Isaías 60 - DIOSPA QHELQACHISQ

Mosoj Jerusalén llajta

¹ Jerusalén, sayarispa lliphipiriy, imaraykuchus k'anchayniyki chayamunña, Tata Diospa jatun kayninpa lliphipiynintaj pataykipi k'anchashan.

² Laqhayayqa kay pachata qhataykun, tuti laqhayaytaj suyukunata p'ampaykun. Chaywanpis Tata Diospa k'anchaynenqa pataykipi kanqa, jatun kayninpa lliphipiynintaj rikhurimusonqa.

³ Chantá tukuy suyukuna qanpa k'anchayniykiman jamonqanku, kuraj kamachejkunapis chay k'anchayniykej lliphipiyninpi purenqanku.

⁴ Muyuyniykita qhawarikuy. Tukuyninku ujllaman tantaykukuspa, qanman jamonqanku. Churiykikunaqa karu suyukunamanta jamonqanku, ususiykikunataj marq'api apamusqa kanqanku.

⁵ Chaypacha qanqa paykunata rikuspa, mayta kusikunki, sonqoykitaj kusiywan t'ikarenqa. Mama qocha kantupi tiyakojkuna valorniyoj imankuta apamusonqanku, tukuy suyoj qhapaj kayninkutataj qanman jaywasonqanku.

⁶ Madianmanta, Efamantawan ashkha camellokuna cargawan chajnasqa junt'aykamusonqanku. Sabá suyumanta runakunaqa qorita, inciensotawan apamonqanku, Tata Diospa sutintataj maytapuni jatunchanqanku.

⁷ Cedarmanta tukuy uywakunatapis qanman qosonqanku. Qantaj Nebayotmanta carnerokunata altarniypi ñak'aspa jaywawankichej, sumaj q'apashaj jaywanata jina. Noqataj Temployta manchay k'achitu qhawasqa kananta ruwasaj.

⁸ Pikunataj phuyu jina oqharikuspa, Israelman phawamushanku, thapankuman phawaj urpikuna jinari?

⁹ Chaykuna karumanta jamoj barcokuna kanku, Tarsismanta jatuchaj barcokunataj ñawpajta jamushanku. Chay barcokuna churiykikunata qolqenkutawan, qorinkutawan khuska apamushanku. Ajinamanta Tata Diosniyki, Israelpa May Llimphu Kaj Diosnin jatunchasqa kanqa, imaraykuchus payqa jatun kayninpa lliphipiyninwan junt'aykuchisunki.

¹⁰ Waj llajtayojkuna perqaykita ruwapusonqanku, kuraj kamachejninkupis munasqaykita ruwanqanku. Noqa phiñakuspa ñak'aricherqayki chaypis, kunanqa khuyakoj kasqayrayku qanmanta khuyakusqayki.

¹¹ Llajta punkuykikunaqa tuta p'unchay kichasqallapuni kanqanku, qanman tukuy suyu kapuyninkuta apamunankupaj, jinallataj kuraj kamachejninkupis chayman pusamusqa kanankupaj.

¹² Mayqen suyuchá, chayrí ima llajtachá munasqaykita ruwayta mana munajqa chinkachisqa, ch'inyachisqataj kanqa.

¹³ Tata Diosqa Jerusalenta ajinata nillantaj: Líbanoj qhapaj kayninta qanman apamonqanku, ciprés sach'akunata, pino sach'akunata ima. Ajllakusqay cheqaqa chaykunawan k'achanchasqa kanqa, maypichus noqa tiyakuni, chayta aswan sumajman tukuchinaypaj.

¹⁴ Chaypachallataj ñak'arichisojkunaj wawankoqa ñawpaqeykipi k'umuykonqanku, pisipaj qhawasojkunapis chakiykiman k'umuykamullanqankutaj. Paykuna sutichasonqanku “Tata Diospa Llajtan”, “Israelpa May Llimphu Kaj Diosninpa Sión Llajtan”, nispa.

¹⁵ Qan ñawpajta saqerpayasqa, chejnisqataj karqanki, jinataj qan chaynejta mana pipis pasayllatapis munajchu. Kunanrí noqaqa wiñaypaj chhika pataman oqharisqayki, qanpitaj tukuy mita runakuna kusikonqanku.

¹⁶ Waj suyukunaj aswan sumaj mikhunankuta mikhunki, kuraj kamachejkunaj kapuyninkuwantaj kawsanki. Chaypacha rejsiwanki noqa Tata Diosmin qhespichisoj kasqayta, pagaspa kacharichisojniyki, Jacobpa Tukuy Atiyniyoj Diosnin ima kasqayta.

¹⁷ Bronce metalta apamunaymantaqa qorita apamusqayki, fierromantaqa qolqe metalta, maderamantaqa bronceta, rumikunamantaqa fierrota. Allinpi kawsayta kamachisunanpaj churasaj, cheqan kawsaytataj pusasunanpaj churallasajtaj.

¹⁸ Manaña jayk'ajpis maqanakuy chantá wañuchinakuy suyuykipi uyarikonqachu, nillataj pipis suyuykita thuñej jamonqachu. Manachayqa perqaykikunata “Qhespichiwajniy”, nispa sutichanki, punkuykikunatataj “Tata Diosta Yupaychana”, nispa.

¹⁹ Chaypacha mana intichu, nitaj killachu k'anchamusonqa, manachayqa noqa Tata Diosmin wiñaypaj k'anchaykamusqayki. Noqa Diosniykirayku jatunchasqapuni kanki.

²⁰ Inteqa mana jayk'ajpis yaykuponqachu, nitaj killa wañuypis kanqachu. Noqa Tata Diosmin wiñaypaj k'anchayniyki kasaj, jinataj phutisqa purinayki p'unchaykunapis tukukaponqa.

²¹ Chaypacha tukuyniykichej cheqanta ruwajkuna kankichej, jallp'aykichejtapis wiñaypaj jap'ikapunkichej. Qankuna mallkisqaypa ijimuynin kankichej, makiypa ruwasqantaj noqata jatunchanawaykichejpaj.

²² Kay pisi puchoj runakunaqa waranqata mirankichej, aswan mana kasuta ruwana runakunapis jatun suyuman tukunkichej. Noqa Tata Diosmin chayta nini, imatachus nisqaytaj usqhayllata junt'akonqapuni.