Jeremías 20 - DIOSPA QHELQACHISQ

Pasjurpa contranpi willay

¹ Imerpa churin sacerdote Pasjur Tata Diospa Templonpi kuraj kaj sacerdote karqa, paytaj Jeremiasta Diosmanta sut'inchashajta uyarerqa.

² Chantá Pasjur Diosmanta sut'inchaj Jeremiasta seq'onankuta kamacherqa, jinallataj Diospa Templon qayllapi wichaynejpi Benjamín sutiyoj punku qayllapi cepoman churanankuta.

³ Q'ayantintaj Pasjur cepomanta Jeremiasta kacharichinankuta kamacherqa. Chantá Jeremías nerqa: Tata Diosqa Pasjur sutiykej cuentamanta Magor Misabib sutiwan sutichasunki.

⁴ Jinataj Tata Dios nisunki: Qanta mancharikunaman tukuchisqayki, qan kikiykipaj, kawsaqeykikunapaj ima. Qhawashajtiyki, awqaykikunaqa kawsaqeykikunata espadawan wañuchenqanku. Judapi tukuy tiyakojkunatarí Babiloniamanta kuraj kamachejpa makinman jaywaykusaj, paytaj suyuykichejmanta Babiloniaman apasonqachej, chayrí espadawan wañuchisonqachej.

⁵ Jinallatataj kay llajtapi kaj tukuy imata Babiloniaman apanankupaj jaywaykullasajtaj: Judapi kuraj kamachejpa tukuy qhapaj tiyapuyninta, tukuy ima tarisqankuta chantá valorniyoj kapuyninta ima apakaponqanku.

⁶ Qanrí, Pasjur, tukuy aylluykiwan khuska Babiloniaman apasqa kanki. Chaypi wañunki, chayllapitaj qanta p'ampasonqanku, tukuy kawsaqeykikunatawan, pikunamanchus qan llullakuspa Diospa sut'inchajnin jina sut'incharqanki, chaykunata, nispa.

Jeremías llakiymanta waqarikun

⁷ Chantá Jeremías nerqa: Tata Dios, qan misk'i simiykiwan q'otiyawarqanki, noqataj kasuta ruwarqayki. Qan may kallpayoj kasqaykirayku atipawarqanki. Runakunaqa tuta p'unchaynintin asipayawanku, noqamanta alqochakuwaspa.

⁸ Sapa kuti simiyta kicharispa, qhaparini: Ch'ajwa kanqa, thuñisqa kaytaj, nispa. Chayrayku sapa kuti turiyawanku, asiykukuwankutaj nisqaykita willarasqayrayku.

⁹ Sichus nini: Manaña Tata Diospi yuyasajchu, niñataj sutinpipis parlasajchu, nispa chayqa, qanpa nisqaykeqa sonqoypi nina jina ruphaykuwan, tukuy tulluykamataj chayan. Sonqoyta ñit'iykukuyta munashaspapis, manapuni atinichu.

¹⁰ Contraypi runakuna chhichinakuspa parlashajta uyarini: Tukuynejpi manchachikuy tiyan. Jamuychej, payta ch'ataykusunchej, nispa. Tukuy kawsaqeykuna imallapipis pantanayta suyashanku. Chantá nillankutaj: Ichapis q'otiyayta atisunman, chaywantaj payta atipaykusunchej. Ajinamanta paymanta vengakusunchej, nispa.

¹¹ Qanrí Tata Dios, noqawan kashanki, may kallpasapa wapu soldado jina. Chayrayku qhatiykachawajkunaqa misk'anqanku, manataj atipawayta atenqankuchu. Tukuy ruwasqanku mana allin llojsejtin, p'enqaypi rikhurenqanku. Wiñaypajtaj mana allinpaj qhawasqa kanqanku.

¹² Tukuy Atiyniyoj Tata Dios, Qanmin cheqan runaj sonqonta qhawanki. Qanmin runaj sonqonta, yuyayninta ima watunki. Noqamanpis imaynatachus paykunata jasut'ispa pagachikusqaykita rikuchiway, imaraykuchus qanllaman llakiyniyta willakuni waqaychasqa kanaypaj.

¹³ Tata Diosman takiychej, Tata Diosta jatunchaspa takiychej, imaraykuchus payllamin llakiypi kajta millay ruwajkunaj makinkumanta kacharichin.

Jeremías yuyarikun paqarikusqan p'unchaymanta

¹⁴ Paqarisqay p'unchayqa maldicisqa kachun. Maypachachus mamay paqarichikuwarqa, chay p'unchayqa ama saminchasqachu kachun.

¹⁵ Tatayta kusichej runaqa maldicisqa kachun: Uj qhari wawa paqaripusunki, nispa willajqa.

¹⁶ Chay runaqa, imaynatachus Tata Dios wiñaypaj llajtakunata phirin, ajina chinkachisqa kachun. Chay runa sut'iyaymantapacha nanaywan qhaparisqankuta uyarichun, chawpi p'unchaypitaj maqanaku ch'ajwata uyarichun.

¹⁷ Tata Diosqa mamaypa wijsallanpiraj wañuchinawan karqa. Mamaypa wijsanpi p'ampakuyman karqa. Ajinapi mana jayk'ajpis paqariymanchu karqa.

¹⁸ Imapajtaj mamaypa wijsanmanta llojserqaniri, kay jina nanayta, llakiyllata rikunaypaj, kawsayniytaj p'enqaypi tukukunanpajri? nispa.