Isaías 55 - DIOSPA QHELQACHISQ

Tata Diospa khuyakuynenqa tukuypaj

¹ Tukuy ch'akichikojkuna, jamuychej yakuta ujyaj. Mana qolqeyojkuna, jamuychej. Mana qolqellawan trigota rantikuspa, mikhuychej. Jamuychej, mana pagaspalla vinota lechetapis ujyaychej.

² Imaraykutaj qolqeykichejta tukunkichej mana mikhuna kajllapi? Imaraykutaj pagoykichejta tukunkichej mana sajsachej mikhunallapiri? Allinta uyariwaychej, jinaspataj allin kajmanta mikhunkichej, sumaj mikhuykunawantaj misk'irichikuychej.

³ Noqaman qayllamuwaychej, ninriykichejta kicharispa. Sumajta uyariwaychej, kawsaytataj tarinkichej. Qankunawan wiñaypaj uj tratota ruwasaj, imatachus munakusqay Davidman nerqani, chayta junt'aspa.

⁴ Noqa Davidta tukuy suyupaj testigo kananpaj churarqani, chantá kuraj kamachej jina paykunaman yachachinanpaj.

⁵ Qanpis mana rejsisqa suyukunata wajyallankitaj. Qanta mana rejsisoj suyukuna usqhayta qanman jamusonqanku Tata Diosniykirayku, Israelpa May Llimphu Kaj Diosnin qanta pataman oqharisusqanraykutaj, nispa.

⁶ Tata Diosta mask'aychej, kunan tarinapaj jina kashajtin. Qayllallapiraj kashajtin, Diosta wajyakuychej.

⁷ Millayta ruwajqa millay kawsayninta saqechun. Millay runapis imatachus yuyasqanta saqechun. Tata Diosman kutirikamuchun, imaraykuchus paymanta khuyakonqa. Diosninchejman kutirikuchun, paytaj jatun sonqoyoj kasqanman jina chay runaj tukuy juchanta pampachanqa.

⁸ Tata Dios nin: Noqaj yuyasqayqa mana qankunaj yuyasqaykichej jinachu, ruwasqaytaj mana qankunaj ruwasqaykichej jinachu.

⁹ Imaynachus janajqa kay pachamanta aswan patapi kashan, ajinallataj ruwasqayqa ruwasqaykichejmanta aswan patapi kashan. Jinallataj qankunaj yuyasqaykichejmanta noqaj yuyasqayqa aswan patapi kashan.

¹⁰ Parawan, rit'iwan patamanta urmamuspa, manaña pataman kutirinchu, manachayqa jallp'ata qarpan. Ajinamanta tarpusqa mujuta p'utuchin, tarpojpaj muju kananpaj, runapajtaj mikhuna.

¹¹ Ajinallataj noqamanta llojsej simi nisqaypis kanqa. Mana jinallachu kutimuwanqa, manachayqa imatachus munasqayta ruwanqa, jinataj imapajchus kacharqani, chayta junt'anqa.

¹² Qankunaqa kusisqa Babiloniamanta jaqaymanta llojsimunkichej, sonqo junt'asqataj kay jallp'aykichejman kutimpunkichej. Orqokuna, lomakunapis ñawpaqeykichejta maytapuni takirenqanku. Campopi tukuy sach'akunapis mayta t'ajllarikonqanku.

¹³ Khishkaj cuentanmanta pino sach'a wiñanqa. Ithapalloj cuentanmantataj arrayán sach'a wiñanqa. Chayqa uj señal kanqa, Tata Diospa sutin wiñaypaj jatunchasqa kananpaj, nitaj jayk'ajpis chinkachisqachu kanqa.