojkuna jina kanku.

¹⁵ Chayrayku noqa Tukuy Atiyniyoj Tata Dios chay sut'inchajkunaj contrankupi nini: Noqaqa k'allku mikhunata paykunaman mikhuchisaj, venenoyoj yakutataj ujyaykuchisaj, imaraykuchus Jerusalenpi kaj sut'inchajkunaj millay ruwasqankoqa tukuy suyumanña junt'aykun, nispa.

¹⁶ Tukuy Atiyniyoj Tata Dios nillantaj: Israelitakuna, ama kasuychejchu sut'inchajkunaj nisqankuta. Paykunaqa llullakuspalla, yuyasqankuman jinalla thawtinku. Imatachus nisqankuta mana noqachu nerqani.

¹⁷ Noqaj willasqayta pisipaj qhawajkunaman nillankupuni: Tukuy ima allillan risonqachej, nispa. Chantá pikunachus rumi sonqoyoj kaspa, millay yuyasqanman jinalla ruwanku, chaykunatapis ninku: Mana ima mana allin kajpis jamusonqachejchu, nispa.

Jeremías ujtawan qhaparikun

¹⁸ Chantá Jeremías nerqa: Pitaj Tata Dioswan karqa nisqanta uyarinanpajri? Pitaj allinta uyarispa, nisqanta kasorqari?

¹⁹ Diospa k'araj phiñakuynenqa llojlla para jina, sinch'i muyoj wayra jinataj millay ruwajkunaj patankuman urman.

²⁰ Tata Diospa k'araj phiñakuynenqa mana thasnukonqachu, imachus ruwananta junt'anankama. Qhepanejman qankunaqa chaykunamanta sut'ita yachaqankichej.

²¹ Tata Dios nin: Mana noqachu chay sut'inchajkunata kachamorqani. Paykunamanqa mana parlallarqanipischu. Jinapis paykuna usqhay usqhayta rispa, sutiypi parlamorqanku.

²² Sichus noqawan kankuman karqa chayqa, aylluyman nisqayta willarankuman karqa. Chay millay ñanmanta kutichimunkuman karqa, jinallataj millay ruwanankuta saqechinkuman karqa, nispa.

²³ Tata Dios nillantaj: Karupipis, chayrí qayllapipis kachun, noqamin Dios kani.

²⁴ Pitaj noqamanta pakakuyta atinmanri? Noqa janaj pachapi, chantá kay pachapipis kashani. Noqa Tata Diosmin chayta nini.

²⁵ Noqa chay sut'inchajkunaj llullakusqankuta uyarini, pikunachus sutiypi parlashasqankuta ninku, chaykunajta. Paykuna ninku: Tata Dios mosqochaspa parlawan, nispa.

²⁶ Mayk'ajkamataj chay sut'inchajkuna jinalla kanqankuri? Jayk'ajkamataj llullakuspa, paykunaj yuyasqallankuta willanqankuri?

²⁷ Chay mosqokusqankuta willanakusqankuwan aylluykuna noqamanta qonqanankuta munanku, imaynatachus ñawpa tatankukunapis qonqarpariwarqanku Baalpa qhepanta ripunankupaj, ajinata.

²⁸ Sichus uj sut'inchaj mosqokun chayqa, imatachus mosqokuspa rikusqanta willachun. Nisqayta uyarejtajrí chayta maychus kajta willachun. Trigowan, pajawanqa mana kikillanchu kanku.

²⁹ Nisqayqa nina jinamin, rumita t'unaj combo jinataj. Ajinata noqa Tata Dios nini.

³⁰ Sut'inchajkunaqa nisqayta ujkuna ujkuna suwanakunku. Chayrayku noqa contrankupi kashani. Noqa Tata Dios chayta nini.

³¹ Noqa chay sut'inchajkunaj contrankupi oqharikuni, imaraykuchus paykunaqa yuyasqankuman jinalla wakichispa, noqaj nisqaypis kanman jina parlanku.

³² Paykunaqa yanqhallata mosqokusqankuta aylluyman sut'inchanku, ajinata ruwaspataj, aylluyta pantachinku. Mana noqaqa paykunata kachamorqanichu, nitaj imatapis kamacherqanichu. Chayrayku paykunaqa ni uj chhikallatapis aylluyta yanapayta atinkuchu. Noqa Tata Diosmin chayta nini.

Llullakuspa sut'inchajkuna

³³ Jeremías, sichus uj runa, uj sut'inchaj, chayrí uj sacerdotepis tapusunkiman: Imatataj Tata Dios ninri? nispa chayqa, qan ninki: Ajinata Tata Dios sut'inchan: Imaynatachus pipis q'epita wijch'uspa, saqerparin, ajinallatataj saqerparisqaykichej, nispa.

³⁴ Sichus uj sut'inchaj, chayrí uj sacerdote, chayrí pi runapis kay jinata ninman: Ajinata Tata Dios sut'inchan, nispa chayqa, noqa chay runata aylluntinta jasut'isaj.

³⁵ Pipis kawsaqenta, chayrí paypa ayllunmanta kajtapis tapukojtenqa, kay jinata niyta atinkichej: Ima nispataj Tata Dios kuticherqari? Imatataj nerqari? nispa.

³⁶ Jinapis qankunaqa ama kay jinata parlaychejchu: Tata Dios ajinata nin, nispa. Pillapis: Tata Dios ajinata nin, nispa ninman chayqa, chay kikin nisqallantataj may llasa q'epiman jina tukuchisaj. Qankuna noqa kawsashaj Diospa nisqayta q'ewispa, uj jinaman tukuchinkichej. Noqa Diosniykichej kani, Tukuy Atiyniyoj Tata Dios.

³⁷ Jeremías, chay sut'inchajkunata tapuriy: Ima nispataj Tata Dios kutichisunkiri? Ima nisunkitajri? nispa.

³⁸ Sichus ninkuman: Ajinata Tata Dios nin, nispa chayqa, qan kay jinata kutichinki: Tata Dios nerqaña amaña chayta ninaykichejta. Ajinata kamachisojtiykichejpis, chayta parlashallankichejpuni.

³⁹ Imaynatachus pipis q'epita wijch'uspa, saqerparillan, ajinallatataj qankunatapis wijch'uspa, qonqayman churasqaykichej. Qankunaman, jinataj ñawpa tataykichejmanpis qorqaykichej, chay llajtatawan, qankunatawan ima ñawpaqeymanta karuman wijch'usqaykichej.

⁴⁰ Qankunaj pataykichejmantaj k'umuykachayta, wiñaypaj p'enqakuytawan apachimusaj, mana jayk'aj qonqanaykichejpaj jina, nispa.