Jeremías 22 - DIOSPA QHELQACHISQ

Judapi kuraj kamachejkunapaj willay

¹ Tata Diosqa Jeremiasta nerqa: Judata kuraj kamachejpa wasinman rispa, kayta willamuy:

² Davidpa kamachinan tiyanapi tiyasqa Judata kuraj kamachej, yanapajkuna, jinataj kay llajtapi tiyakojkuna ima, imatachus Tata Dios nisqanta uyariychej.

³ Tata Dios nin: Kay llajtapi justiciata ruwaychej, cheqan kajtataj. Ñak'arichisqa kajkunata runaj yawarninta ch'onqaspa kawsajkunaj makinkumanta kacharichiychej. Chantá waj llajtayoj runakunata, wajcha wawakunata, warmisapakunata ima ama k'umuykachachiychejchu, nitaj ñak'arichiychejchu. Amataj mana juchayoj runakunata wañuchiychejchu.

⁴ Sichus kamachisqayta tukuy sonqo ruwankichej chayqa, kuraj kamachejkuna Davidpa kamachinan tiyanapi kallanqankupuni. Paykuna llajtaman yaykonqanku carretakunapi, caballokunapi ima, kamachinkunawan chantá llajtapi tiyakojkunawan khuska.

⁵ Sitajchus kay kamachisqayta mana kasunkichejchu chayrí, kay kamachina wasikunatapis raqayllaman tukuchisaj. Noqa Tata Diosmin chayta nini.

⁶ Tata Dios Judata kuraj kamachejpa ayllunmanta nillantaj: Galaad orqo jina qan noqapaj kanki, Líbanoj orqo puntan jinataj. Kunantajrí tiluspa kayta nini: Ch'inman, mana runayoj llajtaman tukuchisqayki.

⁷ Tukuchisunankupaj sumaj armasqa soldadokunata contraykipi kachamusaj. Paykunataj cedromanta sayantaykikunata urmachispa, ninaman enqhaykonqanku.

⁸ Chaymantataj waj suyumanta runakuna chay llajtanta pasaspa, tapunakonqanku: Imaraykutaj Tata Dios kay jinata kay sumaj llajtata ruwarqari? nispa.

⁹ Paykunataj kutichenqanku: Imaraykuchus paykunaqa Diosninku Tata Diospa trato ruwasqanta saqerparispa, waj dioskunata yupaycharqanku, sirverqankutaj, chayrayku, nispa.

Jeremías kuraj kamachej Salunmanta sut'inchan

¹⁰ Kuraj kamachej Josiasmanta ama waqaychejchu, amataj wañusqanmanta llakikuychejchu. Manachayqa churin Salunmanta waqaychej, pay waj suyuman apasqa kasqanmanta, imaraykuchus payqa maypichus paqarisqan llajtaman manaña kutimonqachu.

¹¹ Josiaspa churin Salunqa Judata kuraj kamachej karqa. Paytaj tatanpa cuentanmanta kamachisharqa. Paymantarí Tata Dios nin: Kay suyumanta apasqa kasqanmanta manaña ujtawan kutimonqachu.

¹² Manachayqa, maymanchus apasqa kanqa, chay suyupi wañonqa, manañataj kay suyuta rikukaponqachu, nispa.

Joacinpa contranta sut'inchay

¹³ Ay, Joacín, qan imapichus tukukunki. Mana cheqanta ruwaspa, kamachinayki wasita, jatuchaj wasiykikunata ima oqharerqanki. Runa masiykikunata mana jornalninkuta pagaspalla ruwacherqanki.

¹⁴ Qan ninki: Uj jatun wasita ruwachikusaj, alto patapi jatuchaj cuartoyojta, nispa. Jinallataj jatuchaj ventanayojta ruwachinki. Perqantapis cedrowan k'askaykuchispa, pukata pintaykuchinki.

¹⁵ Cedromanta ruwasqa wasipi tiyakusqaykiraykuchu kuraj kamachej kasqaykita yuyakunki? Tataykeqa kawsashaspa, mikhorqa, ujyarqa, chantá cheqan kajta, justiciata ima ruwarqa. Chayrayku payta tukuy imapi allin rerqa.

¹⁶ Payqa wajchakunaman, ñak'arichisqa kajkunaman ima sayakorqa. Chayrayku payta tukuy imapi allin rerqa. Chaypi yachakun noqata sumajta kasuspa purisqanta. Noqa Tata Diosmin chayta nini.

¹⁷ Qanrí, Joacín, mana allinta ruwaspa qolqe jap'inallamanta wañushanki. Mana juchayojkunata wañuchinki, mana pagaspa runaykikunatapis ñak'arichinki, nispa.

¹⁸ Chayrayku Josiaspa churin Judata kuraj kamachej Joacinmanta parlaspa, kay jinata Tata Dios nin: Pay wañojtin, mana pipis waqanqachu. Mana pipis kay jinata nispa waqaj kanqachu: Ay wawqelláy, ay ñañalláy, ay wiraqochilláy, ay kuraj kamachejnilláy, nispa.

¹⁹ Manachayqa burro wañusqata jina payta p'ampaqanku. Jerusalén llajtamanta qhatatatispa, jawaman wijch'urparenqanku, nispa.

Jerusalén llajtapaj sut'inchay

²⁰ Qan, Jerusalén, Líbano orqoman wicharispa, qhapariy. Basán orqokunapi jatunmanta waqay. Abarín orqomantapacha qhapariy, imaraykuchus qanman tukuy sayakusqa kajkuna atipasqaña kanku.

²¹ Tukuy ima allillanraj rishasojtin, parlapayarqayki, qantajrí mana uyariwayta munarqankichu. Qanqa wayna kasqaykimantapacha ajinapuni karqanki. Nisqaytataj manapuni uyariyta munarqankichu.

²² Kunantajrí tukuy kurajniykikunata wayralla apakaponqa, qanman sayasqa kajkunataj waj suyuman apasqa kanqanku. Chantá qan p'enqaypi k'umuykachashaj rikhurinki, chay tukuy millayta ruwasqaykirayku.

²³ Kunan qanqa thapachakusqaykipi chhika patapi tiyarikushanki, Líbano cedromanta ruwasqa wasikunapi. Qhepamantajrí mayta ñak'arinki, maypachachus paqarichikoj warmej nanaynin jina jamusonqa, chaypacha, nispa.

Jeremiasqa Jeconiasmanta sut'inchan

²⁴ Joacinpa churin Judata kuraj kamachej Coniasman Tata Dios nin: Sutiyrayku tiluni: Paña makiypi uj sellana anillo jina kashajtiykipis, noqaqa chaymantapis orqhospa, wijch'uykiman.

²⁵ Pikunatachus manchachikunki wañuchisuyta munasqankurayku, chaykunaman jaywaykusqayki. Babiloniamanta kuraj kamachej Nabucodonosormanpis jaywaykusqayki, caldeokunaman ima.

²⁶ Qanta, mamaykitawan khuskata wijch'usqaykichej, maypichus mana paqarikojta rikusorqachejchu, chay suyuman. Chaypitaj iskayniykichej wañunkichej.

²⁷ Kutimpuyta munasqaykichej llajtamanqa manañapuni kutimpunkichejchu, nispa.

Jeremías qhaparikun

²⁸ Coniasqa mana ni imapaj walej p'akisqa k'analla jina. Payqa mana rikuy atina lajrasqa yaku p'uñu jina. Imaraykutaj pay tukuy wawankunawan khuska mana rejsisqa suyuman wijch'usqa kanmanri?

²⁹ Kay pachapi tukuy llajtayojkuna, Tata Diospa nisqanta uyariychej.

³⁰ Tata Dios nin: Kay runaj sutinta p'anqaman qhelqaychej, mana wawayoj runata jina, mana imapis allin rejta jina, imaraykuchus mirayninmanta ni pi Davidpa kamachinan tiyanapi tiyaykonqachu Judapi kamachinanpaj, nispa.