Isaías 61 - DIOSPA QHELQACHISQ

Israelpaj sumaj willaykuna

¹ Tukuyta Kamachej Tata Diospa Espíritun noqawan kashan, imaraykuchus Tata Diospuni noqata ajllakuwarqa. Sumaj willaykunata wajchakunaman willaranaypaj kachamuwan, llakisqakunatataj sonqochanaypaj. Presochasqa runakunaman kacharichisqa kanankuta willaranaypaj kachamuwan, jinallataj carcelkunapi kajkunatapis kacharichinaypaj.

² Jinallataj Tata Diospa k'acha yanapaynin wata chayamusqantaña willanaypaj kachamuwan. Chay p'unchaypi Tata Dios awqanchejkunamanta vengakonqa, tukuy llakisqakunatataj sonqochanqa.

³ Chantapis Tata Dios kachamullawantaj Sionpi llakisqa kajkunapaj kay allin imakunata ruwanaypaj: Pikunachus llakisqa kasqankurayku ushphawan qhallisqa kashanku, chaykunaman may k'achitu pilluta churasaj. Llakiy p'achawan churakuspa kanankutaqa, kusiywan p'achallisqa kanankuta ruwallasajtaj. Jinallataj phutisqa kanankumantaqa kusisqallapuni kanankuta ruwasaj. Paykuna justiciata ruwasqankurayku “Tata Diospa Mallkisqan Roble Sach'a”, nispa sutichasqa kanqanku, paypa jatun kayninta rikuchinankupaj.

⁴ Paykuna urmasqa ñawpa wasikunata sayarichenqanku, ch'in thuñisqa laqayakunata watej ruwanqanku. Thuñisqa llajtakunatapis sayarichillanqankutaj. Unay wataña thuñisqa chantá saqesqapis kachun, watej sayarichisqa kanqa.

⁵ Tata Diosqa Israelta nillantaj: Waj llajtayojkuna ovejaykichejkunata michipusonqachej, llank'anaykichejta llank'apusonqachej, jinallataj uva huertaykichejtapis qhawapusonqachej.

⁶ Qankunataj Tata Diospa sacerdotenkuna nisqa kankichej, Diospa kamachinkuna nisqataj. Qankunaqa waj suyukunaj qhapaj kapuyninkumanta mikhunkichej, qhapaj kayninkuwantaj kusikunkichej.

⁷ Qankuna manaña p'enqachisqachu nitaj k'umuykachachisqachu kankichej. Aswanpis jallp'ataqa uj jinatawanraj jap'inkichej, chaypi kapuyniyoj kankichej, wiñaypajtaj kusisqa kawsakunkichej.

⁸ Noqa Tata Dios justiciata munakuni. Suwayta, millay ruwayta imarí chejnikuni. Noqaqa nisqayta junt'asajpuni, ruwasqankuman jinatataj paykunaman t'inkata qosaj, paykunawantaj wiñaypaj tratota ruwasaj.

⁹ Israelitakunaj mirayninku tukuy suyu ukhupi uyarisqa kanqanku, llajtakuna chawpipitaj paykunaj mirayninku may uyarisqa kanqanku. Tukuy chayta rikojkunataj nenqanku: Tata Diosmin paykunata saminchan, nispa.

¹⁰ Noqaqa Tata Diospa ruwasqanpi mayta kusikuni. Diosniy yanapawasqanmanta sinch'itapuni kusikuni, imaraykuchus payqa qhespichiwan, cheqan kayninwantaj qhataykuwan. Imaynatachus casarakoj wayna sumajta p'achallikun, casarakoj sipastaj jaluchunwan sumajta k'achanchakun, ajinata noqapis Tata Diospa ruwasqanpi kusikuni.

¹¹ Imaynatachus sach'apis jallp'api wiñan, jinallataj huertapi imapis p'utumun, ajinallatataj Tukuyta Kamachej Tata Diosqa cheqan kawsayta, chantá payta jatunchayta ima p'utuchimonqa tukuy suyukunaj ñawpaqenkupi.