Isaías 65 - DIOSPA QHELQACHISQ

Mana kasojkunapaj jasut'i

¹ Tata Dios nin: Noqamanta mana tapukojkunaman rejsichikorqani, mana mask'awajkunawantaj tarichikorqani. Sutiyta mana oqharikojkunaman noqa nerqani: Kaypi kashani, nispa.

² Sapa p'unchay chay mana kasukoj runakunaman makiyta jaywarqani, pikunachus mana cheqan ñanta purinkuchu, manachayqa millay yuyayninkuman jinalla purinku, chaykunaman.

³ Chaykunaqa sapa kuti phiñachillawankupuni, huertakunapi uywa ñak'asqata jaywaspa, ladrillomanta altarkunapitaj inciensota q'oshñichispa ima.

⁴ Paykunaqa aya p'ampana chawpipi tiyakunku wañusqakunata tapunankupaj, pakay cheqakunapitaj tutantin sut'iyanku. Khuchi aychata mikhunku, jinataj mana llimphupaj qhawasqa uywa ñak'asqatapis mankankupi chayachinku.

⁵ Paykunapura ninakunku: Maypichus kanaykipi kakullay, amataj qayllamuwaychu, imaraykuchus noqa qanmanta aswan llimphu kani, nispa. Chaykunaqa q'oshñi jina senqayta k'arachiwanku, tukuy p'unchaynintin nina lawray jina kanku.

⁶ Chaywanpis imatachus ruwanayqa ñawpaqeypi qhelqasqa kashan, chaypitaj nin: Manapuni ch'inllachu kasaj, manachayqa millay ruwasqaykichejman jina t'inkaykichejta qopusqaykichej, nispa.

⁷ Chantá Tata Dios nillantaj: Juchaykichejrayku, ñawpa tataykichejpa juchankurayku ima pagapusqaykichej, imaraykuchus paykunapis orqo patapi, chantá loma patapipis inciensota q'oshñicherqanku. Chayrayku noqaqa ñawpa juchaykichejman jina pagota qopusqaykichej, nispa.

Mosoj Jerusalén

⁸ Tata Dios nillantaj: Imaynatachus pipis sumaj uva chhullchuta tarispa, nin: Ama kaytaqa usuchiychu, imaraykuchus chaymanta sumaj vinota ruwasun, nispa, ajinallatataj kamachiykunamanta mana tukuynintachu chinkachisaj.

⁹ Manachayqa Jacobpa churinkunata mirachisaj, Judá ayllumantataj wakinta ajllakusaj, orqoykunata chayaqenkupaj paykunaman qonaypaj. Ajllakusqaykunaqa chayaqenkupaj jallp'ata jap'enqanku, chaypitaj kamachiykuna tiyakonqanku.

¹⁰ Mask'awaj kamachiykuna ovejankukunata Sarón pampapi mirachenqanku, wakankutataj Acor vallepi samarichenqanku.

¹¹ Qankunarí, noqa Tata Diosta saqerpariwankichej, ajllakusqay orqomantataj qonqapunkichej. Chantá suerteta choqanaykichejpaj mesakunata churankichej, jinataj mana rejsisqa dios Gadman, Mení diosman ima vinowan ch'allankichej.

¹² Chayrayku noqapis qankunata churasqaykichej espadawan wañuchisqa kanaykichejpaj. Tukuyniykichej ñak'asqa kanaykichejpaj qonqorikunkichej, imaraykuchus chhikata wajyashajtiy, mana kasuta ruwawarqankichejchu. Qankunaman parlapayashajtiypis, mana uyariwaj tukorqankichej, rikunaytataj tukuy ima millayta ruwarqankichej. Imachus noqaman mana allinchu rijch'awan, chaytapuni qankuna ajllakorqankichej.

¹³ Chayrayku Tukuyta Kamachej Tata Dios nisunkichej: Kamachiykunaqa sumajta mikhonqanku, qankunatajrí yarqhaymanta wañunkichej. Kamachiykunaqa sumaj yakuta ujyanqanku, qankunatajrí yaku ch'akiywan ñak'arinkichej. Kamachiykunaqa kusikonqanku, qankunatajrí may p'enqachisqa kankichej.

¹⁴ Kamachiykunaqa tukuy sonqowan sumajta takirikonqanku, qankunatajrí sonqo nanayta mana piniyoj jina mayta llakiywan waqankichej.

¹⁵ Chantá sutiykichejta oqharispa, ajllakusqay runakuna waj runakunata maldicenqanku. Noqa Tukuyta Kamachej Tata Dios qankunata wañurachisqaykichej, kamachiykunatataj waj sutiwan sutichasaj.

¹⁶ Pipis kay suyupi wajta saminchayta munajqa noqa cheqa kaj Diospa sutinpi payta saminchanqa. Pichus tiluyta munajqa noqa cheqa kaj Diospa sutinrayku tilonqa. Qallariymantapacha ima llakiykunachus karqa, chaykuna qonqasqa kanqanku, manataj ujtawan rikunaypaj pakasqa kanqa.

Janajwan kay pachawan mosoj kanqanku

¹⁷ Uyariwaychej, noqa janajta, kay pachatawan mosojta ruwasaj. Ñawpajta imachus kajqa qonqasqa kanqa, manañataj yuyarisqachu kanqa.

¹⁸ Qankuna maytapuni wiñaypaj kusikunkichej chayta ruwasqayrayku. Jerusalenta jatunta kusikunapaj ruwasaj, jinallataj chaypi tiyakoj runakuna kusikunankupaj.

¹⁹ Chaypacha Jerusalén llajtarayku kusikusaj, aylluytaj noqapaj may jatun kusiy kanqa. Chay llajtapi manaña jayk'ajpis waqajkunata uyarenqankuchu, nitaj llakiywan qhaparejkunatapis.

²⁰ Chaypi wawakunaqa manaña paqarisqankutawankama wañonqankuchu, machu runakunapis may jina unayta kawsanqanku. Pachaj watanpi wañojqa waynallarajpis wañushanman jina kanqa. Pachaj watata mana kawsajtaj maldicisqapis kanman jina qhawasqa kanqa.

²¹ Chaypi wasita ruwakuspa, tiyakonqanku. Uva huertata mallkenqanku, chaymantataj poqoyninta mikhonqanku.

²² Wasikunata ruwakojtinku, mana wajkunachu chaypi tiyakaponqanku. Jinallataj uva huertata mallkikojtinku, mana wajkunachu poqosqanta mikhukaponqanku. Aylloyqa sach'a jina unayta kawsanqa. Jinamanta ajllakusqaypis makinkoj tarpusqanta mikhurikonqanku.

²³ Paykunaqa mana qhasipajchu llank'anqanku, nitaj wawankutapis llakiypi kawsanankupajchu paqarichikonqanku. Ajina kanqa, imaraykuchus noqa Tata Dios paykunatawan, mirayninkutawan ima saminchasaj.

²⁴ Paykuna manaraj qhaparikamushawajtinku, noqa uyarisajña. Manaraj parlayta tukushajtinku, uyarisajpacha, imatachus munasqankutataj jaywasaj.

²⁵ Atojwan, ovejawanqa khuska mikhonqanku. Leonqa waka jina ichhuta mikhonqa. Kataritaj ñut'u jallp'ata mikhonqa. Chay ajllakusqay orqopeqa manaña pipis aylluyta llakichenqachu, manañataj pipis paykunata ñak'arichenqankuchu, nispa. Ajinata Tata Dios nin.