Isaías 62 - DIOSPA QHELQACHISQ

Isaías Sión llajtarayku mañapun

¹ Sión llajtata munakusqayrayku mana ch'in kakusajchu. Jerusalenta munakusqayrayku mana samarikusajchu cheqan kajta ruwasqan lliphirimunankama, qhespichisqa kasqantaj k'anchay jina k'anchaykamunankama.

² Chaypacha runakuna Tata Dios qhespichisusqanta rikonqanku. Tukuy kuraj kamachejkunapis jatunchasqa kasqaykita rikullanqankutaj. Chaypacha mosoj sutiwan sutichasqa kanki, chaytataj kikin Tata Diospuni sutichasonqa.

³ Qanqa k'ancharishaj pillu jina Tata Diospa makinpi kanki, valorniyoj k'achitu alaja jina Diosniykej makinpi.

⁴ Manaña jayk'ajpis “Saqerpayasqa Llajta”, nispa nisonqankuchu, suyuykipis manaña “Ch'in Jallp'a” nisqachu kanqa. Manachayqa Tata Dios “Kusikunay Llajta”, nispa sutichasonqa, jallp'aykitataj “Warmisitáy”, nispa nenqa, imaraykuchus Tata Diosqa qanwan may kusisqa kanqa, paytaj suyuykipaj qosayki jina kanqa.

⁵ Imaynatachus wayna parlakusqan sipaswan casarakun, ajinallatataj Diospis qanta warminpaj oqharikapusonqa. Imaynatachus qhari warmi kusikunku, ajinallatataj Diosniyki qanwan kusikonqa.

⁶ Jerusalén, perqayki pataman qhawajkunata churani, paykunataj mana sayk'uspa, tuta p'unchay ninkupuni: Tata Diospa sutinta oqharejkuna, ama ch'inlla kakuychejchu.

⁷ Nitaj Tata Diosta samarikojta saqeychejchu Jerusalenta watej sayachinankama, kay pachapi kaj chhika runakuna Jerusalenta jatunchanankukama, nispa.

⁸ Tata Dios paña makinta oqharispa, tilorqa: Manaña jayk'ajpis awqaykikunaman trigoykita mikhunankupaj qosajchu, nitaj waj llajtayojkunapis vinota ruwasqaykimanta ujyanqankuchu, mayqentachus sinch'ita kallpakuspa ruwarqanki, chayta.

⁹ Manachayqa qankuna pikunachá chay poqoyta oqharejkunalla mikhunkichej, Tata Diostataj yupaychankichej. Qankuna pallajkunapis uvata ch'irwaspa, vinota ujyankichej ajllakusqay Temploj pationpi, nispa.

¹⁰ Punkunkunanejta puriychej, aylluy kutimpunanpaj ñanta pichapuychej. Ñankunaj t'oqonta junt'achiychej, ñanmanta rumikunatataj wijch'uychej. Tukuy runakuna rikunankupaj wiphalatapis pataman oqhariychej.

¹¹ Tata Dios tukuy kay pachapi kajkunaman nin: Sionpa ususinta niychej: Qhawariy, kacharichisojniyki t'inkan aparisqa jamushan, imatachus wakichisqanwan oqharisqa ima, nispa.

¹² Chaypacha israelitakunata sutichanqanku: “Tata Diospaj T'aqasqa Ayllu”, “Tata Dios Pagaspa Kacharichisqan Kajkuna”, nispa. Jerusalentataj sutichanqanku: “May Munasqa Llajta”, “Mana Saqerpayasqa Llajta”, nispa.