Isaías 51 - DIOSPA QHELQACHISQ

Tata Dios Jerusalenta sonqochan

¹ Tata Dios nin: Cheqanta kawsajkuna, Tata Diosta mask'ajkuna, uyariwaychej: Qhawariychej ima chhankamantachus ch'eqosqa kasqaykichejta, ima canteramantachus orqhosqa kasqaykichejta.

² Unanchariychej ñawpa tataykichej Abrahammanta, ñawpa mamaykichej Saramantawan, pichus qankunata paqarisorqachej, paymanta. Manaraj wawayoj kashajtinku, paykunata wajyarqani, samincharqani, miracherqanitaj.

³ Cheqamanta noqa Tata Dios Sión llajtata sonqochasaj, jinallataj llajtaj laqayankutapis khuyakuywan qhawasaj. Ch'aki ch'in jallp'anta qhallallarichisaj, imaynatachus Edén huertata qhallallaricherqani, ajinata. Chaypi may kusikuy, Diosta jatunchay, tocanawan takiykuna ima kanqa.

⁴ Aylluymanta kajkuna, uyariwaychej. Noqa yachachisqayta tukuyman willasaj. Kamachisqayqa tukuy suyupaj k'anchay jina kanqa.

⁵ Justicia ruwanay p'unchay qayllapiña. Kacharichinay p'unchay ñanpiña kashan, atiyniywantaj tukuy suyuta kamachisaj. Mama qocha kantupi tiyakojkunaqa jatun atiyniywan paykunata yanapanayta suyanqanku.

⁶ Janajta qhawariychej, kay pachatapis qhawariychej. Janajqa q'oshñi jinalla chinkariponqa, kay pachapis p'acha jinalla thantarparikonqa. Chaypi tiyakojkunapis ch'uspi jina wañuranqanku. Chaywanpis pitapis qhespichejtiy, chayqa wiñaypajmin. Justiciawan kamachisqaytaj mana jayk'ajpis tukukonqachu.

⁷ Uyariwaychej, cheqan kajta rejsejkuna, pikunachus yachachiyniyta sonqoykichejpi jap'ikojkuna: Runakuna qankunamanta millayta rimasqankuta ama manchachikuychejchu, amataj chay jinatapuni alqochakusqankurayku q'enaqakuychejchu.

⁸ Paykunaqa thutaj thutasqan p'acha jina tukukonqanku, thutasqa millma jinataj. Justiciata ruwasqayrí wiñaypaj kallanqapuni, noqataj wiñay wiñaynintinpaj qhespichisqaykichej.

⁹ Rijch'ariy, Tata Dios, rijch'ariy, atiyniykiwan kacharichiwayku, imaynatachus unay ruwaj kanki, ajinata. Imaynatachus ñawpa tataykukunaj tiemponpi ruwarqanki, ajinata ruway. Qanqa Rajabta chhikan chhikanta t'isarparerqanki, mama qochapi tiyaj sierpetataj t'unarparerqanki.

¹⁰ Manachu qan mama qochapi chay chhika ukhu yakuta ch'akicherqanki? Chaypitaj uj ñanta kicharerqanki, chayninta kacharichisqayki israelitakuna chimpanankupaj.

¹¹ Pikunatachus Tata Dios pagota qospa kacharicherqa, chaykuna kutimponqankupuni. May kusiywan takirispa, Sión llajtaman yaykonqanku, chaypitaj wiñaypaj kusisqa tiyakonqanku. Paykunaqa kusisqallapuni kanqanku, nanaywan, waqaywantajrí chinkaponqa.

¹² Noqamin sonqochasojniyki kani. Imaraykutaj runakunata manchachikunkiri? Qhora jinalla wañoj, chay runatachu manchachikunki?

¹³ Chaywanpis ruwasojniyki Tata Diosta qonqapunkiña, pichus janajta jatunman aysarqa, kay pachaj cimientontapis churallarqataj, payta. Qanqa tukuy p'unchaynintin manchachikullankipuni, pichus llakichisuspa, phiñakuyninpi chinkachisuyta munarqa, chaymanta. Kunan maytaj chay jinata llakichisoj runaj phiñakuyninri?

¹⁴ Carcelpi ñak'arichisqa kajqa usqhayllata kacharichisqa kanqa. Mana carcelpi wañonqachu, nillataj yarqhaymantapis ch'ayñanqachu.

¹⁵ Noqamin Tata Diosniyki kani, suteyqa Tukuy Atiyniyoj Tata Dios. Noqamin mama qochata sinch'ita qhollchoqeyachini, jinataj pata patata oqharichini.

¹⁶ Nisqayta simiykiman churarqani, makiypa llanthunpitaj waqaycharqayki. Janajta jatunman aysaspa, kay pachaj cimientontapis churaspa, Sionta nerqani: Qanqa aylluy kanki, nispa.

¹⁷ Jerusalén llajta, rijch'ariy, rijch'arikuy, sayarikuytaj. Qanqa Tata Diospa k'araj phiñakuyninwan junt'a kashan, chay copata makinmanta jap'ispa, ujyarqanki. Qan machanaykikama phiñakuynin copamanta qonchuntinta ujyaykorqanki.

¹⁸ Tukuynin wawaykikunamanta mana ujllapis qanta pusaj kanchu. Uywasqayki wawakunamanta ni mayqenpis makiykimanta aysarej kanchu.

¹⁹ Kay iskay llakiykuna qanta qhatirisorqa: Llajtaykeqa tukuchisqa, ch'inpacha saqesqa karqa, runaykikunataj yarqhaywan, espadawan ima wañurachisqa karqanku. Kunantaj pitaj qanmanta llakikonqari? Pitaj sonqochaykurisonqari?

²⁰ Churiykikunaqa yarqhaywan llawch'iyaspa, tukuy ñan patapi wijch'urayashanku, tojllapi jap'isqa taruka jina. Tata Dios k'araj phiñakuyninwan paykunata jasut'erqa, Diosniykitaj paykunata sinch'ita k'amirparerqa.

²¹ Llakisqa llajta, mana vinollawan machasqa, kayta uyariy:

²² Tukuyta Kamachej Tata Dios, ayllunman sayasqa Diosniykeqa ajinata nin: Qhaway, k'araj phiñakuyniywan junt'a copata makiykimanta oqharikapuniña. Kunanqa manaña jayk'ajpis phiñakuyniyta ujyankichu.

²³ Noqatajrí chay copata ñak'arichisojkunamanñataj qosaj, pikunachus nisoj kanku: Pampaman siriykuy, pataykita purinaykupaj, nispa, chaykunaman. Qanqa paykunata kasuspa, pampaman sirerqanki, paykunataj pataykita ñanta jina purerqanku, nispa.