Isaías 58 - DIOSPA QHELQACHISQ

Cheqa kaj ayuno

¹ Tata Dios niwarqa: Ama samarispa, kunka llik'ikuyta qhapariy, pututu jina qhapariy. Jacobpa miraynin aylluypa juchanta sut'iman orqhoy.

² Paykunaqa sapa p'unchay mask'awanku. Kamachisqayta rejsiyta munanku, cheqanta ruwaj ayllupis kankuman jina, Diosninkoj kamachisqanta manapis saqenkumanchu karqa jina. Jinallataj paykuna cheqan justiciata ruwanayta mañawanku, noqaman qayllaykamuwaspataj, kusikunku.

³ Chantá ninku: Noqaykoqa ayunayku, qantajrí mana kasuta ruwawaykuchu. Sonqoykuta llamp'uyachiyku, qantajrí mana repararqankichu, nispa. Chaywanpis ayunashaspa, munasqallaykichejta ruwankichej. Chay p'unchaypi peonniykichejtapis astawan ch'irwankichej.

⁴ Qankuna ayunashaspaqa, phiñanakunkichej, churanakunkichej ima, manakajllamanta sajmanakunkichej. Chay jinata ayunashaspa, yuyankichejchu noqawan janaj pachapi uyarichikunaykichejta?

⁵ Qankunaqa runaj rikunallanta k'umuykunkichej. T'utura qhora jina k'umuykuspa, qhashqa p'achata churakunkichej, ushpha patapitaj winkunkichej. Chaytachu qankuna ayuno kasqanta ninkichej? Noqa Tata Diospaj allin kasqantachu yuyankichej?

⁶ Manachu yachankichej imayna ayunotachus munasqayta? Noqa munani qankuna manakajmanta ñak'arichisqa kajkunata kacharichinaykichejta, yugopi watasqa jina runakunatataj phaskaranaykichejta. Munallanitaj llakichisqa kajkunata kacharinaykichejta, kallpankupi atinikuspa ñak'arichej runakunatataj chinkachinaykichejta.

⁷ Munani yarqhasqakunaman mikhunaykichejmanta jaywarinaykichejta, mana wasiyojkunatataj wasiykichejman wajyarikunaykichejta. Munallanitaj mana p'achayojkunata p'achallichinaykichejta, pisichikoj runa masiykichejmantapis ama pakakunaykichejta.

⁸ Chantá k'acha kawsayniykichejqa tutamanta inti llojsimuy jina k'ancharenqa. Chaypacha k'irisqa kasqaykichejpis usqhayta qhaliyanqa. Justiciata ruwasqaykichejpis ñawpaqeykichejta renqa, Tata Diospa jatun kaynintaj qhepaykichejpi waqaychasonqachej.

⁹ Chantá Tata Diosman qhaparikojtiykichej, pay uyarisonqachej. Paymanta mañakojtiykichejpis, nimusonqachej: Kaypi kashani, nispa. Wasiykichejpi ñak'arichiy amaña kachunchu, nitaj chejninakuy, nillataj qhasimanta tumpay.

¹⁰ Manachayqa yarqhasqakunaman mikhuchiychej, ñak'arichisqa runatataj yanapaychej. Ajinatachus qankuna ruwankichej chayqa, laqhayaypi k'anchay jina k'ancharinkichej, muyuykusoj laqhayaytaj chawpi p'unchayman jina tukonqa.

¹¹ Chantá noqa Tata Diosqa pusaykachasqaykichejpuni. Ch'innejpi ashkha mikhunata qosqaykichej. Ukhuykichejtapis sumajta kallpachasaj. Qankunataj sumaj qarpasqa huerta jina kankichej, mana jayk'aj ch'akej yaku juturi jinataj.

¹² Mirayniykichejqa thuñisqa ñawpa laqayakunata watej sayachenqanku, jinataj ñawpa runakunaj churasqanku cimiento patapi wasikunata oqharenqanku. Chaymantataj qankuna sutichasqa kankichej: Perqaj q'asanta perqaykojkuna, thuñisqa wasikunata sayachejkuna, nispa.

Samarikuna p'unchaymanta

¹³ Samarina p'unchaypi ama karuta puriychejchu, nitaj ajllakusqay p'unchaypi munayniykichejta ruwaychejchu. Manachayqa kayta niychej: Chay p'unchayqa Tata Diospa sumaj p'unchaynin, nispa. Chay p'unchaypi noqata jatunchawankichej mana imatachus munasqaykichejta ruwaspa, nitaj munasqaykichejta mask'aspa, nillataj qhasi manakajta parlaspa.

¹⁴ Ajinatachus qankuna ruwankichej chayqa, aylluy kasqaykichejmanta kusikunkichej. Noqaqa chhika pataman churasqaykichej, tataykichej Jacobpa chayaqen jallp'apitaj sumajta mikhuchisqaykichej, nispa. Ajinata Tata Dios nin.