Isaías 63 - DIOSPA QHELQACHISQ

Tata Dios awqankunata jasut'in

¹ Pitaj Edom suyumanta jamushanri? Pitaj Bosra llajtamanta jamushan puka p'achayojri? Pitaj sumaj p'achallisqa atiyniyoj thaskejri? Chaymin noqa Tata Dios kani, pichus qhespichinapaj atiyniyoj kaspa, atipanaytapuni willani, chay.

² Imajtintaj p'achayki chay jina puka, uva ch'irwanapi sarojkunaj p'achanku jinari?

³ Chayqa ajina, imaraykuchus noqalla uva ch'irwanapi uvata saruni. Suyukunamanta mana pipis noqawan saroj karqachu. Noqaqa awqaykunata may phiñakuyniywan sarorqani, may k'araj phiñakuyniywantaj paykunata t'usterqani. Chayrayku yawarninku p'achayman ch'allpaykamuwarqa, ajinamanta p'achayta pukachaykorqani.

⁴ Awqaykunamanta vengakunay p'unchay chayamunña, preciota pagaspa kacharichinay p'unchayqa kaypiña.

⁵ Mask'arqani, manataj pipis yanapawaj karqachu. Mayta t'ukorqani mana pipis noqaman sayasqa kasqanmanta. Ajinapi noqalla atiyniywan aylluyta kacharichinaypaj wakichikorqani, jinataj k'araj phiñakuyniywan yanapachikorqani.

⁶ Ajinata sinch'ita phiñakuspa, suyukunamanta runakunata t'usterqani. Phiñakuyniywantaj paykunata musphaykachacherqani, jinaspataj, yawarninkuta pampaman jich'arqani, nispa.

Tata Dios israelitakunamanta khuyakun

⁷ Noqaqa Tata Diospa khuyakuyninmanta yuyarikusajpuni, tukuy imata ruwasqanmantapis payta yupaychasaj. Mayta kusikullasajtaj jatuchaj k'acha imakunata Israelpaj ruwasqanmanta jatun khuyakuyninman jina, munakuyninman jinataj.

⁸ Tata Dios nerqa: Paykunaqa noqaj aylluy kanku, mana wasanchaj wawaykuna kanku, nispa. Chayrayku pay kikin paykunata qhespicherqa.

⁹ Israelitakuna llakisqa kashajtinku, Tata Diospis llakisqallataj karqa. Mana pi angeltapis kachamorqachu paykunata kacharichinanpaj. Manachayqa paymin munakuyninwan, khuyakuyninwantaj pagota pagaspa, paykunata kacharicherqa. Paykunata marq'arikuspa, apaykacharqa, imaynatachus unaymantapacha ruwarqa, ajinata.

¹⁰ Chaywanpis paykuna mana kasukuspa, May Llimphu Espiritunta phiñacherqanku. Chayrayku Diosmin paykunaj awqankuman tukuspa, contrankuta maqanakorqa.

¹¹ Chantá Moisespa tiemponmanta yuyarikorqanku, nerqankutaj: Maytaj kunan chay Dios, pichus Moiseswan ovejakunata jina michispa mama qochata chimpacherqa, chayri? Maytaj kunan pichus May Llimphu Espiritunta israelitakunaj chawpinkuman churarqa, chayri?

¹² Maypitaj kashan pichus jatun atiyninta Moisesta yanapananpaj churarqa, chayri? Maytaj kunan pichus israelitakunaj ñawpaqenkupi yakuta iskayman t'aqarqa, chayri? Ajinamanta Tata Diosqa atiyniyoj kasqanta wiñaypaj rikucherqa.

¹³ Maytaj kunan pichus mama qochaj ukhunta pusaykachajri? Imaynatachus caballo ch'in pampapi mana misk'anchu, ajinallatataj paykuna mana misk'arqankuchu.

¹⁴ Tata Diospa Espíritun paykunaj michejninku karqa. Paykunata uywata jina vallenkunata pusarqa. Ajinata qan, Tata Dios, chaypacha israelita aylluykita pusaykacharqanki, tukuynejpi sutiyki uyarisqa kananpaj.

Tata Dios yanapananta mañakuna

¹⁵ Tata Dios, qan janaj pachamanta qhawarimuy, may llimphu kamachinayki tiyanamanta allinta qhawarimuy. Maytaj kunan chay sinch'i munakuyniyki, kallpaykitajri? Khuyakuyniyki tukukapunchu, sonqoykipis noqaykurayku manañachu wawayan?

¹⁶ Qanlla tatayku kanki, tatayku Abraham mana rejsikuwajtiykupis. Ñawpa tatayku Israel mana yuyarikuwajtiykupis, qanpuni tatayku kanki, Tata Dios. Wiñaymantapacha pagaspa kacharichiwajniyku kanki.

¹⁷ Imajtintaj, Tata Dios, ñanniykikunamanta pantanaykuta saqenkiri? Imaraykutaj sonqoykuta rumiyachiwaykuri, amaña qanta jatun respetowan qhawasunaykupajri? Noqayku kamachiykikunata munakusqaykirayku qhawarimuwayku. Noqayku chayaqeyki aylluykimantaj kutirikamuwayku.

¹⁸ Noqayku ajllasqa aylluyki pisi tiempollapaj qanpaj t'aqasqa cheqata jap'erqayku. Kunantajrí awqaykukuna Temploykita sarunku.

¹⁹ Noqayku rijch'akuyku, pikunatachus qan mana ni jayk'aj kamacherqankichu, chaykunaman, pikunachus ni jayk'aj sutiykiwan sutichasqa karqankuchu, chaykunaman.