Isaías 56 - DIOSPA QHELQACHISQ

Diosqa waj suyukunatapis saminchallanqataj

¹ Tata Dios nin: Justiciata ruwallaychejpuni. Imatapis cheqanta ruwaychej, imaraykuchus kacharichinay p'unchayqa qayllapiña, noqa jamuspataj, justiciata ruwasaj.

² Kamachisqayta kasuspa junt'aj runaqa kusikuyniyojmin. Payqa samarina p'unchayniyta waqaychan, tukuy mana allin kajta ruwanamantataj allinta qhawakun.

³ Tata Diospi atinikoj waj llajtayojqa ama nichunchu: Tata Diosqa ayllunmanta t'aqarpariwanqachari, nispa. Amallataj capasqa runapis nichunchu: Noqaqa ch'aki sach'a jinalla kani, nispa.

⁴ Chayqa ajina, imaraykuchus Tata Dios nin: Sichus capasqa runakuna samarina p'unchayta waqaychanku, sitajchus munayniyta ruwaspa, tratoyta junt'anku chayqa,

⁵ noqaj Temploypa pationpi, perqawan muyuykuchisqa llajtaypi ima sutinku qhelqasqa kanqa. Noqa paykunaman may uyarisqa sutita qosaj, chay wiñaypaj qosqa sutitaj mana jayk'aj chinkachisqachu kanqa. Chaytaj capasqa runapaj aswan sumaj kanqa wawayoj kanamanta nisqaqa.

⁶ Tata Dios paymanta jap'ikoj waj llajtayojkunatapis saminchallanqataj, pikunachus munayninta ruwanku, Tata Diospa sutinta munakuspataj, payta yupaychanku, chaykunata. Paykunaqa samarina p'unchayta waqaychanku, Diospa trato ruwasqantataj mana p'akinkuchu.

⁷ Payqa nin: Noqa Tata Dios paykunata noqapaj t'aqasqa orqoman pusasaj, noqamanta mañakuna wasiypitaj paykunata kusichisaj. Uywata ñak'aspa q'olachisqankuta jinataj jaywawasqankuta ima tukuy sonqo jap'ikusaj. Temployqa Diosmanta mañakuna wasi sutichasqa kanqa tukuy runapaj.

⁸ Noqa Tukuyta Kamachej Tata Dios, pichus karuman wijch'usqa israelitakunata tantamuni, kayta nini: Kay tukuy tantamusqaymanta jawaqa wajkunatapis tantamusajraj, nispa.

Mana allinta kamachejkunata k'amin

⁹ Campopi tukuy phiña animalkuna, k'ita animalkuna ima, jamuychej aylluyta mikhoj.

¹⁰ Aylluyta qhawajkunaqa ñawsa kanku, manataj imatapis yachankuchu. Paykunaqa ayñayta mana atej alqokuna jina kanku. Winkuspa puñuywan mana sajsakuy atejkuna kanku, puñuspataj misk'irichikunku.

¹¹ Alqo jina mikhunawan mana sajsakuyta atej kanku. Paykuna michejkuna kashaspapis, mana yuyayniyoj wampu kanku. Sapa ujninku imatachá munasqankuta ruwaspa purinku. Sapa ujninku imachá paykunapaj allin kajllata mask'akunku munasqankuman jina.

¹² Paykuna ninakunku: Jamuychej, vinota ujyasunchej, licorwantaj macharikunachej. Q'ayataj kunan p'unchay jina kanqa, chayrí aswan sumajrajchus kanqapis, nispa.