Isaías 66 - DIOSPA QHELQACHISQ

Diospa juicion

¹ Tata Dios nin: Janaj pachaqa noqaj kamachinay tiyana, kay pachataj chakiypa sarunan. Jina kajtenqa, maypitaj wasita ruwapuwankichejmanri? May cheqapitaj noqaqa samarikusajri?

² Noqa makiywan kay tukuy imata ruwarqani, ajinamantataj kay tukuy ima rikhurerqa. Ajinata noqa Tata Dios nini. Chantá nillanitaj: Pichus llamp'u sonqoyoj kajta noqa qhawasaj, pikunachus nisqayta uyarispa kharkatitinku, chaykunata.

³ Chaywanpis pichus wakata ñak'aspa jaywawajqa uj runata wañuchejwan ninakun. Corderota ñak'aspa jaywanata apamojqa alqotapis wañuchispa jaywanman jina. Ch'aki mikhuy jaywanata apamojqa khuchej yawarninta apamojman ninakun. Inciensota q'oshñichejqa lantitapis yupaychanman jina kashan. Paykunaqa sapa ujninku imatachus munasqankuta ajllakunku, chay millay ruwasqankuwantaj sonqonkupi kusikunku.

⁴ Noqapis paykunapaj ñak'arinata ajllasaj. Imatachus manchachikunku, chaytapuni paykunaman apachimusaj. Noqaqa wajyarqani, manataj pipis kasuwarqachu. Parlapayarqani, manataj pipis uyariwarqachu, manachayqa rikunayta millayta astawan ruwarqanku. Paykunaqa imatachus mana rikuyta munasqaytapuni ajllakorqanku.

⁵ Noqa Tata Diospa nisqayta uyariychej, pikunachus simi nisqayta uyarispa kharkatitejkuna. Qankunataqa llajta masiykichej chejnikusunkichej. Noqaj sutiyraykutaj jawaman qankunata qharqospa, nisunkichej: Tata Diosqa jatun kayninpa lliphipiyninta rikhurichichun, chayta rikuspa qankuna kusikuyta atinaykichejpaj, nispa. Chaywanpis paykunaqa p'enqaypi rikhurenqanku.

⁶ Llajta ukhupi ch'ajwa uyarikun, Templomantapis uj qhapariy uyarikun. Chayqa Tata Diospa qhapariynin, awqankunamanta vengakushajtin.

⁷ Sión llajta manaraj tiemponpi qhari wawata paqarichikorqa, manaraj nanaynin jap'ishajtin.

⁸ Pitaj chayman rijch'akojta uyarinman karqari? Pitaj chay jinata rikunman karqari? Uj suyu ajinatachu uj p'unchayllapi rikhurinmanri? Uj llajta ajinatachu ujllapi rikhurinmanri? Chaywanpis Sión llajtata ujllata nanay jap'ejtinkama, wawankunata paqarichikunpacha.

⁹ Noqa uj suyu rikhurinanpaj wakichiytawan, noqallatajchu jark'ayman ama paqarikunanpaj? Ajinata Tata Diosniyki nin.

Jerusalenpa jamoj kusikuynin

¹⁰ Jerusalenwan khuska mayta kusirikuychej, payta munakojkuna. Payrayku llakiywan tukuy waqajkuna, tukuy kusisqa kaychej.

¹¹ Imaynatachus wawa mamanmanta ñuñuspa sajsakun, ajinata qankunapis sonqochasqa kankichej, maytataj kusikunkichej chhika patapi kaspa.

¹² Tata Dios kay jinata nin: Noqa Jerusalén llajtaman allinpi kawsanata qosaj uj yaku mayuta jina, tukuy suyoj qhapaj kayninkutawan jaywasaj, mayu yakupis llump'irishanman jinata. Chay llajtapitaj qankunaqa ñuñoj wawakuna jina kusikunkichej, marq'arikusonqachej, arphin patapitaj chukurichisonqachej.

¹³ Imaynatachus mamaqa wawanta sonqocharin, ajinallatataj noqapis qankunata sonqocharisqaykichej. Sonqochasqa kaytaqa Jerusalenpi tarinkichej, nispa.

¹⁴ Chayta rikuspa, mayta kusikunkichej. Ukhuykichejpi sumajta kallpachasqa kankichej, qhallallarishaj qhora jina. Tata Diospa kamachinkunaqa atiyninta sumajta rejsenqanku, awqankunamantajrí phiñakuyninta rikuchenqa.

¹⁵ Chantá Tata Dios ninaj chawpinpi jamonqa, maqanakunapaj carretantaj muyoj wayra jina chayamonqa, manchay k'araj phiñakuyninwan paykunata jasut'inanpaj. Paypa jasut'iynintaj nina lawray jina kanqa.

¹⁶ Tata Dios tukuyta juzganqa, jinataj may chhika runakunata ninawan, espadawan ima wañurachenqa.

¹⁷ Huertapi tukuy llimphuchakojkuna, pikunachus khuchi aychata, juk'ucha aychatapis, ch'ichipaj qhawasqa animalkunatapis mikhunku, chaykunaqa tukuyninku wañuchisqa kanqanku. Ajinata noqa Tata Dios nini.

¹⁸ Noqa yachani paykunaj mana allin ruwasqankuta, imatachus yuyasqankutapis. Aswan qhepaman uj p'unchay chayamonqa tukuy suyuta, tukuy llajtapi tiyakojkunata ima ujllaman tantanaypaj. Chayman jamuspa, paykuna jatun kayniypa lliphipiyninta rikonqanku.

¹⁹ Noqa paykunaj chawpinkuman uj señalta churasaj. Chantá paykunamanta wakin ayqekojkunata kay suyukunaman kachasaj: Tarsisman, Libiaman, arcowan flechayta yachaj Lidiaman, jinallataj, Tubalman, Greciaman, mama qochapi karu kaj churukunapi tiyakojkunaman ima. Paykunaqa manchay uyarisqa kasqaymanta mana yachankuchu, manataj jayk'ajpis jatun kayniypa lliphipiyninta rikunkuchu. Chaymantataj chay ayqekojkuna jatun kayniypa lliphipiyninmanta tukuy chay suyukunaman willanqanku.

²⁰ Paykunallataj tukuy suyumanta tukuy aylluykichejta pusamonqanku, uj jaywanatapis Tata Diosman apamushankuman jina. Caballokunapi, carretakunapi chayamonqanku, wantunapi, mulakunapi, camellokunapi ima, Jerusalén ajllakusqay orqoyman. Ajinata noqa Tata Dios nini. Imaynatachus israelitakuna jaywanata apamunku Tata Diospa Templonman llimphu vasokunapi, kikillantataj aylluykichejta pusampusonqachej.

²¹ Chantá paykunamanta wakinta ajllakusaj sacerdotekuna, levitakuna kanankupaj. Ajinata noqa Tata Diosqa nini.

²² Mosoj janajta, mosoj kay pachatawan ruwasqayqa ñawpaqeypipuni wiñaypaj kanqanku. Ajinallatataj mirayniykichejqa unayta kanqanku, sutiykichejpis mana jayk'ajpis chinkanqachu. Ajinata noqa Tata Dios nini.

²³ Killamanta killa, sapa mosoj killapi, sapa samarina p'unchaypi, paykuna tukuyninku noqata yupaychawaj jamonqanku. Ajinata noqa Tata Dios nini.

²⁴ Chantá chaymanta llojsispa, rikonqanku pikunachus contraypi oqharikojkunaj ayankuta. Chay wañusqa runakunata mikhoj khurukunaqa mana wañonqankuchu. Paykunata q'olashan, chay ninapis mana thasnukonqachu. Chayta rikuspataj, tukuy runakuna mayta millachikonqanku.