Isaías 64 - DIOSPA QHELQACHISQ

¹ Tata Dios, sichus janajta llik'ispa, urayk'amuwaj chayqa, qanpa ñawpaqeykipi tukuy orqokuna kharkatinkuman.

² Imaynatachus nina ch'awjrata rupharparin, chayrí mankapi yakutapis t'impuchin, ajinallatataj qanpis jamuspa, awqaykikunaman sutiykita rejsichiy, qanpa ñawpaqeykipitaj tukuy suyu kharkatitichunku.

³ Maypachachus qan urayk'amuspa, mana jayk'aj rikusqayku t'ukunata rikuchiwarqayku chaypacha, tukuy orqokuna ñawpaqeykipi manchayta kharkatiterqanku.

⁴ Runakunaqa mana jayk'ajpis uyarerqankuchu, nitaj rikorqankuchu qan jina Diostaqa, pichus qanpi atinikuspa suyakojkunapaj ajinata ruwapojtaqa.

⁵ Qanqa allinpaj qhawanki, pikunachus cheqan kajta kusiywan ruwanku, chaykunata, pikunachus yachachisqaykita qhatinku, chaykunatapis. Chaywanpis qan juchallikusqaykumanta phiñakorqanki, imaraykuchus unaymantapacha contraykita oqharikuyku. Ajinata ruwashaspapis, yuyaykumanchu qan qhespichinawaykuta?

⁶ Tukuyniyku mana llimphupaj qhawasqa runa jina kayku, tukuy ima allin ruwasqaykupis millay ch'ichi thanta jina. Noqaykoqa sach'a laqhe jina qawiyku, millay ruwasqaykutaj wayra jina apaykachawayku.

⁷ Noqayku ukhupi mana pipis kanchu sutiykita oqharispa Diosninpaj rejsikapusojqa, nitaj pipis qanpi atinikoj kanchu. Chayrayku qan uyaykita noqaykumanta pakanki, jinataj millay ruwasqaykuman urmaykojta saqellanki.

⁸ Chaywanpis, Tata Dios, qanmin tatayku kanki. Noqaykoqa llink'i t'uru jinalla kayku, qantaj manka llut'aj jina kanki. Chayrayku noqaykoqa tukuyniyku makiykej ruwasqan kayku.

⁹ Tata Dios, ama ari chay jinataqa phiñakuychu, amataj juchaykumanta yuyarikullaypunichu ari. Tukuyniykuta qanpa aylluyki kayku.

¹⁰ Ajllakusqayki llajtakunaqa chay jina ch'inpachaman tukunku. Sión llajtaqa ch'inpacha, Jerusalenpis laqayalla.

¹¹ Qanpaj t'aqasqa chay may jina k'achitu Templopis, maypichus ñawpa tataykukuna qanta yupaychasorqanku, chayta runakuna ninawan ruphaykuchinku. Tukuy munasqa imakunapis phirisqallataj kashan.

¹² Chay jinata ruwashajtinkupis, qan Tata Dios ch'inllachu kakunki? Manachu imatapis ninki? Chantá astawanrajchu llakichiwasqayku?