Isaías 9 - DIOSPA QHELQACHISQ

Diospa ajllakusqan paqarenqa

¹ 1 (8.23) Chaywanpis mana wiñaypajchu llakiykuna, ñak'ariykuna kanqa. Ñawpajta Zabulonpa jap'iynin, chantá Neftalíj jap'iyninwan ñak'arichisqa karqa. Aswan qhepamanrí k'anchay rikhurenqa mama qochaman rej ñannejpi, Jordán mayu chimpapi, mana judío kajkunaj Galilea jallp'ankupi.

² 2 (1) Laqhapi purej runakunaqa jatun k'anchayta rikonqanku, wañuypa laqhayayninpi tiyakoj runakunamantaj k'anchaykamonqa.

³ 3 (2) Qanqa kay Israel suyupi tiyakojkunata miraykuchinki, kusiywantaj junt'achinki. Ñawpaqeykipi tukuy kusikonqanku, imaynatachus runakuna poqoyta oqharispa kusikunku, ajinata. Maytapuni kusikonqanku, imaynatachus soldadokuna maqanakupi qhechusqankuta rak'inakuspa kusikunku, ajinallatataj.

⁴ 4 (3) Qanqa paykunata yugoman watasqa jina ñak'ariymanta kacharichinki. Jinallataj llasa q'epita wasankumanta q'epirachinki, chantá sinch'i llakiypi jarap'asqa kasqankumanta ima. Jinataj kamachinanku varatapis p'akillankitaj, imaynatachus Madianwan ruwarqanki, ajinata.

⁵ 5 (4) Soldadokunaj yawarpura p'achanku, botanku ima ninapi ruphachisqa kanqanku.

⁶ 6 (5) Uj qhari wawa paqaripuwanchejña, Diostaj uj qhari wawata qowanchej. Kamachinanpaj jatun ateyqa paywan kanqa. Paytataj sutichanqanku: May K'acha Yuyaychaj, Tukuy Atiyniyoj Dios, Wiñay Kawsayniyoj Tata, Allin Kawsayta Apamoj Kamachej ima.

⁷ 7 (6) Kamachisqan, chantá allin kawsayta qosqanpis wiñaypaj mana tukukuyniyoj kanqa. Davidpa kamachinan tiyanamanta justiciawan wiñay wiñaypaj kamachenqa. Chaytataj Tukuy Atiyniyoj Tata Diosmin sinch'i munakuyninrayku ruwanqa.

Tata Dios Israelpaj k'arajta phiñakun

⁸ 8 (7) Tukuyta Kamachej Diosqa Israel suyupaj nisqanta willarqa, Jacobpa aylluntataj juchachan.

⁹ 9 (8) Chaytaqa Efrainmanta tukuy runakuna yachanqanku, jinallataj Samariapi tukuy tiyakojkunapis. Paykunaqa may kasqankuta yuyakuspa, wapu wapu, ninku:

¹⁰ 10 (9) Ladrillomanta perqakuna urmasqata, watej sumaj ch'eqosqa rumiwanñataj ruwasunchej. K'ita higo sach'akuna k'utusqapitaj, cedro sach'atañataj churasunchej, nispa.

¹¹ 11 (11) Tata Diostajrí Resinpa awqankunata pusamun Israelpa contranpi, paykunatataj maqanakuman tanqaykun.

¹² 12 (11) Siriokunaqa inti llojsimuynejmanta jamunku, inti yaykuynejmantataj filisteokuna jamunku. Chaykunataj Israelta ujllata simi junt'ata oqoykuspa chinkarqarichenqanku. Chaywanpis Tata Diospa phiñakuynenqa manarajpuni thasnukunchu, jasut'inanpaj wakichisqallapuni kashan.

¹³ 13 (12) Israelitakunarí chay jina jasut'isqa kashaspapis, Diosman manapuni kutirikorqankuchu, nillataj Tukuy Atiyniyoj Tata Diosta mask'arqankuchu.

¹⁴ Chayrayku Tata Diosqa Israel suyoj umanta, chupantawan qholonqa uywata jina. Chantá palma sach'ata jina, t'uturata jinataj uj p'unchayllapi k'utonqa.

¹⁵ 15 (14) Chay uma ninakun Israelpa kurajnin chantá sumachajnin runakunawan. Chupatajrí ninakun pikunachus llullallata parlaspa ninku Diosmanta sut'inchasqankuta, chaykunawan.

¹⁶ 16 (15) Chay kamachejkunaqa runakunata ch'awkiyaspa, pantay ñanta pusanku.

¹⁷ 17 (16) Chayrayku Tata Dios waynakunamanta mana kusikunchu, manataj khuyanchu wajcha wawakunamanta, nitaj warmisapakunamantapis. Tukuyninku millayta ruwajkuna, juchasapataj kanku, jinallataj tukuyninku millay imakunallata parlanku. Chay tukuywanpis, Tata Diospa k'araj phiñakuynenqa manarajpuni thasnukunchu. Payqa jasut'inanpaj makin oqharisqallarajpuni kashan.

¹⁸ 18 (17) Tukuy millay ruwayqa nina jina lawrarin. Imaynatachus nina q'olaykun khishkakunata, qhorakunata ima, ajinata lawrarin, imaynatatajchus sach'akunata q'olaykun, q'oshñipis chaymanta manchayta llojsimun, ajinata.

¹⁹ 19 (18) Tukuy Atiyniyoj Tata Diospa phiñakuyninrayku tukuy suyu lawrarishan, runakunataj ninata enqhanapaj llant'a jina kanku. Chaypacha mana pipis runa masinta khuyanqachu.

²⁰ 20 (19) Paña makinwan suwanqa. Chaywanpis yarqhasqallapuni qhepakonqa. Lloq'e makinwan mikhullanqataj, manataj sajsakonqachu. Sapa ujpis wawankoj aychanta mikhukapullanqankutaj.

²¹ Manasés jatun aylloqa Efraín jatun aylluwan maqanakonqanku, iskayninkutaj Judá jatun aylloj contrantañataj sayarenqanku. Chaywanpis Tata Diospa k'araj phiñakuynenqa manarajpuni thasnukunchu, makintaj oqharisqallapuni kashan paykunata jasut'inanpaj.