Jeremías 18 - DIOSPA QHELQACHISQ

Manka ruwajmanta rijch'anachina

¹ Tata Diosqa Jeremiasman nerqa:

² Mankata ruwajpa wasinman riy, chaypitaj willachiyniyta rejsichisqayki, nispa.

³ Chantá noqa rispa, manka llut'a runata torno patapi mankata ruwashajta rikorqani.

⁴ Jinapi imatachus ruwasharqa, chay mana allin llojsejtin, chay kikin t'urullamantataj watej ruwallarqataj, munasqanman jina llojsinankama.

⁵ Chantá Tata Dios niwarqa:

⁶ Manachu noqapis qankuna israelitakunawan ruwayta atini, imaynatachus manka llut'a runa t'uruwan ruwarqa, ajinata? Qankuna makiypi kankichej manka ruwajpa makinpi t'uru jina. Ajinata noqa Tata Dios nini.

⁷ Mayk'ajllapis munaspa uj suyuta, manachayqa kamachiytapis t'irayta atiyman, chantapis urmachiyta, chayrí phiriyta.

⁸ Chantá sichus chay suyupi tiyakojkuna millay ruwasqankumanta t'aqakunku chayqa, jasut'inayta nerqani, chayta manaña junt'asajchu.

⁹ Jinallataj niyta atiyman uj suyuta chayrí uj kamachiyta wiñachinayta, chayrí sayarichinayta.

¹⁰ Sitajchus chay suyupi tiyakojkuna millayta ruwaspa, kamachisqayta mana kasunku chayqa, ima allinkunatachus paykunapaj wakichiporqani, chayta manaña junt'asajchu.

¹¹ Niy ari Judamanta runakunaman, jinataj Jerusalenpi tiyakojkunaman ima, noqa Tata Diosmin imatachus nini, chayta: Noqa qankunata jasut'inaypaj jatun ñak'ariyta wakichishani. Chayrayku millay puriyniykichejmanta kutirikuychej, kawsayniykichejta, ruwasqaykichejtapis allinchaychej, nispa.

¹² Chaywanpis paykuna nisonqanku: Ama tiempoykita usuchiychu. Noqaykoqa munasqaykuman jinalla kawsakusqayku, k'ullukuspataj, sonqoykoj millay yuyasqanman jina ruwasqayku, nispa.

¹³ Chayrayku Tata Dios nin: Waj suyukuna ukhupi tapuriychej, ichapis pillapis kayman rijch'akojta uyarin. Mana qharej chayasqan sipas jina Israelqa manchay millayllatapuni ruwan.

¹⁴ Libanopi orqopi rit'eqa chinkapunchu? Chayrí orqomanta phajchamoj yaku tukukapunmanchu?

¹⁵ Chaywanpis aylluy qonqarparipuwanku, jinataj qhasi manakaj dioskunaman inciensota q'oshñichinku. Paykunaqa qallariymantapacha yachachisqayta mana kasunkuchu. Chayrayku paykunaqa k'ullku ñankunata purinku, manataj jatun ñantachu.

¹⁶ Ajinamanta paykuna suyunkuta ch'inman tukucherqanku, wiñaypaj runaj asikunan kananpaj. Tukuy chayninta purejkuna t'ukuspataj, umankuta khiwirenqanku.

¹⁷ Noqaqa inti llojsimuynejmanta ch'aki wayra jina aylluyta awqankoj ñawpaqenkupi ch'eqerachisaj. Noqa paykunaman wasallayta rikuchisaj, manataj qhawarisajchu, maypachachus ñak'arinanku p'unchay chayamonqa, chaypacha, nispa.

Jeremiaspa contranta oqharikunku

¹⁸ Chantá runakuna nerqanku: Jeremiaspa contranpi wakichikuna. Mana jayk'ajpis sacerdotekuna yachachinawanchejpaj pisiwasunchu, nitaj yachayniyojkunapis umachanawanchejpaj, nillataj Diosmanta sut'inchajkunapis Diospa nisqanta willanawanchejpaj. Jeremiaspa contranta rimakunachej, amataj ni ima niwasqanchejta kasunachejchu, nispa.

Jeremiasqa Diosmanta watej mañakun

¹⁹ Chantá noqa Dioswan parlarikuspa nerqani: Tata Dios, allinta uyariway. Awqaykunaj nisqankutapis uyarillaytaj.

²⁰ Allin kajta ruwaytaqa mana allinta ruwaspachu kutichina? Paykunaqa t'oqota allanku chayman wijch'uykunawankupaj. Yuyarikuy ñawpaqeykiman jamuspa paykunaj allinninkuta mañapusqayta, paykunamanta k'araj phiñakuyniykita karunchanaykipaj.

²¹ Kunantajrí wawankuta yarqhaywan wañuchiy, chayrí espadawan. Warminkupis warmisapa qhepakuchunku, mana wawayojtaj. Qosankupis millay onqoywan wañuchunku. Wayna wawankupis maqanakupi wañuchisqa kachunku.

²² Kaymanta jinalla contrankuta soldadokunata kachaykuy, manchariywan qhaparqachasqanku uyarikunanpaj. Paykunaqa t'oqota allanku wijch'uykunawankupaj, purinaymantaj tojllata churamunku.

²³ Qantajrí Tata Dios, wañuchinawankupaj imatachus contraypi ruwayta yuyashanku, chayta yachanki. Chay millay ruwasqankumanta ama paykunata qhespichiychu, nitaj juchankuta pampachaychu. Ñawpaqeykipi urmachisqa kachunku. Phiñakuyniykiwan ñak'arichiy, ajinata paykunawan ruway.